Kơmăng lơ 19/6, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa trâm mâ khu râ kăn pơkuâ, kăn pơkuâ mâu kơ koan chêh hlá tơbeăng klăng leh tơbâ 100 hơnăm Hâi hlá tơbeăng Kăch măng Việt Nam (21/06). A roh trâm mâ, Ngế pro xiâm hnê ngăn tơnêi têa pói vâ mâu khu chêh hlá tơbeăng mơnhông khôi túa 100 hơnăm Hlá tơbeăng kăch măng Việt Nam, ƀă ‘’hiâm mơno lĕm, hiâm mơno hleăng, chêh rơkê’’ pơtối veăng kum ăm tơdroăng mơnhông dêi tơnêi têa, dêi hdroâng mơngế ƀă kuăn pơlê.

‘Na pơkâ mơdêk cheăng hlá tơbeăng, Ngế pro xiâm hnê ngăn tơnêi têa pơkâ thế Khu xiâm pơkuâ Khôi túa lĕm tro Tơ’noăng ivá Ôm hyô tung 1 khế tơkŭm po mơjiâng Tơdroăng pơkâ inhên ‘na tơdroăng xúa tơmeăm hlá tơbeăng, tơdroăng xiâm kok, troăng mơhá liăn... ăm hlá tơbeăng. Tơdjâk troh kŏng ngê̆ thông tin, Ngế pro xiâm hnê ngăn tơnêi têa pơcháu Khu xiâm Khoa hok ƀă Kŏng ngê̆ mơjiâng mâu Luât, ai troăng tơtro ing tơtro pơxúa 3 hngêi: Tơnêi têa, khu cheăng măng, khu chêh hlá tơbeăng. Tơniăn 3 pâ xuân ai pơxúa.

Ngế pro xiâm hnê ngăn tơnêi têa pơkâ thế rĕng tơbleăng Tơdroăng pơkâ ‘na tơbleăng a hlá tơbeăng, pơtối tơleăng mâu tơdroăng ki u ối tung pơla kố nah. Klăng kố, Ngế pro xiâm hnê ngăn tơnêi têa pơkâ, Khu xiâm pơkuâ liăn ngân hriăn plĕng mơdêk kơxô̆ liăn ăm khu chêh hlá tơbeăng.