A roh hôp, Tỉnh ủy Dak Lak hiăng tơbleăng pơkâ mơjiâng Vi ƀan Séa ngăn Tỉnh ủy tiô tơdroăng tơmot chiâng môi Vi ƀan Séa ngăn Tỉnh ủy Dak Lak ƀă Phú Yên. Pôa Trần Trung Hiển, Kăn cheăng tung Khu pơkuâ tơdroăng cheăng Đảng ủy châ rah xo pro Kăn pơkuâ Vi ƀan séa ngăn Tỉnh ủy. ‘na tơkŭm po Đảng, Đảng ƀô̆ mâu kơ koan Đảng kong pơlê, hneăng hơnăm 2020 – 2025 châ mơjiâng, xua jâ Cao Thị Hòa An, Phŏ Kăn pơkuâ hnê mơhno má môi Tỉnh ủy, Kăn hnê ngăn Vi ƀan Hô̆i đong kuăn pơlê kong pơlê pro kăn pơkuâ hnê ngăn Đảng ủy. Pôa Tạ Anh Tuấn, Phŏ Kăn pơkuâ hnê ngăn Tỉnh ủy, Kăn hnê ngăn Vi ƀan kong pơlê châ pơkâ rah xo pro Kăn pơkuâ hnê ngăn Đảng ŭy Vi ƀan kong pơlê. Hlá tơbeăng ƀă Rơ’jíu – Um tơbi Dak Lak châ tơmot chiâng môi kơ koan, jâ Đào Phạm Hoàng Quyên to pro kăn rah chêh hlá tơbeăng.

Xông tơpui a roh hôp, pôa Nguyễn Đình Trung, Kăn pơkuâ hnê ngăn cheăng Đảng kong pơlê pơkâ thế mâu khu râ kăn pơkuâ hnê ngăn cheăng Đảng, khu cheăng Đảng ƀă kơ koan, tíu pêi cheăng tơkŭm pơtâng tối, môi tuăn hlê plĕng tung khu kăn ƀô̆, kŏng chưk, mơngế pêi cheăng ‘na troăng hơlâ tơmot chiâng môi khu pêi cheăng tơnêi têa, mơjiâng tơdroăng tơ’noăng khŏm mơ-eăm kêi đeăng hnoăng cheăng kal kí tung hneăng nếo.