Hâi lơ 3/7, Vi ƀan kong pơlê Dak Lak tơkŭm po Hneăng hôp tơbleăng mâu pơkâ dêi Kăn hnê ngăn Vi ƀan kong pơlê ‘na mâu kăn ƀô̆ lăm pêi cheăng. Ƀă mâu pơkâ nếo, khu kăn ƀô̆ pêi cheăng mâu kơ koan tơnêi têa a Dak Lak klêi kơ’nâi tơmot chiâng môi hiăng tơniăn tâi tâng, tơniăn pêi cheăng phuâng lĕm.

A roh hôp, Vi ƀan kong pơlê Dak Lak tơbleăng mâu pơkâ tơdah, rah xo ƀă mơnhên mâu kăn pơkuâ ƀă ngế ối a ko hên kơ koan, tíu cheăng râ khu hnê ngăn tung kong pơlê. Ki nhên: Rah xo pôa Trần Văn Tân – Kăn pơkuâ Khu pơkuâ liăn ngân kong pơlê Phú Yên (ton) to pro Kăn pơkuâ liăn ngân kong pơlê Dak Lak. Tơdah ƀă rah xo pôa Cao Đình Huy – Phŏ Kăn pơkuâ hnê ngăn cheăng Thành ủy, Kăn hnê ngăn Vi ƀan pơlê kong kơdrâm Tuy Hòa, kong pơlê Phú Yên to pro Kăn pơkuâ Khu pơkuâ mơjiâng tơmeăm kong pơlê Dak Lak. Rah xo jâ Lê Thị Thanh Xuân – Kăn Hnê hriâm ƀă Hnê mơjâng tuăn ngôa rơkê kong pơlê Dak Lak (ton) to pro Kăn pơkuâ Khu pơkuâ hnê hriâm ƀă Hnê mơjiâng tuăn ngôa rơkê kong pơlê Dak Lak. Rah xo pôa Nay Phi La – Kăn ngăn ‘na pơkeăng ƀă khăm pơlât kong pơlê Dak Lak (ton) to pro Kăn ngăn ‘na pơkeăng ƀă khăm pơlât kong pơlê Dak Lak.

Xông tơpui a roh hôp, pôa Tạ Anh Tuấn, Kăn hnê ngăn Vi ƀan kong pơlê mơnhên, kheăn kơdeăn tơdroăng pêi cheăng, pleăng ƀă hiâm mơno pôu râng hnoăng cheăng dêi mâu kăn ƀô̆ châ rah xo, tơdrêng amê pơkâ thế khu kăn pơkuâ pơtối mơnhông ivá, khên tơnôu ƀă tơrŭm môi tuăn vâ mơjiâng khu pêi cheăng tơnêi têa pêi cheăng xêt khât châ tơƀrê, tơxâng pơkâ tung hneăng mơnhông mơdêk dêi kong pơlê.