Roh tơmot chiâng môi kố, Phú Yên ai 971 kăn ƀô̆ to a Dak Lak, tung mê ai 876 kăn pơkuâ râ kơbong ƀă chuyên viên; 95 kăn ƀô̆ cho Phŏ Kăn pơkuâ tơngi klêng,  ối tung mâu ngế châ tăng ăm hngêi ối tiô pơkâ. Klêi kơ’nâi leh tơbleăng mơjiâng kong pơlê nếo a hâi lơ 30/6, mâu kơ koan, tíu cheăng kô păng ‘nâng pêi cheăng. Mơhé ối hên pá puât ‘na tíu ối, tơdroăng rêh ối ƀă hriâm tâp ăm kuăn ‘nĕng, laga ƀă hiêm mơno pôu râng hnoăng cheăng ƀă tơdroăng ki hbrâ, mâu kăn ƀô̆ apoăng lo ing Phú Yên to a Dak Lak hiăng mơhno tơdroăng ki khŏm mơ-eăm tơmot rĕng, tơdjuôm ivá xua mơnhông mơdêk krá tơniăn dêi kong pơlê nếo tung hneăng pơxiâm apoăng.

Hrĭng ngế kăn ƀô̆, mâu kăn pơkuâ cheăng tung kong pơlê Gia Lai hiăng lăm pêi cheăng a Tíu pêi cheăng xiâm pơlê kong kơdrâm Quy Nhơn, kong pơlê Bình Định, pơxiâm pêi cheăng, pơ’lêh tơdroăng pêi cheăng mâu hơnăm vâ mơnhông nếo dêi kong pơlê Gia Lai . Sap tơdế khế 6 , Khu kăn Đảng dêi mâu kong pơlê  Gia Lai ƀă Bình Định hiăng ai hlá mơ-éa môi tuăn: tung rôh má 1, pro hlâu vâ dâng 50 % tung pơla 1.800 ngế kăn bô̆, mâu kăn pơkuâ dêi mâu tíu pêi cheăng, kơva acheăng xiâm ki nếo. Kơxô̆ kăn ƀô̆ ki u ối pơtối pêi cheăng a tíu pêi cheăng kơxô̆ 2 a pơlê kong kơdrâm Pleiku vâ tơniăn mâu tơdroăng cheăng dêi khu kăn xiâm a kong pơlê Gia Lai (ton) troh hơnăm 2025 . Klêi hơnăm 2025 , mâu tíu pêi cheăng kô hbrâ pơkâ tơdroăng pơ’lêh mơngế pêi cheăng ăm tơtro, ngăn tiô kơ tơdroăng ki ai khât ƀă tơdroăng cheăng tơmeăm khoăng a tíu pêi cheăng Quy Nhơn.

Tâi tâng Khu pơkuâ Đảng ƀô̆ kong pơlê Kon Tum hneăng má XVI, hiăng ai mâ a kong pơlê Quảng Ngãi vâ kơxo hâi lơ 30/6 veăng leh tơbleăng khu pêi cheăng tơnêi têa.

Ƀă 40 cheăm, bêng nếo dêi kong pơlê Kon Tum ton nah kơtăn tíu xiâm pơkuâ tơnêi têa kong pơlê nếo Quảng Ngãi dâng 200 km, kăn pơkuâ 2 kong pơlê Kon Tum ƀă Quảng Ngãi hiăng môi tuăn mơjiâng 10 tíu hrik mơ’no hyôh a tíu xiâm 10 tơring, pơlê kong kơdrâm dêi kong pơlê Kon Tum ton vâ kăn ƀô̆ 40 cheăm, bêng nếo rơtế veăng tơdroăng ki kal ing mơ’no tơdrêng tung um tiô troăng hyôh măng.