Riân troh apoăng hơnăm 2025, ƀăng tơnêi pêt priât a kong pơlê Gia Lai châ 7.300 ha, priât gá châ dâng 237.000 tâ̆n. Kŏng ti tơlo liăn pêi chiâk deăng xúa kơmăi kơmok chal nếo Hưng Sơn dế pêt lối 550 ha priât a mâu tơring Đăk Đoa ƀă Čư̆ Prông, kong pơlê Gia Lai. Rêm hơnăm, kŏng ti tê dâng 20.000 tâ̆n priât ngi mâu kong têa ki kân môi tiah Nhuk ƀă Hàn Quốc. Tiô tối hdrối, kơxô̆ priât hơnăm kố ƀă hơnăm la ngiâ kô tâk troh 35.000 tâ̆n. Pôa Nguyễn Quang Anh, Kăn hnê ngăn Hô̆i đong quản trĭ kŏng ti, ăm ‘nâi kơnôm ing xúa kơmăi tôh lo i ia dêi Israel, xúa drone rak ngăn drong kâ ‘nhiê ƀă hnôu ki pro hngíu, priât dêi Kŏng ti hiăng châ tê tung kơchô tê mơdró ki xơpá.

“Kơpong tơnêi khêi bazan gá tơtro khât ƀă priât, priât pro pơxúa tơƀrê khât, tâng pro pơxúa ‘na liăn ngân hên mê athế ai mâu troăng hơlâ, mâu túa pơkâ pêi ki nhên, athế pêi kơtăng, athế séa ngăn hbrâ mơdât pơreăng kâ ‘nhiê, tơdroăng ki xông kân dêi xiâm priât. Nôkố ngin dế lăm ngi kong têa Hàn Quốc, Nhuk, Sinuâ ƀă Trung Đông, Krê 4 to kong têa kố xuân ôh ti bê priât vâ tê”.

Tung lâp kong pơlê Gia Lai hiăng tơ’mot châ 50 tơdroăng tơkêa pêt ƀă túa pơkâ pêt lối 8.500 ha, tâi tâng kơxô̆ liăn ‘no lối 10.000 rơtal liăn. Tung mê, Grup pơkuâ Hoàng Anh Gia Lai hiăng veăng pêt mơnhông ki kơnía dêi hdrê loăng plâi kâ. Nôkố grup dế mơnhông kơpong pêt priât dâng 7.000 ha a Gia Lai, Lếo ƀă Kul. Pôa Nguyễn Ngọc Mai, Kăn pơkuâ Kŏng ti Tơlo liăn păn mơnăn mơnoâ Gia Lai (ối tung Grup pơkuâ Hoàng Anh Gia Lai), ăm ‘nâi, ƀă tơnêi tơníu tơtro, priât dêi kŏng ti gá dâi lĕm khât.

“Kơpong pêt priât Nam Mih dêi kŏng ti ối tung kơpong tơnêi khêi bazan ‘ngêi tâ tâng vâ pơchông ƀă kơdró têa kơxĭ cho 800m gá pro tơ’lêi hmâ ăm xiâm priât chà Nam Mih. Xua ki lĕm, ki xŏn ƀă hâi khế ối rêh dêi priât ton mê ki dâi lĕm dêi xiâm priât tâng pơchông ƀă mâu kơpong ki ê cho xoưn tâ”.

Nôkố, priât dêi Gia Lai nôkố hiăng châ tê a hên kơchô tê mơdró ki xơpá môi tiah Nhuk, Hàn Quốc, Trung Đông ƀă hên ki ê ăm hlo ivá tơbriât ƀă ki dâi lĕm châ tiô púi vâ dêi mâu kong têa tung lâp plâi tơnêi pơkâ. Jâ Đào Thị Thu Nguyệt, phŏ kăn pơkuâ Khu ngăn kơmăi kơmok ƀă tê mơdró kong pơlê Gia Lai, tối rơdêi:

“Trâm ƀă kế tơmeăm priât nôkố dế rế hía rế tối rơdêi ki dâi lĕm ƀă inâi priât dêi Tây Nguyên tối tơdjuôm ƀă Gia Lai tối krê. Nôkố, kơchô tê mơdró dêi Gia Lai hiăng pơxiâm mơjiâng kơvâ priât, tí tăng tơ’nôm mâu kong têa ki roê xo priât vâ po rơdâ, tăng kơchô tê mơdró”.

Bă ki pơxúa ai xêh ƀă troăng pơkâ pêi mơnhông pêi chiâk deăng xúa kơmăi kơmok chal nếo, priât dế rế hía rế tối rơdêi tíu ối cho tơmeăm pêi lo ing chiâk deăng tê ngi kong têa ki kal dêi Gia Lai.  Tơdroăng ki ‘no liăn pro hngêi troăng klông rak vế tơniăn, po rơdâ tíu tơrŭm ƀă mơdêk ivá châ mot tê tung mâu kơchô tê mơdró ki xơpá kô cho tơdroăng ki kal gum kơvâ priât mơnhông tơniăn, veăng gum kơhnâ tung tơdroăng mơnhông cheăng kâ pêi chiâk deăng, mơnhông thôn pơlê dêi kong pơlê.