Tơdroăng ki pêi cheăng hlo kơtăng, rĕng ƀă apoăng hlo tơƀrê tung tơdroăng ki chêh pro mâu hlá mơ-éa. Kuăn pơlê hơniâp ro, kăn pơkuâ hbrâ rơnáu ăm hâi pêi cheăng ki păng ‘nâng cho hâi lơ 1/7. A Tíu pêi cheăng môi tíu chêh bro hlá mơ-éa bêng Ea Kao, ‘mot tơkŭm sap ing cheăm Ea Kao ƀă bêng Ea Tam, maluâ ai hên kơdrâm kuăn pơlê lăm pro mâu hlá mơ-éa, tíu ki tơdah xo, mơdrếo hồ sơ xuân ối pêi cheăng tơ’lêi tơƀrê; mâu mơ-éa châ chêh pro rĕng klêi ƀă hiâm mơno pêi cheăng rơkê hmâ.

A bêng Thành Nhất nếo, tơdroăng ki pêi mơnúa ngăn túa cheăng kố xuân hlo pêi tơniăn lĕm. Kuăn pơlê phiu ro drêng hlo mâu tơdroăng ki pơhlêh nhên tung túa pêi cheăng ƀă tơƀrê tung pêi pro mâu tơdroăng cheăng. Rơtế ƀă pơlê kong kơdrâm Ƀuôn Ma Thuột, túa pêi cheăng cheăm ối tung kong pơlê xuân châ pêi mơnúa ngăn a mâu tơring dêi Dak Lak, gum kuăn pơlê tơ’lêi hlâu lăm pro mâu hlá mơ-éa.