Djâ troăng lĕm ahdrối, prôk hdrối tung mơnhông cheăng kâ, đảng viên Tòng Văn Lải, chi ƀô̆ pơlê Co Phung, cheăm Hua La, pơlê kong kơdrâm Sơn La, kong pơlê Sơn La rah xo túa pêt kơphế, păn ro chu í pêap vâ pro túa ki mơnúa păn ăm kuăn pơlê troh hriâm, hlối mơnhông cheăng kâ tung rơpŏng hngêi.

Kơnôm xúa khoa hok kih thuât mê cho rơvât phon, hngêi tơkâng tro rơnó mâu loăng plâi ki pêt; pâk vắc xin ƀă mơdêk tŭm trếo kơhiâm ăm mâu ro chu í pêap ki păn, troh nôkố, túa cheăng kâ po rơdâ 1,5 ha dêi rơpŏng hngêi rêm hơnăm tê châ lối 40 to chu; 15 tâ̆n kơphế drêh klêi krí, hiăng riân krê tâi tâng kơxô̆ liăn ‘no rôe phon, pơkeăng, mơhá vâi pêi cheăng, ối châ xo dêi rơkâ 300 rơtuh liăn.

Đảng viên Tòng Văn Lải tối, ing tơdroăng pêi cheăng ăm hlo tơƀrê dêi túa pêi cheăng ki mê, tơná ngoh đi đo veăng kum, kơjo kum ăm mâu rơpŏng tung pơlê, tung cheăm hnê vâi ‘na kih thuât pêt loăng plâi, păn chu í pêap vâ mơnhông tung pêi cheăng pơ’lêh hdrê loăng pêt, mơdêk pê lo liăn:

“A xuân mơhnhôk ngoh o tiô tơná, pin pêi ki klâi thế vâi pêi ƀối. Ngoh o ki lâi ôh tá ai liăn mê a xuân ăm mung, môi tiah vâ rôe chu păn, lơ ro păn mê a xuân veăng tơlo liăn ăm mâu ngoh o”.  

Pêi pro tơdroăng mơjiâng thôn pơlê nếo, chi ƀô̆ pơlê Co Phung, cheăm Hua La, pơlê kong kơdrâm Sơn La, kong pơlê Sơn La hiăng mơhnhôk mâu rơpŏng kuăn pơlê tơkŭm tơpui tơno, môi tuăn tơkŭm pêi cheăng tơƀrê mâu pơkâ, malối tơdroăng pro troăng prôk tung pơlê, pơtối rak khu tơrŭm cheăng pơla mâu tôh rak ngăn kring tơniăn, mơjiâng tơdroăng rêh ối tiô túa lĕm tro nếo...

Sap hơnăm 2021 troh nôkố, chi ƀô̆ pơlê hiăng mơhnhôk thế kuăn pơlê veăng tơlo liăn châ 650 rơtuh liăn, pleăng lối 500 met karê tơnêi, vâ chê 2.000 hâi pêi cheăng; hên rơpŏng hngêi hiăng hbrâ, ‘mâi hơ’lêh, têa tah dêi hngêi pro tíu ê  xua tíu ki mê vâ pro 1,6km troăng bê tong; 4km tơnêi pro troăng tung pơlê, pơxúa ăm tơná kuăn pơlê prôk lăm tơ’lêi chơ tơmeăm, lăm tê mơdró. Jâ Lèo Thị Tiển, Khu rơpŏng hngêi rêh ối a chê dêi rơpó rak ngăn dêi kơxô̆ 5, pơlê Co Phung ăm ‘nâi:

“Hdrối nah troăng prôk kŭn, hâ ho, nôkố châ Tơnêi têa pro nếo ăm kuăn pơlê tơ’lêi hlâu prôk lăm, rơpŏng hngêi xuân vâ môi tuăn drêng thế klâ tah dêi môi to trăng hngêi dêi tơná”.

Tiô pôa Lò Văn Hội, Ngế pơkuâ chi bộ, ngế pơkuâ pơlê Co Phung tối, vâ chê 10 hơnăm hdrối, chi ƀô̆ tối mâu tơdroăng kal pêi tơƀrê, mê cho: Mơnhông tơƀrê tơdroăng tơkŭm hôp, pêi cheăng dêi chi ƀô̆; pơ’lêh nếo troăng hơlâ pơkuâ hnê; mơnhông tơdroăng rêh ối túa lĕm tro a kơpong kuăn pơlê ối; hnê mơhnhôk kuăn pơlê pơ’lêh hdrê pêt, mơnăn păn tơtro... troh nôkố, pơlê ai 240 rơpŏng, lối 1.100 pơ’leăng mâ mơngế, tung mê, bú ai 5 rơpŏng vâ chê kơtiê, ôh tá ai rơpŏng kơtiê; pê lo liăn châ 50 rơtuh liăn/ngế/hơnăm; tung pơlê hiăng hlo ai mâu túa pêi cheăng kâ châ xo hrĭng rơtuh liăn/hơnăm:

“Tung la ngiâ, chi ƀô̆ xuân môi tiah mâu đảng viên kô pơtối hriâm tiô troăng ki lĕm, túa cheăng Hồ Chí Minh, mơhnhôk kuăn pơlê pơtối mơnhông cheăng kâ, mơgrúa hyôh kong prâi, mơnhông thôn pơlê cheăng kâ rêh ối tiô túa nếo. Tơkŭm mơnhông cheăng kâ tung rơpŏng hngêi, xúa khoa hok kih thuât, păn chú í pêap, pêt mâu hdrê loăng plâi kâ ki kơnâ liăn’’.

Pôa Lò Văn Chính, Kăn hnê ngăn đảng ủy cheăm Hua La, pơlê kong kơdrâm Sơn La ăm ‘nâi, pêi pro tiô pơkâ kơxô̆ 05 dêi khu xiâm kal kí, chi ƀô̆ pơlê Co Phung hiăng xoăng đảng viên tăng ngăn pêi tro tiô pơkâ dêi chi ƀô̆, pơkuâ tơdroăng cheăng tơbleăng a mâu khu,  a mâu tíu ai kuăn pơlê ối. 40 ngế đảng viên tung Chi ƀô̆ xuân cho kuăn ngo Thái, đi đo djâ troăng ahdrối pê klêi hnoăng cheăng châ pơcháu, pêi tơniăn hnoăng cheăng pơkuâ hnê dêi Chi ƀô̆, mâu tơdroăng cheăng dêi pơlê, mâu khu tơrŭm cheăng xuân châ pơtối pêi ƀă pêi tro tiô  pơkâ:

“Malối cho mâu đảng viên tung Chi ƀô̆ hiăng ai hnoăng cheăng pêi  tơkŭm  tơbleăng troh mâu Khu rơpŏng hngêi rêh ối a chê dêi rơpó xuân môi tiah tíu a tơná ối ‘na troăng rơhlâ, luât pơkâ dêi Đảng, luât Tơnêi têa, malối cho tơdroăng pơkâ dêi chi ƀô̆ tơbleăng pêi rêm khế ‘na mơnhông cheăng kâ rêh ối pơlê pơla, xuân môi tiah tơdroăng rêh ối dêi kuăn pơlê. Ing mê, kuăn pơlê hlê, klêi mê rơtế ƀă dêi rơpó môi tuăn, mơjiâng, tơbleăng mâu troăng rơhlâ, luât pơkâ pro ti lâi vâ mơnhông tơdroăng rêh ối tơmeăm khoăng, tuăn ngôa dêi kuăn pơlê’’.

Hriâm ƀă pêi pro tiô Pôa ƀă mâu tơdroăng cheăng pêi nhên khât, ai pơxuá, pơtối rak vế ki tơrŭm môi tuăn hơ-ui kum dêi rơpó, kơhnâ tung pêi cheăng vâ pêi lo tơmeăm, pơlê Co Phung hiăng ƀă dế pơ’lêh tơrêm hâi, ngiâ méa thôn pơlê rế tơƀrê; mâu túa tơlá ton nah ôh pá tro tung xo ong mế, mơdâm kiâ xuân hiăng tah lôi; hên túa lĕm tro mâu hdroâng kuăn ngo châ rak vế.  Mâu mơnê tung hên hơnăm, chi ƀô̆ pơlê Co Phung chiâng chi ƀô̆ ki kơhnâ dêi pơlê kong kơdrâm Sơn La.