Tơgoăt tơgoăl: tơdrong trŏ kơ chăl hơrih, trong jang tơm dơnơm kơ Đảng

“Tơgoăt tơgoăl, tơgoăt tơgoăl, tơpôl tơgoăt tơgoăl-Jơnei, jơnei, jơnei tih tên”- Nơ̆r pơma tôch trŏ lăp đơ̆ng Kơdră chĕp pơgơ̆r Teh đak Hồ Chí Minh đơ̆ng tŏk bŏk anglŏ XX truh dang ei oei gei kơjăp. Mưh pơ đĭ lơ̆m teh đak hlôi păng tŏk bŏk iung jang kiơ̆ trong bơ̆ jang proh hơmet, pơm kơtoei khul bơ̆ jang kơ pơđĭ khul chinh trĭ; hơgrop rim hơnih bơ̆ jang, “hơmet ming dơ̆ng groi teh”, pơjing cham char atŏk tơ iung kơjăp ‘lơ̆ng ăn teh đak, jơhngơ̆m đon tơgoăt tơgoăl pôm nơ̆r ƀơ̆r đon sa roi kiơ̆ yok yok jơ̆ng kơjăp iăp kơtang hloh dơ̆ng.

Lơ̆m chăl sơnăm tơ iung pơjing teh đak păng vei lăng teh đak đơ̆ng hơdrĕch hơdrung Việt Nam, jơhngơ̆m đon tơgoăt tơgoăl pôm nơ̆r ƀơ̆r đon kơjăp sa roi tơƀôh hơdăh păng hlôi jing minh tơdrong joăt gĭt kăl hloh. Gơnơm tơgoăt pôm nơ̆r ƀơ̆r đon, bơ̆n mă kĕ pơjing tơdrong hơmơt đei jing tơdrong sơđơ̆ng, tơlang kĕ dôm dôm tơdrong tơchă trong “pơm chere, phă pơrăm” đơ̆ng khul kơnê̆.

Iŏk đơ̆ng jơ ‘năr pơjing hloi, Đảng Cộng sản Việt Nam hlôi sơkơ̆t hơdăh trong tơgoăt tơgoăl hơdrĕch hơdrung, lăng ‘noh mĭnh păh jĭng trong tơlĕch jang kiơ̆ adoi jing jơhngơ̆m pran sơkơ̆t hơdăh iŏk đei jơnei tơdrong bơ̆ jang kĕch mang. Đơ̆ng sơnăm 1943, Đảng hlôi tơlĕch Tơdrong joăt Việt Nam hăm pêng trong jang pơrô̆ pơrôp, lơ̆m ou đei “Tơpôl vang iung jang” - Dôm tơdrong kăl đei iŏk yoa sa hơpăh ăn tơpôl, akŏm đei kơdrơ̆m kon pơlei vang iung jang.

Đảng bơ̆n hlôi pơjing lơ tơdrong tơchơ̆t kăl kiơ̆ yok rok jơ̆ng jơhngơ̆m pran tơgoăt tơgoăl pôm nơ̆r ƀơ̆r đon. Tơdrong tơchơ̆t kơsô̆ 23 sơnăm 2003 ‘măng blŭng tơlĕch tơdrong jang “Kiơ̆ yok rok jơ̆ng jơhngơ̆m pran tơgoăt tơgoăl pôm nơ̆r ƀơ̆r đon rim hơdrĕch hơdrung kơ yuơ kon pơlei pơdrŏng, teh đak pran kơtang, tơpôl hơtŏ hơnơ̆ng, pơm tơm kơdih, gơh hơgei”. Đơ̆ng rŏng 20 sơnăm, truh sơnăm 2023, Đảng hơnơ̆ng pơjing Tơdrong tơchơ̆t 43 găh atŏk kơtang joăt joe păng jơhngơ̆m pran tơgoăt tơgoăl pôm nơ̆r ƀơ̆ đon lơ̆m chăl hle.

Kăl đei tơdrong tơplih ‘nao

Teh đak bơ̆n tŏk bŏk iung jang kơtang trong jang tơplih ‘nao, hơmet ming kơjăp iăp kơtang khul chĕp pơgơ̆r kơ khul jang chinh trĭ; proh hơmet pơ ‘lơ̆ng hơnih bơ̆ jang chĕp pơgơ̆r păng tơlĕch jang kiơ̆ trong bơ̆ jang khul kơdră tơring ƀar kâp. Trong tơlĕch jang kăl ‘noh pơm kơtoei khul bơ̆ jang, pơm hơtŏk jang keh đang, vei lăng kơjăp, chĕp pơgơ̆r teh đak, adoi jang kiơ̆ pơjao trong chĕp pơgơ̆r, gơ̆h jang kơtang ăn tơring.

Trong jang ou ưh khan hŭt hơnih jang hơlam ưh kơ kăl, mă tơdrong kăl hloh ‘noh hơmet ming dơ̆ng cham char ăn atŏk tơ iung kơjăp ‘lơ̆ng, vă khul kơdră chĕp pơgơ̆r tơklep hăm kon pơlei, tơjê̆ kon pơlei, kơ yuơ kon pơlei, bơ̆ jang vei lăng năng tông ăn kon pơlei ‘lơ̆ng hloh dơ̆ng; Trung ương jei pơjao hơdăh hloh dơ̆ng tơdrong gơ̆h jang, sơnong jang kơ khul kơdră tơring vă rim tơring iung jang tơnăp, tơchăr hơgei, atŏk tơ iung trŏ lăp hăm yan ou.

Mă lei, tơdrong pơm kơtoei khul kơdră chĕp pơgơ̆r kơ khul chinh trĭ; proh hơmet hơnih jang jei đei ƀơm truh minh ƀar ‘nu kang ƀô̆, đang viên, bơngai jang ... Tơdrong mă ou kăl đei trong jang tơpăt, lăp ƀơr đon kơtang păng iung jang chinh trĭ kơjăp păng mă kăl hŭt hloi jơhngơ̆m đon iŏk yoa sa hơpăh ăn kơ dih. Kơ yuơ lơ loh, tơgoăt tơgoăl pôm nơ̆r ƀơ̆r đon lơ̆m khul chinh trĭ ‘noh jĭ trong tơm pơjing đei jơnei kơ tơdrong hơmet ming ou.

Mưh hơgrop tơring, dôm tơdrong pơngơ̆t găh krao hơnăn ‘nao, hơnih pơjing hơnih bơ̆ jang ‘nao, dăh mă tơdrong klăh asong dih băl khul kơdră chĕp pơgơ̆r jei ƀônh pơm ăn đei jơhngơ̆m đon tơchĕng ưh kơ gan trŏ lăp ‘meh păh ayơ, chro lơ păh noh. ‘Ngoăih kơ ‘noh dơ̆ng, phara dih băl găh tơdrong oei sa, tơdrong joăt păng tơdrong atŏk tơ iung ƀar păh rim tơring jei jing tơdrong long tih tên. Tơdrong hơgrop ƀar păh dêh char groi kông hăm dêh char tơring tơmăn, dăh mă ƀar păh dêh char “pơdrŏng” hăm dêh char “dơnuh” pơkoăl khul kơdră chĕp pơgơ̆r kăl tơpăt ‘lơ̆ng păng jơhngơ̆m đon lăng jrŭ, vă sơđơ̆ng ‘lơ̆ng hơ iă rim pang jei lăng tông nông gia lei lăi dih băl, đei atŏk tơ iung hơtŏ hơnơ̆ng.

Tơdăh ưh tơgoăt tơgoăl pôm nơ̆r ƀơ̆r đon, ưh kơ mĭnh jơhngơ̆m đon lei gô jrok kơ trong dăh mă tơdrong bơ̆ jang chĕp pơgơ̆r ưh kơ jơnei. Kơ yuơ lơ loh, vei kơjăp tơgoăt tơgoăl pôm nơ̆r ƀơ̆r đon ‘noh jing tơdrong jang tơm dơnơm kăl hloh-jĭ trong kăl vă rim tơdrong jang hơmet ming đei keh kong ‘lơ̆ng liĕm. Vă vei kơjăp păng hơmet pơ ‘lơ̆ng tơgoăt tơgoăl lơ̆m khei ‘năr atŏk tơ iung ‘nao, kăl tơlĕch jang hrơ̆p mĭnh ‘măng rim trong jang kăl tơ̆ hơla ou:

Mă mĭnh ‘noh, atŏk kơtang tơdrong chĕp pơgơ̆r păng pơrô̆ jang trŏ lăp. Rim trong bơ̆ jang, tơdrong tơgŭm djru mưh tơ iung pơjing păng jang kiơ̆ jei kăl lăng truh tơdrong đei iŏk yoa sa hơpăh ăn kon pơlei ‘noh kăl hloh, tơgoăt kơjăp tơdrong tơgoăt tơgoăl dih băl ƀar păh Đảng hăm Kon pơlei, pơm lơ liơ vă kon pơlei hlôh vao, lui yom păng tơgŭm djru kơtang.

Mă ƀar ‘noh, pơm hơtŏk hơnăp jang pơm jŭk yuk trong hơlou đơ̆nbg kang ƀô̆, đang viên, mă kăl kang ƀô̆ chĕp pơgơ̆r. Rim kang ƀô̆, đang viên tơpă jing bơngai pơchoh trong choong glung lơ̆m vei kơjăp tơgoăt tơgoăl pôm nơ̆r ƀơ̆r đon lơ̆m hơnih jang, ling lang lăng tơdrong đei iŏk yoa sa hơpăh ăn tơpôl ‘noh tơm hloh kơ tơdrong iŏk yoa sa hơpăh ăn kơdih.

Mă pêng ‘noh, hơnơ̆ng pơm pơkeh trong bơ̆ jang, khôi luơ̆t vă sơđơ̆ng ‘lơ̆ng hơ iă tơdrong đei iŏk yoa sa hơpăh păng hơtŏ hơnơ̆ng tơpôl. Kăl hơnơ̆ng tơ iung pơjing, pơjing đei păng jang kiơ̆ rim trong bơ̆ jang tơgŭm djru trŏ lăp, tơpă hăm rim tơring păng kang ƀô̆ đei ƀơm truh; đơ̆ng rim trong tơgŭm djru truh bơ̆ jang vei lăng năng tông tơdrong hơrih sa tơpôl, tơmơ̆t jên jang ming man trong hnam ou to ăn tơring ‘nao hơgrop dih băl.

Mă puăn ‘noh, atok kơtang bơ̆ jang pơtho khan, pơrô̆ pơrôp kơtang lơ̆m khul kang ƀô̆, đang viên păng rim răih kon pơlei găh tơdrong kăl, tơdrong đei iŏk yoa sa hơpăh đơ̆ng tơdrong proh hơmet, hơmet ming, pơm kơtoei khul bơ̆ jang, tơgŭm ăn rim răih bơngai băt hlôh ƀôh hơdăh trong bơ̆ jang trŏ ƀlep, kăl hloh păng đei iŏk yoa ‘lơ̆ng hơ iă ăn atŏk tơ iung đunh đai tai sơnăm kơ teh đak, đơ̆ng noh drơ̆ng lăp mĭnh jơhngơ̆m, iung jang kiơ̆ tơnăp.

Mă pơđăm ‘noh, kiơ̆ yok rok jơ̆ng jơhngơ̆m pran kơtang“Trong Đảng” păng jơhngơ̆m đon nuih mơng chinh trĭ lơ̆m rim Hơnih bơ̆ jang Đảng păng rim bơngai đang viên. Ăp đei mĭnh jơhngơ̆m đon păng iung jang hrơ̆p dih băl đơ̆ng kơpal jur tơ̆ hơla, đơ̆ng lăm lĕch tơ̆ ‘ngoăih, tơpôl tơgoăt tơgoăl lơ̆m Đảng păng lơ̆m kon pơlei mă tơpă đei pran kơjăp iăp kơtang, pơjing đei jơhngơ̆m pran kơjăp iăp kơtang hloh vă jang keh đang ‘lơ̆ng tơdrong jang proh hơmet khul chĕp pơgơ̆r teh đak, chông ba teh đak yak mơ̆t lơ̆m chăl atŏk tơ iung ‘nao.

Hăm trong chĕp pơgơ̆r pran kơtang gơh hơgei đơ̆ng Đảng, jơhngơ̆m đon nuih mơng păng gơh hơgei tơpôl atŭm hăm tơdrong joăt joe tơgoăt tơgoăl pôm nơ̆r ƀơ̆r đon kơjăp kơ hơdrĕch hơdrung, ‘măng iung jang pơm kơtoei khul chĕp pơgơ̆r chinh trĭ; hơmet ming hơnih bơ̆ jang păng tơdrong iung jang chĕp pơgơ̆r đơ̆ng khul kơdră tơring ƀar kâp ưh kơjor iŏk đei jơnei ‘lơ̆ng liĕm, pơjing đei hơyak pran kơtang chông ba teh đak yak mơ̆t lơ̆m chăl atŏk tơ iung ‘nao nhen Tơdrong tơchơ̆t Hop akŏm tih XIII kơ Đảng hlôi tơlĕch ăn. Jơhngơ̆m pran kơtang kơ tơgoăt tơgoăl pôm nơ̆r ƀơ̆r đon mĭnh ‘măng dơ̆ng gô tơgŭm bơ̆n kĕ yak hloh dôm tơdrong găh ga, pơjing tơdrong long đei jing tơdrong rơvơn, ba teh đak yak pran kơjăp mơ̆t lơ̆m chăl hle, chăl hơnŭk hơnoa, pơdrŏng, vang mơ̆t hơdoi păng atŏk tơ iung kơjăp iăp kơtang kơ yuơ tơdrong hơrih sa phĭ tơtŏ dơnŏ ‘lơ̆ng dơ̆ng dơjăp, hơnŭk hơnoa kơ kon pơlei pơla.

Tô Lâm

Tổng Bí thư Ban chấp hành Trung ương Đảng Cộng sản Việt Nam