Kơxo lơ 1/7, Hô̆i đong kong pơlê Gia Lai (nếo) tơkŭm po Hneăng hôp má môi, hneăng hơnăm 2021 – 2026. Kố cho roh hôp ai kơnâ kal kí, tiô luât ƀă tơdroăng ki pêi khât kal khât, mơnhên troăng mơnhông tung tơdroăng mơjiâng kong pơlê Gia Lai (nếo), tơmiât troh la ngiâ mơnhông rĕng, krá tơniăn, xông râ kơpong ƀă Tơnêi têa.

Hô̆i đong kong pơlê Gia Lai (nếo) hneăng má XII ai 119 kăn teăng mâ. A roh hôp, Hô̆i đong kuăn pơlê kong pơlê hiăng tơbleăng Tơdroăng pơkâ dêi Vi ƀan Khu pơkuâ Kuô̆k hô̆i ‘na tơdroăng pơkâ rah xo mâu kăn pơkuâ Hô̆i đong kuăn pơlê kong pơlê.

Pơtối mê, pôa Rah Lan Chung, Phŏ Kăn pơkuâ hnê mơhno má môi Tỉnh ủy châ rah xo pro Kăn hnê ngăn Hô̆i đong kuăn pơlê kong pơlê Gia Lai (nếo) hneăng hơnăm 2021 – 2026; Pôa Trương Văn Đạt, Kăn cheăng tung Khu pơkuâ Tỉnh ủy ƀă jâ Huỳnh Thúy Vân, Tỉnh ủy viên châ pơkâ rah xo Phŏ Kăn hnê ngăn Hô̆i đong kong pơlê Gia Lai (nếo). Vi ƀan pơkuâ Kuô̆k hô̆i pơkâ rah xo jâ Đinh Ly An to pro Kăn pơkuâ ‘na luât; pôa Phạm Tấn Thành to pro Kăn pơkuâ cheăng kâ – Liăn ngân tơnêi têa; jâ Huỳnh Ngọc Hà to pro Kăn pơkuâ ‘na Khôi túa lĕm tro – Rêh ối pơlê pơla dêi Hô̆i đong kong pơlê Gia Lai (nếo) hneăng hơnăm 2021 – 2026.

Xông tơpui tơdah hnoăng cheăng, pôa Rah Lan Chung, Kăn hnê ngăn Hô̆i đong kuăn pơlê kong pơlê Gia Lai (nếo) tối ăm ‘nâi ƀă hnoăng cheăng châ pơcháu, pôa kô rak pêi tiô túa ton mâu tơdroăng châ tơƀrê dêi mâu hneăng hdrối, djâ tâi tâng ivá, tuăn ngôa rơkê ƀă hiâm mơno vâ pêi cheăng ăm kuăn pơlê, tơxâng cho ngế kăn teăng mâ kuăn pơlê rah xo, kêi đeăng lĕm tro hnoăng châ pơcháu.