Tơ̆ ‘măng hop akŏm, ƀok Trương Văn Đạt, Kơ iĕng Kơdră chĕp pơgơ̆r Jơnŭm vei lăng kon pơlei dêh char Gia Lai hlôi tơbăt hơdăh dôm tơdrong đei ƀơm truh tơdrong pôk hơtŏk khul kơdră chĕp pơgơ̆r. Kiơ̆ tơdrong Tơchơ̆t đơ̆ng Khul kơdră chĕp pơgơ̆r Kuô̆k hô̆i, dêh char Gia Lai jăl jang 2021-2026 đei 119 ‘nu bơngai tang măt. Adoi dôm kơchư̆k tơm dơnơm kơ Jơnŭm vei lăng kon pơlei dêh char jei tơbăt hơdăh. Mă hơdăh: ƀok Rah Lan Chung, Kơ iĕng kơdră chĕp pơgơ̆r Đảng dêh char, đei pôk hơtŏk jang hloi Kơdră chĕp pơgơ̆r Jơnŭm vei lăng kon pơlei dêh char Gia Lai. Rim kơ iĕng Kơdră chĕp pơgơ̆r Jơnŭm vei lăng kon pơlei dêh char păng Kơdră rim hơnih joăt jang jei đei pôk hơtŏk tôm lơ̆m khul kơdră chĕp pơgơ̆r ‘nao. Kiơ̆ kơ ‘noh, Jơnŭm vei lăng kon pơlei dêh char hlôi tơbăt hơdăh tơdrong tơchơ̆t đơ̆ng Thủ tướng Teh đak găh khul kơdră chĕp pơgơ̆r Hơnih bơ̆ jang vei lăng kon pơlei dêh char Gia Lai jăl jang 2021-2026. Lơ̆m ou ƀok Phạm Anh Tuấn, Kơ iĕng Kơdră chĕp pơgơ̆r Đảng dêh char, đei pôk tơmơ̆t jang Kơdră chĕp pơgơ̆r Hơnih vei lăng kon pơlei dêh char Gia Lai; 6 ‘nu kơ iĕng Kơdră chĕp pơgơ̆r Hơnih vei lăng kon pơlei dêh char iŏk chĕp pơgơ̆r rim tơdrong jang hlôi đei pơjao ăn.

Iung pơma tơ̆ hơnăp Jơnŭm vei lăng kon pơlei dêh char, ƀok Phạm Anh Tuấn, Kơdră chĕp pơgơ̆r Hơnih vei lăng kon pơlei dêh char Gia Lai pơma pơkăp: “Ĭnh apĭnh pơkăp iung jang tơnăp, tơpăt ‘lơ̆ng păng iŏk đei jơnei, lơ̆m ou iŏk trong tơlĕch jang pơm jŭk, tơpăt ‘lơ̆ng, tơdrong jang tơm pơm trong pơchoh ăn prăt jơ ‘năr bơ̆ jang vei lăng păng chĕp pơgơ̆r. Atŭm dih băl kơrŭn đĭ ai, minh jơhngơ̆m đon, iung jang kơtang hrơ̆ch dih băl iŏk đei jơnei hơ iă kơ yuơ mĭnh khei ‘năr atŏk tơ iung tơgăl hăm tơdrong đei ăn Gia Lai ‘nao lăng truh trong tơlĕch jang tơ iung pơjing Gia Lai đei jing dêi char atŏk tơ iung kơjăp iăp kơtang, trŏ lăp, gơ̆h hơgei, pơdrŏng ‘lơ̆ng liĕm jơhngơ̆m đon tơpăt păng phăl hơlăng, groi teh mă rim hơnih mơdro sa, kon pơlei jei hơpơi ‘meh vă đei tơdrong ‘meh vă tơgop atŏk tơ iung pơlei pơla, tơring tơrang kơdih.”

Lơ̆m jơ hop akom, rim kơdră tang măt hlôi akŏm pơma dơnuh, tơlĕch nơ̆r tơgop găh lơ trong vă jang pơjing tơdrong tơchơ̆t kăl, pơđĭ: Pơjing rim hơnih bơ̆ jang găh Jơnŭm vei lăng kon pơlei dêh char Gia Lai. Trong pơprŏ ăn pơgơ̆r rim ‘măng hop akom joăt joe kơ Jơnŭm vei lăng kon pơlei dêh char. Pơjing rim hơnih bơ̆ jang joăt jang păng hơnih bơ̆ jang găh Hơnih vei lăng kon pơlei dêh char Gia Lai. Xơkơ̆t hơdăh hơnăn khul kơdră chĕp pơgơ̆r Hơnih xek tơlang dêh char Gia Lai ‘nao ... Dôm tơdrong ou đei lăng jĭ hơyak blŭng a lơ̆m tơdrong pơjing keh đang khul kơdră chĕp pơgơ̆r kơ dêh char, sơđơ̆ng ăn bơ̆ jang jơnei păng ‘lơ̆ng hơ iă lơ̆m jăl ‘nao.

Iung pơma tơ̆ ‘măng hop akom, ƀok Hồ Quốc Dũng, Bí thư Đảng dêh char Gia Lai, pơma hơdăh: “ Ĭnh athei rim kơdră chĕp pơgơ̆r tơring ‘nao đei pôk hơtŏk iung jang hloi lơ̆m tơdrong jang tơ iung pơjing trong pơprŏ vă jang hơdăh, tôm tong vă tơlĕch jang kiơ̆ tơpă khoa hŏk, jơnei keh kong dôm tơdrong đei pơjao lơ̆m khei năr ou kơnh. Lui khan hăm tơdrong joăt joe, nuih mơng, jơhngơ̆m đon tơgoăt kơjăp păng hơpơi ‘meh vă atŏk tơ iung kơ dêh char Gia Lai ‘nao, hăm kơrŭn đĭ ai bơ̆ jang chinh trĭ ‘nao, hơdrin yak truh jing mĭnh dêh char pơm jŭk yuk trong hơlou lơ̆m tơring Tây Nguyên păng Duyên hải Nam Trung Bộ pran kơjăp iăp kơtang atŭm lơ̆m teh đak yak mơ̆t lơ̆m chăl ‘nao”.

‘Măng hop akŏm blŭng a Jơnŭm vei lăng kon pơlei dêh char Gia Lai jăl XII ‘noh hơyak blŭng a kăl hloh vă Gia Lai lăng truh trong tơlĕch jang atŏk tơ iung kơjăp ‘lơ̆ng, đei jing mĭnh tơring dơ̆ng hơlou lơ̆m tơring păng lơ̆m teh đak.