Hlăm hdră êlan ngă bruă mơ̆ng kahan ksiêm čar Dak Lak kơ bruă rŭ mdơ̆ng 4.285 boh sang mđup brei kơ gŏ sang ƀun, gŏ sang dleh dlan, hluê hdră lăm lui sang dôk êjai, sang tĭ ƀrôč. Truh kơ ară anei kahan ksiêm čar Dak Lak rŭ mdơ̆ng leh mâo 3.014 boh sang, mâo hlăm brô 71% bruă knuă.Hlăm ênoh êbeh 3.000 boh sang dưi rŭ mdơ̆ng, dŭm anôk bruă kahan ksiêm ba jao leh 1.517 boh sang kơ mnuih ƀuôn sang dôk, mbĭt anăn dôk bi leh 676 boh sang čiăng lŏ ba jao hlăm hruê kăm anei.

Khădah klei kƀah hĭn mnơ̆ng yua mkŏ mkra, ƀiădah mâo klei nao hgŭm hrăm mbĭt leh anăn ktang phĭt, bruă msir lăm sang dôk êjai hluê si klei gĭt gai mơ̆ng Phŭn bruă kahan ksiêm ti Dak Lak ăt rơ̆ng djŏ hŏng hdră kčah, mĭn tĭng srăng bi leh jih hdră hlăm hruê 31/10/2025. Yap truh hruê 18/6, dưi rŭ mdơ̆ng hlăm brô 5.150 boh sang hŏng hdră lăm lui sang dôk êjai, sang tĭ ƀrôč mơ̆ng knŭk kna. Hlăm anăn, mâo 4.174 boh sang mrâo leh anăn 970 boh sang mkra mđĭ, dưi bi leh 3.025 boh sang ( mâo 2.182 boh sang mrâo leh anăn 843 boh sang mkra mđĭ). Čiăng dưi ngă mta kñăm bi leh bruă lăm lui jih jang sang dôk êjai, sang tĭ ƀrôč ti alŭ wăl čar, Dak Lak mĭn tĭng srăng rŭ mdơ̆ng mrâo leh anăn mkra mđĭ thiăm 2.150 boh sang mơ̆ng ară anei truh kơ jih mlan 10/2025.