Pôa Nguyễn Hòa Bình, Phŏ Ngế pro xiâm hnê ngăn tơnêi têa rơkâu hâk mâu khu tơrŭm Đảng, Khu pơkuâ cheăng péa râ ƀă mâu kăn ki châ pơkâ thế, pôk ƀă loi taih kố, mâu ngế ki kố kô mơdêk hnoăng cheăng pôu râng, tơxâng ƀă hnoăng cheăng pơcháu, gum kuăn pơlê, veăng mơjiâng kong pơlê mơnhông rơtế ƀă lâp tơnêi têa tung chal mơ-eăm tơná.

Pôa Nguyễn Hòa Bình, Phŏ Ngế pro xiâm hnê ngăn tơnêi têa xuân pơkâ thế khu kăn ƀô̆, kong chưk, kong pơlê Lâm Đồng nếo rĕng tơbleăng pêi tơƀrê mâu tơdroăng cheăng.

Pôa Y Thanh Hà Niê Kdăm, Kăn pơkuâ hnê ngăn cheăng Đảng kong pơlê Lâm Đồng, pơtroh rơkong mơnê trâu hơngế troh Khu xiâm kal kí hiăng loi tơngah pơkâ veăng Khu pơkuâ ƀă pơcháu hnoăng to pro Kăn pơkuâ hnê ngăn cheăng Đảng kong pơlê. Kăn xiâm pơkuâ hnê ngăn cheăng Đảng kong pơlê Lâm Đồng ki nếo tơkêa kô mơdêk hiâm mơno, tơrŭm môi tuăn, tơrŭm krá tơniăn ƀă Khu pơkuâ, Khu pơkuâ tơdroăng cheăng Đảng nếo ƀă khu râ kăn pơkuâ kong pơlê klêi kơ’nâi tơmot chiâng môi, vâ djâ kong pơlê nếo mơnhông tơxâng ƀă tơmeăm ki hiăng ai hlâu, tơxâng tơdroăng pói vâ dêi Đảng, Tơnêi têa ƀă Kuăn pơlê.

Pơtối mê, kong pơlê kô xúa tâi tâng ki tơ’lêi hlâu, mê cho kong kế nhâ loăng kơpong kân rơdâ, kơpong tơbăng achê têa kơxĭ ƀă mâu tơmeăm khoăng kơnâ khôi túa lĕm tro ki má môi dêi kong pơlê, vâ mơjiâng troăng pêi ton xŏn mơnhông cheăng kâ – rêh ối pơlê pơla ton hâi. Tối tơdroăng ki loi tơngah hdrối mâu tơdroăng kal kố, pôa Điểu Minh a cheăm Đức An, kong pơlê Lâm Đồng tối:

“Hâi lơ 1/7 chiâng môi kong pơlê nếo, kô hên hdroâng kuăn ngo rêh ối tơdjuôm, môi tiah: hdroâng kuăn ngo M’Nông, Xuăn, Rơđế, Jarai, K’Ho klêi mê Nùng, Tày ƀă hên hdroâng kuăn ngo ki ê. ‘Na khôi túa lĕm tro rêm hdroâng kuăn ngo ai khôi túa lĕm tro phá tơ-ê dêi pó, môi tiah rơhdruê, rơngêi, chêng koăng, leh mơdĭng xuân môi tiah dêi pó. Trâm mâ tâi tâng mâu hdroâng kuăn ngo a kong pơlê Lâm Đồng vâ rêm ngế ‘nâi, tá mâu kong pơlê ki ê pơrá ‘nâi troh ‘na khôi túa lĕm dêi hdroâng kuăn ngo tơná’’.