Hruê mbruê (22/06) ti Anôk bruă Knŭk kna, Khua knŭk kna Phạm Minh Chính gĭt gai Klei bi kƀĭn tal 3 Anôk bruă gĭt gai Gưl dlông pŏk hdră msir lăm sang dôk êjai, sang tĭ ƀrôč hlăm kluôm ala čar. Klei bi kƀĭn tal 18 Anôk gĭt gai mơ̆ng Knŭk kna dŭm hdră bruă yuôm bhăn ala čar, hdră êlan klông dŭ mdiăng lehanăn Klei bi kƀĭn tal 2 mtrŭt mđĭ hdră mkăp ngăn prăk knŭk kna thŭn 2025.

Djŏ tuôm kơ bruă msir lăm sang dôk êjai, sang tĭ ƀrôč hlăm kluôm ala čar: Khua knŭk kna brei thâo, hdră kčah tal êlâo tĭng srăng ngă leh hlăm thŭn 2030, khă snăn, boh sĭt pŏk ngă, dŭm phŭn, dhar bruă, alŭ wăl mâo klei thâo săng, đua klam prŏng, boh nik hlăk ala čar mđing truh kơ Knăm bi hdơr 80 thŭn hruê mkŏ mjing Ala čar Việt Nam yang ƀuôn ngă phŭn, kyua anăn brei bi leh pral hdră bruă anei. Bi mni kơ dŭm phŭn, dhar bruă, alŭ wăl, anôk bruă duh mkra pŏk ngă bruă msir lăm sang dôk êjai, sang tĭ ƀrôč hlăm kluôm ala čar hlăm hruê 31/10/2025.  Hŏng bruă msir lăm sang dôk êjai, sang tĭ ƀrôč kơ mnuih mâo bruă tŭ dưn hŏng cách mạng, gĭr ktưn truh kơ hruê 27/7 thŭn anei srăng ngă leh bruă msir lăm sang dôk êjai, sang tĭ ƀrôč hŏng mnuih mâo bruă tŭ dưn hŏng cách mạng, gŏ sang kahan êka êkeh, djiê êngiă./.