Tung mê, 10 to cheăm, bêng mơnúa pêi 2 tơdroăng pro hlá mơ-éa klâ tơnêi tíu ƀă chêh inâi pơ’lêh xúa tơnêi. Rôh mơnúa pro hiăng klêi tơniăn ƀă púi ngah tung la ngiâ kô pro tơ’lêi hlâu ăm kuăn pơlê châ kơdĭng hâi khế, liăn prôk lăm. Ƀơrô Vi ƀan kuăn pơlê péa kong pơlê Bình Định ƀă Gia Lai hiăng tơrŭm krá vâ chêh pro mâu hlá mơ-éa, tơkŭm hriâm tâp ăm mâu kăn ƀô̆ mâu cheăm, bêng ƀă séa ngăn tơmeăm khoăng, tơniăn troăng pêi cheăng, kơmăi kơmok, tơmeăm xúa, chư kĭ vâ pro pơxúa tung tơdroăng tơdah pro hồ sơ.

Tâi tâng tơdroăng cheăng ing xo hồ sơ, chêh pro ngăn tung kơmăi, klêi mê ăm liăn tơdrêng tung kơmăi tiô troăng hyôh măng, ta troh drêng ăm ‘nâi hiăng pro klêi tơbleăng tung điĕn tưh châ mơjiâng pơkâ tơ’lêi hlâu, tơ’lêi xúa.