Châ 2 pri Hlá tơbeăng kong pơlê Dak Lak ƀă môi pri Hlá tơbeăng Tây Nguyên tung khế 6, hdrối mê cho châ 4 pri ‘na mơjiâng Đảng ƀă hriâm tâp ƀă pêi tiô rơkong Pôa Hồ châ diâp apoăng hơnăm, nâ H’Kim Phúc Êban, ngế kơdrâi chêh hlá tơbeăng hơnăm ối nếo hdroâng kuăn ngo Rơđế, dế pêi cheăng a Hlá tơbeăng Dak Lak pơtối châ kâ pri tung khu chêh hlá tơbeăng ƀă mâu ƀai chêh ‘na khôi túa lĕm tro.

H’Kim Phúc tối, chêh ‘na đê tai khôi túa lĕm tro, rêh ối pơlê pơla ƀă vêa vong dêi kuăn pơlê hdroâng kuăn ngo pro nâ hâk vâ ‘nâng sap ing mâu hâi apoăng pơxiâm pêi cheăng chêh hlá tơbeăng. Lối 12 hơnăm chêh hlá tơbeăng, ki tơ’lêi hlâu ‘na nâl tơpui kum nâ châ achê ƀă chêh mâu đê tai tơ’lêi hlâu tâ, ing mê ai mâu ƀai chêh ƀă ing mâ ngăn ki nếo, kum vâi krâ kuăn pơlê tối dêi tơdroăng ki ‘’tung hiâm mơno’’ tung roăng ƀă rak vế khôi túa lĕm.

‘’Cho môi ngế chêh hlá tơbeăng hdroâng kuăn ngo mê á xuân hmâ lăm a mâu pơlê. Hlê plĕng khôi túa lĕm tro dêi vâi mê á xuân tơ’lêi châ achê tâ, tơ’lêi tơpui tơno tâ, ing mê kuăn pơlê vâi xuân tối dêi tơdroăng ki tơná tơmiât, pói vâ xuân môi tiah khôi túa lĕm tro dêi vâi. Ing mâu ƀai chêh mê á xuân pói vâ mơdêk hlê plĕng hên tâ nếo ăm kuăn pơlê tung tơdroăng rak vế khôi túa lĕm tro, vêa vong dêi hdroâng kuăn ngo tơná, djâ troăng ahdrối mâu ngế ki má môi tung pêi kâ, pêi cheăng lĕm tung pơlê pơla, tơdjuôm ivá mơjiâng tơdroăng rêh ối pơlê rế hía rế mơnhông mơdêk tâ’’.

Rơtế ƀă H’Kim Phúc, a Hlá tơbeăng Dak Lak, nâ Nguyễn Hương Quỳnh xuân cho môi ngế chêh hlá tơbeăng ki hmâ ƀă mâu đê tai ‘na khôi túa lĕm tro. Lối 8 hơnăm hiăng hluâ, nâ hiăng veăng rah chêh, chêh hên tơdroăng khôi túa lĕm tro mâu hdroâng kuăn ngo ƀă châ hên pri hlá tơbeăng. Nôkố, nâ ối pêi chêh 2 chuyên đê ‘na khôi túa lĕm cho Mơngiơk tơdroăng rêh ối ƀă Túa rêh ối Tây Nguyên, mơ’no rêm hneăng rêm khế môi kơxô̆. Ki tơ’lêi hlâu xua chiâng rah chêh ƀă pơchuât ƀai dêi tơná a kơmăi xup um, thâu hrik, mâu ƀai chêh dêi nâ ai tơdroăng ki pơhlêh nếo, pro chiâng phá tơ-ê.

Tiô nâ Quỳnh, xua ing tơdroăng ki hên mơngiơk khôi túa lĕm tro dêi 49 hdroâng kuăn ngo rêh ối a Dak Lak hiăng mơjiâng ivá ó rơdêi, thăm prôk trâu ti tăng plĕng nâ thăm tâ hlo mâu đê tai ki má môi.

‘’Drêng troh a mâu pơlê vâ chêh, mot tung tơdroăng rêh ối dêi kuăn pơlê mâu hdroâng kuăn ngo, á ai hên tơdroăng ki châ tâ, ƀă tơmiât tung hiâm mơno mơnê hên cho á hiăng rah xo tro tơdroăng cheăng. Drêng pêi ‘na mâu đê tai môi tiah mê hiăng pro á hâk vâ hên tâ ƀă tâ hlo khôi túa lĕm cho lĕm ‘nâng, kal pơtối tơbleăng, pơtâng tối vâ ăm mâu rơxông hdrối kô pơtối hnê ăm rơxông kơ’nâi roăng rak ƀă mơnhông. Ƀă khôi túa lĕm cho tơnêi têa, ối xiâm rêi’’.

Tâ ing tơdroăng ki ai khât nôkố xuân cho troăng pêi ki nâ Nguyễn Thảo, ngế chêh hlá tơbeăng Tiền Phong, Ƀơrô teăng mâ a Tây Nguyên, păn tơdroăng ki tâ rơrêk tung hiâm mơno ăm rêm ƀai chêh ‘na khôi túa lĕm tro. Nâ hơ’muăn, vâ chê 10 hơnăm  pêi cheăng chêh hlá tơbeăng, nâ ôh tá kâi riân tâi mâu roh prôk a toăng rơxế honđa, tơkâ hluâ chât, hrĭng km lăm a mâu thôn pơlê kơpong hơngế hơngo dêi kong pơlê Dak Lak ƀă Dak Nông vâ trâm kuăn pơlê, ngê̆ nhân.

Rêm roh prôk kum mâ tâ ki rơrêk tung hiâm mơno a ngiâ kong mê, kơpong tơnêi ƀă tơdroăng ki tá hiâm mơno dêi mâu ngế ki ai ti lâi mơhno ti mê. Vâi ối rak mâu ki kơnâ khôi túa, vêa vong vâi krâ nah tung tơdroăng rêh ối rơxông nếo, vâ mơjiâng môi pơlê pơla ƀă hên khôi túa lĕm ki má môi.

‘’Chêh ‘na tơdroăng ki lâi mê pin xuân thế lăm a pơlê mê nếo ai tơdroăng vâ chêh dêi tơdroăng rêh ối. Laga ƀă khôi túa lĕm – tối cho ki phá tơ-ê, bu ai mâu ngế ai tuăn vâ păng ‘nâng ƀă hâk vâ nếo mơ-eăm vâ ti tăng plĕng, châ tâ châ ‘nâi ing rơkong hơ’muăn, ngiâ mâ lơ ing hiâm mơno dế ngế ki pin vâ chêh, rêm tơdroăng. Thế hâk vâ drêng mê nếo tâ  mâu ngế ki vâi dế rak vế ƀă rak ‘măn khôi túa lĕm tro klêi mê ing mê kô pơtroh troh mâu ngế ki ê’’.

Ôh tá xê pơtroh tơdroăng nếo ai, mâu ngế chêh hlá tơbeăng chêh ‘na khôi túa lĕm tro ối rak mơjiâng ƀă mơnhông khôi túa lĕm tung pơlê pơla. A Dak Lak, tíu tơkŭm khôi túa lĕm dêi 49 hdroâng kuăn ngo, mâu ngế chêh hơnăm ối nếo dế pik tơ’nôm mâu mơngiơk tơdroăng rêh ối a um khôi túa lĕm Tây Nguyên.  Ƀă tơdroăng ki hâk vâ ƀă ki khên tơnôu tơdroăng cheăng dêi tơná, mâu ngế kơdrâi chêh hlá tơbeăng dế troh lâp lu mâu ki kơnâ tơtro, kum mơdriu hlê plĕng rak vế khôi túa lĕm hdroâng kuăn ngo, rak mâu ki kơnâ krá dêi pơlê pơla.