Ară anei, jing wưng kdlưn hĭn mơ̆ng yan bhang Lăn Dap Kngư. Ti să Dak Mil, čar Lâm Đồng, klei êpa hmao kơ êa đĭ lu êjai đang kphê dưi pla mrâo hrô kơ đang ksu. Djăp bĭt hma mâo dŭm kbăng êa ktar, leh anăn êa mơ̆ng dŭm kbăng êa anei yơh čiăng đru dŏng đang plah mjing. Gŏ sang Triệu Cuối, ti alŭ 7, să Dak Mil, knŏng mâo mă 5 sào kphê ƀiădah duh leh êbeh 100 êklăk prăk čiăng ktar kbăng êa duah êa krih.

Ti să Dak Mil, ktar kbang êa amâo djŏ jing klei ruah, knŏng ktar kbăng êa yơh jing êlan čiăng rơ̆ng kơ ana pla mjing dưi hdĭp găn yan bhang. Êjai hnoh êa khuôt, êa gŭ lăn yơh jing klei hmăng hmưi knhal tuč. Ayŏng Triệu Khương tuôm nao mă bruă mưn kơ êpul ktar kbăng êa, leh anăn čŏng blei măi ktar čiăng hiu ktar. Ƀiădah truh kơ yan bhang anei, wăt kơ phung hiu duah êa kăn lŏ mâo êa yua lei.

“Êlâo dih kâo nao mă bruă mưn kơ arăng, ƀiădah ƀuh amâo lŏ tŭ dưn ôh, kyuanăn kâo blei măi ktir, čŏng ktir. Êdei anei nao duah êa kơ mnuih ƀuôn sang leh anăn ktir leh 30 - 40 kbăng êa. Ƀiădah alŭ wăl anei dleh mâo êa, ktir 10 ƀăng 6 ƀăng amâo mâo êa. Msĕ sang kâo ăt sơnăn mơh. Mtrŭn pŏm êa bhiâo hlŏng khuôt yơh”.

Klei khuôt êa kbăng grăp thŭn ƀrư̆ kjham ti Lăn Dap Kngư. Nguyễn Thị Trinh ti să Dak Sắc, čar Lâm Đồng čhĭ leh 3ha hma leh ktar 8 boh kbăng êa ƀiădah kăn djăp êa krih. Gŏ sang nao đuê̆ dôk anôk mkăn, hmăng hmưi mâo djăp êa hĭn. Ƀiădah grăp blư̆ mĭn kơ klei ktar êa, ñu ăt ƀuh klei hŭi.

“Sang riêng gah hma ăt jĕ mơh. Ƀiădah ktir 4 boh kbăng êa leh kăn mâo êa lei. Anôk anăn dlăng dlưh pô srăng hrô đĭng. Truh kơ amâo mâo êa ăt tla prăk kơ phung ktir, bi đĭng pô hrô leh si thâo lŏ mă”.

Amâo djŏ knŏng anôk čư̆ bi tiŏ êran ktar kbăng êa, ƀiădah ti dŭm kdrăn lŏ prŏng ăt msĕ mơh. Ngô Văn Sình ti să Ea Rôk, čar Dak Lak brei thâo, êlâo dih ktir kbang êa êlam mă 40m, bi ară anei êlam truh 140m kơ knŏng djăp êa yua.

“Pô ktir mơ̆ng êlâo truh kơ ară anei mâo 7 boh leh. Êlâo dih pô ktir mă 34m êa kăn khuôt lei. Ară anei hlei ktar êlam pô anăn dưi pom êa sui. Mâo sang ktar truh 4 boh kbăng êa leh, boh tal 4 kăn mâo êa lei, êlam truh 140m.

Hluê si phung čhĭ mnia đĭng êa leh anăn kdrăp krih êa, klei bi tiŏ êran ktir êa ară anei amâo mâo mjưh ruĕ. Pô sang čhĭ đĭng êa brei thâo, dŭm măi ktir êa ênuk hdăp ară anei lui hơăi mang kyua êa hrŏ êlam, mnuih ƀuôn sang lŏ duh bi liê blei măi ktar hŏng êwa.

"Sitôhmô msĕ hŏng sang riêng gal êlâo dih ktir kbang êa 100m dôk yua hơĭt. Ƀiădah giăm anăn mâo sang ktir êlam truh 130 - 140m, sang anei hlŏng luč êa hlao. Leh anăn truh ară anei mâo sang ba mă êwa wĭt ktir 240m, bi dŭm kbăng êa djiêo gah srăng khuôt êa yơh”.

Dŭm êtuh ha ana pla mjing dôk guôn êa, bruă ktir êa ti Lăn Dap Kngư grăp thŭn ƀrư̆ êlam hĭn, mơ̆ng ti gŭ 40m, ară anei truh leh 240m leh anăn ka mdei mơh. Êjai kbăng êa êdei êlam hĭn kơ kbăng êa êlâo, êa gŭ lăn hrŏ nanao. Boh jhat amâo djŏ knŏng ênoh kbăng êa đĭ, dŭm đang pla mjing lŏ êpa hmao kơ êa, dŭm ênoh duh bi liê luč hơăi mang, ƀiădah đa đa anôk đĭng ktir êgao hnơ̆ng ti gŭ lăn, hưn kơ anôk anăn dôk mâo klei čhuăk kjham. Tơdah klei bi tiŏ êran ktiê kbăng êa amâodưi ksiêm dlăng, Lăn Dap Kngư amâo djŏ knŏng tlă anăp hŏng klei kƀah êa kjham, ƀiădah lŏ tuôm hŏng klei amâo mâo jăk dleh ksiêm dlăng./.