Kơxo lơ 30/6, a Pơlê kong kân Hồ Chí Minh hiăng po Leh tơbleăng mâu Pơkâ, Pơkâ dêi Tơnêi têa ƀă kong pơlê ‘na ‘mot tơkŭm tíu pêi cheăng râ kong pơlê, râ cheăm, mơgêi tíu pêi cheăng râ tơring, mơjiâng khu tơrŭm cheăng Đảng, pơkâ thế râ Đảng, Hô̆i đong hnê ngăn, Vi ƀan hnê ngăn, Vi ƀan Măt trâ̆n tơnêi têa Việt Nam Pơlê kong kân Hồ Chí Minh, cheăm, bêng, kơpong.

Pơlê kong kân Hồ Chí Minh po rơdâ, tung mê ai Pơlê kong kân Hồ Chí Minh, kong pơlê Bình Dương ƀă kong pơlê Bà Rịa – Vũng Tàu. A rôh hôp, pôa Tô Lâm, Kăn xiâm pơkuâ hnê ngăn cheăng Đảng hiăng diâp pơkâ dêi Khu xiâm pơkuâ tơdroăng kal kí pơkâ thế pôa Nguyễn Văn Nên – ngế cheăng tung Khu xiâm pơkuâ tơdroăng kal kí, Kăn pơkuâ ngăn Đảng Pơlê kong kân Hồ Chí Minh pro kăn pơkuâ hnê ngăn Đảng Pơlê kong kân Hồ Chí Minh klêi tơkŭm môi.

Tơdrêng amê Khu xiâm pơkuâ tơdroăng kal kí pơkâ thế 4 ngế pro phŏ pơkuâ hnê ngăn Đảng Pơlê kong kân Hồ Chí Minh. Tơpui a rôh leh, pôa Tô Lâm, Kăn xiâm pơkuâ hnê ngăn cheăng Đảng tối rơdêi, rôh leh ôh ti xê cho tơdroăng ki kal ‘na cheăng, mê ối cho hvêa ki pơhlêh tơná tung la ngiâ, pâ thế kal tơdrăng dêi kuăn pơlê ƀă tơnêi têa tung mơjiâng mâu kơpong ivá mơnhông dêi tơnêi têa bă kơpong, vâ tơxâng ƀă tơdroăng púi vâ ‘Việt Nam khên tơnôu kro mơdrŏng mot tung hơnăm 2045”.