Lâp tung kong pơlê Dak Lak ai 33 tíu tơ’noăng, ƀă lối 22.500 ngế hok tro. Kơvâ ngăn hnê hriâm ƀă hnê mơjiâng tuăn ngôa rơkê kong pơlê tơrŭm ƀă mâu kơvâ cheăng tơbleăng mâu troăng hơlâ tơniăn, pro tơ’lêi hlâu ăm hok tro tung plâ pơla tơ’noăng, malối cho hok tro kơpong hơngế hơngo, kơpong xơpá lơ ai tơdroăng xơpá. Tơdroăng “ Kum rơnó tơ’noăng’’ a Dak Lak châ tơkŭm po ƀă veăng ai lối 1.000 ngế droh rơtăm pleăng hnoăng tơná.

Mâu ngế pleăng hnoăng tơná hiăng kơhnâ veăng pêi mâu tơdroăng, mê cho: Hnê tối, hnê ăm mâu hok tro tăng veăng tơ’noăng, pro hlá mơ-éa vâ tơ’noăng; ăm vâi têa ôu, hbru tơmeăm, tơkôm ƀă ngăn tơmeăm mâu hok tro tê kơtê; kum ăm mâu tơmeăm xúa tung hriâm... Tơdrêng amê, veăng rak tơniăn troăng prôk a mâu tíu gak ngăn ƀă mâu tíu tơ’noăng.

Pakĭng mê, tơdroăng kố hiăng mơhnhôk lối 1.500 hnoăng liăn hriâm, 50 kơthung tê tôu ro, chât rơpâu kơthung kung kếo têa, ăm mâu hok tro; hlối xo liăn ‘măn vâ gum ăm 4 hnoăng liăn hriâm “Tŏng kum rơpó tơ’noăng’’ kơnâ 2 rơtuh liăn rêm hnoăng kum mâu vâi o ki xơpá.

- Kong pơlê Kon Tum ai lối 5.300 ngế tơ’noăng mơgêi hriâm râ má pái trung hok phôh thong. Tung lâp kong pơlê klâ pro 14 tíu tơ’noăng ƀă 244 veăng tơ’noăng ƀă 28 veăng tơkôm. Pakĭng mê, kơvâ ngăn hnê hriâm ƀă hnê mơjiâng tuăn ngoâ rơkê ƀă khu kăn pơkuâ mâu tơring xuân klâ xoăng tơ’nôm 9 tíu tơ’noăng ki rơnáu xâu lơ ai kong mê khía mơhot.

Vâ rak tơniăn hneăng tơ’noăng mơgêi hriâm râ má pái trung hok phôh thong châ po tơniăn, kơtăng, tro pơkâ, kong pơlê Kon Tum pơtroh lối 1.200 ngế kăn ƀô̆, kong chưk, viên chưk ngăn tơ’noăng. Mâu tơring tung kong pơlê hiăng mơhnhôk veăng tơlo liăn châ lối 600 rơtuh vâ gum lối 1.800 ngế tơ’noăng ki ai tơdroăng rêh ối pá puât. Rơtế amê, mâu hngêi trung hiăng hbrâ rơnáu krâu tíu kâ, tíu ối ăm hok tro hdroâng kuăn ngo ki ối a hngế ing tíu tơ’noăng.

- Hơnăm kố, kong pơlê Gia lai ai lối 16.200 ngế hok tro chêh inâi tơ’noăng. Lâp tung kong pơlê hiăng mơhno 42 tíu tơ’noăng ƀă 718 veăng tơ’noăng. Gia Lai hiăng mơhnhôk 4.500 ngế kăn ƀô̆, thái cô, mâu ngế pêi cheăng veăng ngăn tơ’noăng.

Rôh Veăng kum rơnó tơ’noăng a mâu kong pơlê xuân hiăng hbrâ a mâu tíu  tơ’noăng. 2.400 ngế hok tro ki xơpá a kong pơlê hiăng châ kơjo kum tâi tâng kơxô̆ liăn lối 940 rơtuh liăn. Krê pơlê kong kơdrâm Pleiku ai mơhno xoăng kơjo liăn kâ-ối-pơtê ăm hok tro ki oh tá plah tơ’noăng hơhdrối nah lăm tơ’noăng rôh kố nếo.

- Tung lâp kong pơlê Dak Nông ai lối 8.500 ngế chêh inâi tơ’noăng mơgêi hriâm râ má pái trung hok phôh thong. Kong pơlê tơkŭm 23 tíu tơ’noăng ki păng ‘nâng ƀă tâi tâng kơxô̆ veăng tơ’noăng, châ xoăng tơ’mô a mâu tơring, pơlê kong kơdrâm, vâ pro tơ’lêi hlâu má môi ăm tơdroăng ki prôk lăm dêi mâu ngế tơ’noăng, malối cho mâu ngế ki ối a kơpong hngế hngo.

- Hneăng tơ’noăng hơnăm kố, Lâm Đồng ai vâ chê 17.000 ngế hok tro chêh inâi tơ’noăng. Kong pơlê mơhno ăm 40 tíu tơnoăng  tâi tâng 9.719 veăng tơ’noăng. Tâi tâng kơxô̆ mơngế tơ’noăng rôh kố lối 2.500 ngế.

Ƀă hbrâ nhên ‘na mơngế, tơmeăm khoăng hngêi trung ƀă tơdroăng cheăng hên, tơdrêng ƀă tơrŭm krá pơla kơvâ ngăn hnê hriâm ƀă mâu khu râ pơkuâ cheăng, kong pơlê Lâm Đồng mơ-eăm tơkŭm po klêi tơ’noăng tơniăn, kơtăng, tro luât pơkâ ƀă pêi tơƀrê má môi.