Tơpui tơno ƀă kuăn pơlê pin, Ngế pro xiâm hnê ngăn tơnêi têa tối: Khu kăn Việt Nam veăng lăm Hôp tiah hmâ rêm hơnăm mâu khu ki djâ troăng ahdrối rôh má 16 cho Hneăng hôp tơpui tơno ‘na Cheăng kâ tung lâp plâi tơnêi a Thiên Tân ƀă hnoăng cheăng, “ai hên tơdroăng vâ tối, ai hên  tơdroăng vâ hâk tơngăm”, ing mê tối ki rơdêi ƀă ki nhoăm ô eăng dêi tơnêi têa pin.

‘Na tơrŭm cheăng péa pâ, Ngế pro xiâm hnê ngăn tơnêi têa tối nhên, Việt Nam ƀă Sinuâ rơtế hmâ ƀă dêi rơpó ing rơpâu hơnăm kố, xua mê, mơdêk tơrŭm cheăng ƀă Sinuâ xuân cho tơdroăng ki pêi tơdjuôm. Kố xuân cho rah xo troăng hơlâ xua Sinuâ cho môi tơnêi têa kân, tơnêi têa achê pin, tơdroăng cheăng kâ kân má péa lâp plâi tơnêi. Ngế pro xiâm hnê ngăn tơnêi têa pơkâ thế Kăn teăng mâ ƀă mơngế Việt Nam ki rêh ối a Sinuâ thế tơrŭm krá vâ rế mơnhông tơniăn lĕm, tơrŭm krá ƀă dêi rơpó “hlối cho pú ƀă hlối cho nhŏng o’’ tá ah lĕm krá ƀă dêi rơpó.