Giăm êlan klah tlâo knhal tuč ƀuôn Trum, să Tâm Thắng, kdriêk Čư̆ Jŭt, jing sa boh sang mrâo prŏng 90m2 mơ̆ng Y-Tem Kpơr. Hlăm war sang, dŭm pruê̆ kphê mta mdah dôk ktrŏ boh. Y-Tem yăl dliê, gŏ sang ñu êlâo dih jing gŏ sang dleh dlan hĭn hlăm ƀuôn, hŏng 7 čô huă, hnư hrui wĭt knŏng knang kơ dŭm sao kphê leh anăn nao mă bruă arăng. Kyua mâo hdră ala čar kñăm bi hrŏ ƀun, prăk hrui wĭt leh anăn klei hdĭp gŏ sang ñu dưi mlih hlăm grăp hruê. Mơ̆ng akŏ thŭn 2022 truh kơ ară anei, gŏ sang ñu dưi mâo êmô mjeh, đru wĭt pla kphê, leh anăn giăm anei hĭn jing rŭ mdơ̆ng sang dôk. Jih jang jing leh boh kdrŭt kơ gŏ sang ñu kpưn đĭ:

“Êlâo dih ka mâo knŭk kna đru, klei hdĭp gŏ sang hmei dleh dlan, ăt dôk hlăm sang dôk êjai tôl sô. Ară anei tlaih ƀun, sang kâo mâo diñu đru brei 1 drei êmô mjeh 20 êklăk prăk leh anăn 70 êklăk prăk mdơ̆ng sang, ară anei amâo lŏ hĭu kơ jan mđiă, angĭn yan bhang, klei hdĭp hơĭt leh. Ară anei kâo rông êmô brei ñu lŏ mđai leh anăn pla kphê, ară anei gŏ sang kâo tlaih ƀun leh. Kâo lač jăk kơ Đảng leh anăn knŭk kna lu sơnăk.

Kbưi hŏng ƀuôn Trum kăn kbưi lei, Ƀuôn Ea Pô ăt dôk bi mlih grăp hruê kyua hdră êlan bi hrŏ ƀun. H’Buan Kbuôr, mơ̆ng gŏ sang ƀun hĭn hlăm ƀuôn, mâo klei đru mjeh êmô leh anăn 70 êklăk prăk mdơ̆ng sang, mbĭt hŏng klei gĭr mơ̆ng gŏ sang, ñu mâo leh sang dôk kjăp, hdră duh ƀơ̆ng hơĭt. Sang mrâo leh, êmô dôk kđông êđai, leh anăn hdră tlaih ƀun dưi kčưm mơ̆ng hdră êlan klă klơ̆ng mơ̆ng Đảng, Knŭk kna. H’Buan Kbuôr brei thâo

 “Sang kâo mâo 4 sao lăn leh anăn lŏ mưn thiăm 2 sào jing 6 sào, kyua amâo mâo boh ôh anăn yơh knŏng mâo mă 40 êklăk prăk. Êlâo dih gŏ sang dleh dlan ƀiădah mâo knŭk kna đru rŭ mdơ̆ng sang, ară anei klei hdĭp hơ̆ĭt. Kâo lač jăk lu.

Tâm Thắng jing să truăn ngă bruă lŏ hma, kbưi hŏng wăl krah Dak Nông hlăm brô 110km, mâo 15 alŭ, ƀuôn hŏng 1/3 mnuih ƀuôn sang jing mnuih djuê ƀiă. Trần Thế Quang – khua bruă Đảng să brei thâo, wưng thŭn 2021 – 2025, să dưi mkăp brei 3 êklai prăk mơ̆ng hdră bi hrŏ ƀun čiăng đru djŏ pô kơ sang dôk, mjeh mnơ̆ng rông, mnơ̆ng yua mkra mjing. Kyuanăn, hnơ̆ng gŏ êsei ƀun hrŏ mơ̆ng 5,3% adôk 1,9%, đru kơ să truh hnơ̆ng krĭng ƀuôn sang mrâo thŭn 2024 leh anăn jing gru mngač bi hrŏ ƀun krĭng tlaih kbưi. Trần Thế Quang kah mbha klei hriăm hlăm bruă tŭ mă ênoh prăk bi hrŏ ƀun mơ̆ng gưl dlông kơ alŭ wăl:

 “Hlăm klei ngă hdră, hmei bi myuôm bruă klam mơ̆ng êpul êya mnuih ƀuôn sang leh anăn kyua klei nao hgŭm mơ̆ng mnuih ƀuôn sang dưi dưn hdră đru. Hluê anăn, leh mnuih ƀuôn sang mă ênoh đru kơ knŭk kna, yua djpŏ hdră, dưi bi lar boh tŭ dưn. Êngao kơnăn, hmei ăt mđĭ hĭn bruă klam ktuê dlăng mơ̆ng mặt trận leh anăn êpul êya čiăng rơ̆ng kơ bruă hluê ngă hdră kñăm amâo mâo luč liê, srăng mkŏ mjing boh tŭ dưn klă sĭt.”

Hdră ala čar kñăm mđĭ kyar bruă duh mkra ala ƀuôn ti krĭng mnuih djuê ƀiă leh anăn krĭng čư̆ čhiăng, wưng thŭn 2021 – 2025, dưi hluê ngă ti kdriêk Čư̆ Jŭt, dưi ba wĭt boh tŭ dưn klei bi mlih jăk. Dŭm êtuh gŏ sang mnuih djuê ƀiă dưi đru kơ lăn dôk, lăn mă bruă, êa doh, sang dôk leh anăn hdră duh ƀơ̆ng…

Hŏng giăm 40 êklai prăk brei čan. Čư̆ Jŭt jing kdriêk ngă tŭ dưn hĭn, đru ba lu să truh hnơ̆ng krĭng ƀuôn sang mrâo. Hluê si Trần Mai Việt- k’iăng khua klam bruă djuê ana leh anăn klei đăo kdriêk Čư̆ Jŭt, hdră ala čar kñăm bi hrŏ ƀun srăng bi lar tŭ dưn hĭn êjai bruă sang čư̆ êa dua gưl dưi mă bruă. Gưl să srăng klă anăp kiă kriê, gĭt gai, ñĕ kơ klei lĕ hlăm lu anôk.

 “Êlâo dih mâo truh 10 hdră, mbha kơ lu anôk bruă hluê ngă, dleh ksiêm dlăng leh anăn kƀah klei hrăm mbĭt. Anăp anei jao kơ sa anôk srăng găl hŏn. Boh nik, srăng kơ klă anăp kơ gưl să, čiăng kơ mnuih ƀuôn sang dưi dưn klă anăp, nĕ kơ klei pluă wĭt pluă nao msĕ hŏng êlâo, ênưih tŭ mă leh anăn dưi bi lar hĭn boh tŭ dưn.”

Klă sĭt brei ƀuh, Hdră ala čar kñăm mđĭ kyar bruă duh mkra ala ƀuôn krĭng mnuih djuê ƀuiă leh anăn čư̆ čhiăng ti kdriêk Čư̆ Jŭt dưi leh anăn dôk ba wĭt boh tŭ dưn klă sĭt, dưi truh kơ mnuih ƀuôn sang adôk dleh dlan. Anei jing hdră êlan klă klơ̆ng, găl guôp, đru hlăm klei mđĭ kyar bruă duh mkra ala ƀuôn leh anăn bi hrŏ ƀun ti Dak Nông. Êjai bruă sang čư̆ êa dưl gưl bi leh, bruă hluê ngă hdră čiăng dưi kñăm hĭn čiăng mâo boh tŭ dưn klă sĭt, hluê si klei akâo mơ̆ng nah gŭ.