Kố cho môi tung mâu tơdroăng, tơdroăng koh phiu ro mơjiâng kong pơlê Lâm Đồng nếo. Troăng kân ăm phêp rơxế kơtâu têi Bảo Lộc – Liên Khương xŏn 74 km, tơdjêp 2 pơlê kong kơdrâm Bảo Lộc ƀă Đà Lạt, lăm a mâu tơring Bảo Lâm, Di Linh ƀă Đức Trọng dêi kong pơlê Lâm Đồng. Kố cho troăng kân ăm phêp rơxế kơtâu têi tơdjêp ƀă troăng ăm phêp rơxế kơtâu têi Tân Phú – Bảo Lộc ƀă Dầu Giây – Tân Phú, tơdjêp pơlê kong kơdrâm Đà Lạt, kong pơlê Lâm Đồng ƀă Pơlê kong kân Hồ Chí Minh ƀă mâu kong pơlê Đông Nam Bộ, mơjiâng ivá mơnhông ăm kong pơlê Lâm Đồng nếo.

Tơdroăng tơkêa bro ai tâi tâng kơlo liăn mơ’no (hneăng má 1) lối 17.700 rơtal liăn, tung mê ai lối 7.600 rơtal liăn ing kơxô̆ liăn ngân Tơnêi têa, ki ê cho xua khu mơ’no liăn pro mơ’no. Tơdjêp khu mơ’no liăn Kŏng ti pêi cheăng tiô rơnó môi khu Mơ’no liăn ƀă Mơjiâng troăng klông T&T  - Kŏng ti tơlo liăn Mơ’no liăn cheăng Grup pơkuâ Phương Trang FUTA Group – Kŏng ti tơlo liăn Mơ’no liăn Mơjiâng troăng kân Phương Thành châ rah vâ pro troăng, ƀă ki kơnâ kơxô̆ liăn pro vâ chê 11.924 rơtal liăn, hâi khế pêi pro – tê mơdró 19 hơnăm 10 khế. Tiô pơkâ, tơdroăng tơkêa bro kố pro tung pơla 30 khế.