Nâ H’Đàn Niê, đảng viên (45 hơnăm, kuăn ngo Rơđế) ối a buôn Sút Hluốt,  cheăm  Čư̆ Suê, tơring Čư̆ Mgar, nếo pơtối châ pôk pro Kăn pơkuâ hnê ngăn Chi ƀô̆ pơlê hneăng hơnăm 2025 - 2027. Nâ H’Đàn tối, kố cho hâk tơngăm, ki rah xo dêi đảng viên tung pơlê, la ‘nâi hnoăng cheăng pêi tơná tung hơnăm pơ’lêh nếo nôkố. Pakĭng hâi khế rak ngăn 1,2 ha chiâk kơphế, tiu, mâu hâi ki kố, nâ rơtế ƀă mâu kăn bô̆ cheăm, thôn lăm pôu tơrêm toăng hngêi tơmâng xo tơdroăng hnê tối ‘na tơdroăng ‘mâi hơ’lêh Luât, tối nhên troăng hơlâ dêi Đảng, Tơnêi têa vâ kuăn pơlê hlê ƀă môi tuăn ‘na tơdroăng tơ’mot cheăm, tơ’mot kong pơlê.

Mâu hâi ki kố, nâ rơtế ƀă mâu kăn ƀô̆ thôn hdrối nah lăm pôu tơrêm toăng hngêi tơmâng xo tơdroăng veăng hnê khĕn ‘na ‘mâi rơnêu luât, tối nhên troăng hơlâ dêi Đảng, Tơnêi têa troh kuăn pơlê hlê ƀă môi tuăn ‘na tơdroăng tơ’mot cheăm, tơ’mot kong pơlê, ôh tá ối râ tơring. Nâ H’ Đàn ăm ‘nâi:

“Á hiăng lăm pôu tơrêm rơpŏng tung pơlê hnê, tối nhên ‘na tơdroăng tơ’mot cheăm, mơjiâng ƀă troăng hơlâ ki nếo. Nôkố pơtối hnê kuăn pơlê ‘na tơdroăng ‘mâi rơnêu Luât, vâ rêm ngế hlê nhên troăng hơlâ tro, tơtro ƀă mơnhông cheăng kâ dêi tơnêi têa tung pơla nôkố”.

Đảng viên hơnăm ối nếo H’Wêm Aliô, ối a ƀuôn Sut Hluốt, cheăm Čư̆ Suê ăm ‘nâi,  nâ H’Đàn Niê cho xiâm ki tơmiât pêi ƀă ngế ki djâ troăng pêi hơhnâ vâ mâu vâi o hơnăm ối nếo pêi ƀối:

“Nâ H’Đàn tơbleăng tơná ăm Đảng ƀă klêi mê châ mot, nôkố cho đảng viên ki dế hbrâ. Tâi tâng kơnôm a tơdroăng veăng kơjo kum, hnê khât tá tuăn hiâm dêi nâ H’Đàn Niê. A kô mơ-eăm pêi cheăng mơnhông cheăng kâ vâ ai kơxô̆ liăn pêi lo hên tâ, tơniăn tơdroăng cheăng pêi a cheăm, a pơlê”.

A ƀuôn Sŭt Mđưng, cheăm Čư̆ Suê, tơring Čư̆ Mgar, đảng viên H’Đao Êban (38 hơnăm, kuăn ngo Rơđế) xuân nếo châ pôk pro Kăn pơkuâ hnê ngăn chi ƀô̆. Hdrối nah xo pêi hnoăng cheăng pro Kăn pơkuâ hnê ngăn chi đoân, Kăn pơlê, nâ hlê mâu tơdroăng ki xơpá,  ƀă tăng tơdroăng veăng kum kuăn pơlê mơnhông tơƀrê. Hơnăm 2018, nâ hiăng mơjiâng Kâu lak ƀô̆ teăn hmôu buôn Sŭt Mđưng, tơ’mot 35 ngế kơdrâi veăng teăn.

Kơnôm pơtối rak ki tơniăn, mâu ngế ki teăn pêi lo liăn 3 troh 6 rơtuh liăn rêm khế. Tơdrêng amê, nâ ối tơrŭm ƀă mâu Kăn ƀô̆ ngăn túa lĕm tro dêi cheăm mơjiâng khu tŏn chêng  ƀă lối 15 ngế, ki hmâ lâm mơđah tŏn chêng ăm kuăn pơlê ngăn. Nâ H’Đao, Kăn hnê ngăn Chi ƀô̆ tối:

 “Á krếo djâ vâi nâ o, mâu kơnóu ƀă mâu meh, miê, nâ, tăm, xăng tung pơlê khên tơnôu mơjiâng Kâu lăk ƀô̆ teăn hmôu ƀă khu tŏn chêng. Rêm ngế veăng. Á púi vâ tiah kố, ing mâu tơdroăng cheăng kố, túa lĕm tro Rơđế dêi ngin kô pơtối châ rak vế ƀă tơbleăng troh ăm mâu rơxông ối nếo’’.

Cheăm Čư̆ Suê, tơring Čư̆ Mgar ai lối 220 ngế đảng viên, tung mê ai 71 ngế đảng viên cho kuăn ngo, rêh ối a 2  Chi ƀô̆ thôn mơngế Dao ƀă 4 Chi ƀô̆ pơlê mơngế Rơđế. Tung mê, ai 2 ngế kơdrâi Kăn pơkuâ hnê ngăn chi ƀô̆ kuăn ngo Rơđế cho nâ H’Đàn Niê prế nâ H’Đào Êban. Pôa Phan Xuân Lực, Kăn hnê ngăn Đảng ủy cheăm Čư̆ Suê tối ‘na péa ngế kơdrâi kăn pơkuâ hnê ngăn đi đo pơtối rak vế hnoăng pêi pro ki tro dêi đảng viên ki prôk hdrối, kuăn pơlê tiô kơ tơdroăng ’nâi, môi tiah rơkong dêi Pôa Hồ hnê.

“H’Đàn Niê nâ kố rơkê ngăn mâu tơdroăng vâ pêi, hnê mơhnhôk kuăn pơlê xúa tơdroăng ki rơkê khoa hok kih thuât tung păn mơnăn, pêt loăng plâi kâ, pêt kêt kơphế, tiu ƀă mâu loăng plâi kâ ki ê kơnâ liăn. Ƀă nâ H’Đào Êban, kố cho tơdroăng hâk vâ pơtối rak túa lĕm tro. Nâ hiăng mơhnhôk kuăn pơlê pơtối rak cheăng teăn hmôu, mơjiâng khu tŏn chêng kơhnâ hriâm tŏn tơrŭm krá ƀă dêi rơpó, ing mê vâ pơtối rak túa lĕm tro, tơdroăng rơngêi, ting ting dêi kuăn ngo Rơđế a kong pơlê. Vâi xuân cho mâu kăn hnê ngăn chi ƀô̆ kơhnâ rơkê dêi pơlê ƀă cho tíu ki tơdjêp pơla Đảng ƀă kuăn pơlê”.

Ƀă mơngế Rơđế, vâi kơdrâi ôh tá xê to ngế ki rak on tung rơpŏng hngêi mê ối cho ngế ki rơdêi tơbleăng lâp lu a pơlê. Mâu ngế Kăn pơkuâ hnê ngăn chi ƀô̆ môi tiah nâ H’Đàn Niê, H’Đao Êban cho ngế ki rơdêi hnê mơho ăm tơdroăng mơnhông cheăng kâ - pơlê pơla, pơtối rak túa lĕm tro dêi kuăn ngo ăm pơlê rế ton rế kro mơdrŏng.