Hruê 7/5, ti ƀuôn hgŭm Ƀuôn Ama Thuôt, čar Dak Lak, Anôk bruă hâo hưn mtô mblang leh anăn čung ba mnuih ƀuôn sang gưl dlông bi hgŭm hŏng Phŭn bruă kahan ksiêm, Phŭn bruă djuê ana leh anăn klei đăo hŏng bruă Đảng čar Dak Lak mkŏ mjing klei bi kƀĭn ksiêm dlăng, pŏk ngă hră mơar mơ̆ng Anôk dlăng bruă Đảng kơ bruă djuê ana, klei đăo hlăm wưng mrâo.

Klei bi kƀĭn mđĭ klei thâo săng, bruă klam gưl bruă Đảng hlăm klei gĭt gai, ngă bruă djuê ana, klei đăo hŏng klei mđĭ kyar bruă duh mkra ala ƀuôn, rơ̆ng êđăp ênang lĭng kahan leh anăn krơ̆ng kjăp klei kđi čar. Blŭ hrăm gĭt gai, ve Phạm Tất Thắng, Khua hlăm bruă Đảng gưl dlông, K’iăng khua Anôk bruă hâo hưn mtô mblang leh anăn čung ba mnuih ƀuôn sang gưl dlông mñă klă, bruă djuê ana, klei đăo jing bruă phŭn, sui, đru mđĭ klei bi hgŭm jih jang djuê ana. Dŭm gưl, dhar bruă brei hnưm bi klă hdră ngă bruă sĭt, mđĭ lar bruă klam phung mâo kơhưm, phung dlăng bruă klei đăo hlăm klei čung ba mnuih ƀuôn sang.