Kơxê lơ 2/7, Hô̆i đong kuăn pơlê kong pơlê Dak Lak hiăng tơkŭm po roh hôp má môi Hô̆i đong kuăn pơlê kong pơlê hneăng má X, hneăng hơnăm 2021 – 2026, klêi kơ’nâi pêi pro tơdroăng tơmot chiâng môi tơnêi tơníu. A roh hôp, Hô̆i đong kuăn pơlê kong pơlê Dak Lak hiăng tơbleăng Pơkâ dêi Vi ƀan hnê mơhno Kuô̆k hô̆i ‘na tơdroăng rah xo mơngế pêi cheăng to pro kăn pơkuâ ki xiâm.

Jâ Cao Thị Hoà An, Phŏ Kăn pơkuâ tơdroăng cheăng Đảng kong pơlê, châ rah xo pro Kăn hnê ngăn Hô̆i đong kong pơlê Dak Lak hneăng hơnăm 2021 – 2026; pôa Trần Phú Hùng, Kăn cheăng tung Khu pơkuâ tơdroăng cheăng Đảng kong pơlê ƀă pôa Đỗ Thái Phong, Tỉnh ủy viên, châ rah xo pro Phŏ Kăn hnê ngăn Hô̆i đong kong pơlê; jâ Phạm Thị Phương Hoa to pro Kăn pơkuâ ‘na luât; jâ Phan Thị Hà Phước pro Kăn pơkuâ Khu pơkuâ cheăng kâ – Liăn ngân; pôa Lê Văn Cường to pro Kăn pơkuâ Khu pơkuâ Khôi túa lĕm – Rêh ối pơlê pơla; jâ Đỗ Thị Như Tình pro Kăn pơkuâ Khu pơkuâ hdroâng kuăn ngo.

Xông tơpui a roh hôp, jâ Cao Thị Hoà An, Kăn hnê ngăn Hô̆i đong kuăn pơlê kong pơlê Dak Lak tối nhên, ƀă ƀăng deăng ki ai xêh lối 18.000 km2, pơ’leăng mâ mơngế lối 3,34 rơtuh ngế, Dak Lak chiâng môi tung pái kong pơlê kân má môi tung lâp tơnêi têa ‘na tơnêi tơníu, môi kong pơlê ai tŭm tơmeăm vâ mơnhông tâi tâng mâu kơvâ cho roh tơ’lêi vâ mơjiâng ivá nếo, tíu mơnhông nếo ăm kong pơlê Dak Lak tung hneăng mơnhông pơtối mê.