Kơxo lơ 25/6, a Quảng Bình, pôa Tô Lâm, Kăn xiâm pơkuâ hnê ngăn cheăng Đảng ƀă Khu kăn ki pêi dêi hnoăng cheăng Tơnêi têa hiăng pêi cheăng ƀă Khu pơkuâ ngăn Đảng Quảng Bình ƀă Khu pơkuâ ngăn Đảng Quảng Trị ‘na klêi tơbleăng pro mâu pơkâ, mơgêi dêi Tơnêi têa ƀă mâu hnoăng cheăng ki kal mơnhông cheăng kâ rêh ối pơlê pơla, rak vế tơniăn cheăng lêng, gâk kring a kong pơlê Quảng Bình, Quảng Trị.

Rôh pêi cheăng po tung pơla péa to kong pơlê Quảng Bình ƀă Quảng Trị dế tơbleăng túa ‘mot tơkŭm vâ mơjiâng pro tíu pêi cheăng nếo ai inâi kong pơlê Quảng Trị. Tiô pơkâ, kong pơlê Quảng Trị klêi kơ’nâi ‘mot tơkŭm kô ai 78 tíu pêi cheăng râ cheăm. Tíu cheăng kal kí  pro a Pơlê kong kơdrâm Đồng Hới.

A rôh pêi cheăng, pôa Tô Lâm, Kăn xiâm pơkuâ hnê ngăn cheăng Đảng rơtế ƀă khu ki pêi dêi hnoăng cheăng Tơnêi têa tơmâng kăn pơkuâ mâu kong pơlê pơchuât tơbleăng ‘na tơdroăng ki tơbleăng pêi mâu pơkâ, mơgêi dêi Tơnêi têa; hnoăng cheăng klâ xoăng kơ koan cheăng dêi kong pơlê klêi tơkŭm môi; rơtế ƀă mâu pơkâ mơ’no vâ tŏng gum xơpá, rak vế tơƀrê ƀă xúa tơniăn tung pơla tơbleăng pêi.