Mưh ‘năr ‘nao ƀrưch hơdăh năr ‘nao, pơchrang ƀrach tơ̆ hơmơl, tơ̆ đak dơsĭ glơch glach, hlăng hnhơr lăng ƀôh tơmo tơ̆ lơ̆m đak, rim ƀô̆ đô̆i hăt hot chă ‘nhao muh măt păng iŏk yoa đak ou chă tơruih ăn dơnơm ‘long, ‘nhot sa. Dôm sơnăm tơjê̆ ou, achon dơsĭ đei răt kơthŭng mong đak kơna hlôi măh mai đak ăn chă sŏ nhă. Trung sĩ Thái Phương Nam tŏk bŏk bơ̆ jang tơ̆ achon dơsĭ Đá Thị tơbăt:“Vang jang vei lăng năng tông pơgar ‘nhot, pơgar ‘long pơrŏ păng ƀôh dôm ‘nhot, ‘long jing ‘lơ̆ng, đei pơgar ‘nhot sơđơ̆ng ăn so sa ‘noh ba chơt hơ iă dêh”.

Tơ̆ Achon dơsĭ Đá Thị đei mĭnh pơgar pơkao iĕ tôch kơ ‘lơ̆ng chă pơtăm găh lơ pơkao hoa giấy, pơkao mẫu đơn hla iĕ păng pơkao sư̆. Rim ƀô̆ đô̆i pơm hloi ‘măng jang “Đảo Đá Thị” hăm dur ‘long chă pơm lơ̆m jơ rơhơi. Pơgar pơkao kơ achon Đá Thị tôch hơ iă kơ yuơ gơh “dăr” kiơ̆ jơ ‘năr, kiơ̆ kial tơhlu. Thượng uý Mai Vũ Thanh Nguyên, Kơdră chĕp pơgơ̆r Achon dơsĭ Đá Thị, tơbăt. “Kial pơyan Hơlĕch Tu ‘noh nhôn rĭ pơgar pơkao păh ou vă veh ver kơ kial. Khei 5 tơplih jing kial pơyan Pơmơ̆t pơbăh tơhlu đơ̆ng păh hơla ou kơna nhôn rĭ pơgar pơkao năm păh to vă veh ver kơ kial tơhlu, sơđơ̆ng ăn dơnơm pơkao hoei chă păk tơgơ̆ ou to”.

Tok bŏk đak dơsĭ glơch glach, kial tơhlu hoheo, mă lei yak truh tơ̆ achon dơsĭ ayơ dăh mă tơ̆ hnam hơdrơ̆r DK1 - 19, rim khul bơ̆ jang jei hlêng hlang kơmăt chă pơglăn lăng dôm pơgar ‘nhot sa jơk ƀlĭk, kơthŭng xôp chă dŏng ming ‘lơ̆ng brơ̆ch brăch, dơđăh ‘nhot chăt mơ liơn. Đei ‘măng tơ̆ ou, ‘nhot hla hơnoăn, ‘nhot đak mơ̆k jei tih să hloh chă pơtăm tơ̆ groi teh. Pơyan phang tơ̆ achon dơsĭ đunh khei ‘năr, truh khei 8-9 mă đei đak ‘mi jur, rim ƀô̆ đô̆i sir sơlŭng ƀŭ dôm kơthŭng vă mong đak ‘mi vă đei đak chă sŏ nhă, chă tơruih ‘nhot pơtăm. Klak ka păng dôm hla ‘nhot chă ƀŭ tôch trŏ lăp vă pơm mơ̆r tŭh ăn ‘nhot pơtăm. Lăp dang 78m2 teh pơtăm ‘nhot tơ̆ achon đak lơ̆p Cô Lin, rim ƀô̆ đô̆i hlôi chă pơtăm phĕ đei hloh 700 kĭ ‘nhot lơ̆m sơnăm, măh mai ‘nhot sa ăn khul ƀô̆ đô̆i. Đại uý Nguyễn Xuân Hoàng, chính trị viên achon dơsĭ Cô Lin tơbăt, thoong dơnou hlŏng đak đei pơjing ‘lơ̆ng đơ̆ng ‘ngoăih mơ̆t lơ̆m pơgar. Đak ro hlŏng rơgoh ƀoh gô chă tơruih tơm ‘long vă teh ju.“Rim ‘năr ‘ngoăih bơ̆ jang dôm tơdrong jang tơm kơ hơnih, ‘nhŏng oh nhôn vang chă pơtăm ‘nhot vă đei ‘nhot sa. ‘Ngoăih kơ ‘noh oei chă rong iĕr bip vă đei ‘nhĕm ‘nhot sŏng sa ăn ‘nhŏng oh kang ƀô̆ lơ̆m achon ou. Achon ou jei rong đei 9 tŏ kŏ, pơjing đei chơt hơ iă, phơi jơhngơ̆m đơ̆ng rŏng mĭnh năr bơ̆ jang gleh grat, chă rong iĕr, rong nhŭng, bip vă hiôk jơhngơ̆m đơ̆ng rŏng mĭnh năr jang gleh hrat”.

Yak hloh đak rơnglă, poh yă kơtang thŏng nan kmăi ba khul bơ̆ jang kơsô̆ 9 mơ̆t truh rim achon dơsĭ, nhôn jei đei năm truh dôm achon đak lơ̆p phơi rơngơp hơyơl ‘long jơk ƀlĭk nhen achon Sinh Tồn, achon Đá Tây A, achon Song Tử Tây păng achon Trường Sa. Tơ̆ ou đei rim ‘long sa plei jing ‘lơ̆ng ƀlĭk ƀlăk plei triu trăo nhen tơneh, plei gao, pơ ŏ, kơtao, krô̆i hroi, plei tơmoăn, atŭm hăm dơnơm ‘long yơ̆p ‘lơ̆ng rŏ kơ lăp đei hơdrô̆ tơ̆ Trường Sa nhen ‘long ƀang vuông, phong ba, tra, nhàu, đơ̆ng ‘noh ‘long phi lao, ‘long gao, mù u. Mŏ Lê Thị Kim Thi tŏk bŏk hơrih sa lơ̆m achon Sinh Tồn tơroi: “ ‘măng blŭng ba tơchĕng hơrih tơ̆achon ‘noh tôch tơnap tap, mă lei mưh truh tơ̆ ou ƀôh dơnơm ‘long bluh vơ̆ jing ‘lơ̆ng. Ƀô̆ đô̆i hăm kon pơlei ‘noh pơvei dih băl tôch kơ jăp”.

Teh pơtăm ‘nhot đei chơ ba đơ̆ng groi tĕh, tơruih đak nglêu, đak ‘mi. Khei 2 truh khei 5 ‘noh ‘nhot bluh vơ̆ jing ‘lơ̆ng. Dôm khei hơtuch sơnăm ‘mi jrăh, đak dơsĭ ƀăt ƀoh poh yă hmă hmă pơm ăn ‘nhot ôm tơm, kơ yuơ lơ loh rim ƀô̆ đô̆i păng kon pơlei măh pơdŭ teh pơtăm ‘nhot tŏ tơ̆ kông vă veh ver đak dơsĭ hram. Ƀok thây Trương Hồng Lĩnh, tơ̆ achon Sinh Tồn tơbăt:“Ba pơtăm pơkao păng ‘long bonsai, rong sem pơrŏ. ‘Nhot tôch rơgoh, ưh kơ đei chă pruih pơgang đei ‘nhot hla iĕ, hla hrŭm, ‘nhot đak mơ̆k, lŭng hŭng, thì là, plăng, hơmrrĕ, ‘nhot ƀou khach, lơ lap jô̆ ưh kơ kĕ kơđĭ…”.

 Ƀô̆ đô̆i kon pơlei oei tơ̆ achon dơsĭ mĭnh nơ̆r ƀơ̆r đon ưh khan kơrŭn jơhngơ̆m pơtăm lơ ‘nhot sa, ‘long yơ̆p jơ̆p jang achon dơsĭ mă oei pơjing đei tơdrong hơrih sa sơđơ̆ng ‘lơ̆ng rŏ hơbŏ nhen ăn kon pơlei hơrih sa tơ̆ ou dơ̆ng.