Tơ̆ Hơnih jang mĭnh ‘măng phương Ea Kao, hơgrop đơ̆ng tơring Ea Kao hăm phương Ea Tam, dêh char Dak Lăk, lơ̆m năr bơ̆ jang pơlong năng, kon pơlei năm pơm hla bơar đei iung jang keh đang tĕnh koăng. Yă H’Đinh BKrông (Aduôn Y Sam), kon pơlei kơ pơlei Alê B, tơroi tơbăt jơhngơ̆m đon đơ̆ng rŏng năm pơm hla bơar ăn đe mơng hnam oei:“Tơdrong bơ̆ jang pơm hla bơar lăp đơ̆ng rŏng hơgrop hơnih bơ̆ jang ba ƀôh rim kang ƀô̆ bơ̆ jang tôch tơnăp, phăl hơlăng, tơgum djru kon pơlei tôch kơ phăl lơ̆m tơdrong pơm hla bơar. Chă pơm hla bơar tĕnh koăng tôch kơ hrôih, ba ƀôh tơplih lơ tơpă mơ̆n.”

Tơpă yan ou, tơdrong jang pơlong năng tơ̆ rim dêh char Dak Lăk, Lâm Đồng, Gia Lai, hơnih bơ̆ jang teh đak hlôi iung jang ‘lơ̆ng hơ iă. Năm dăr lăng hloi tơdrong bơ̆ jang, ƀok Nguyễn Đình Trung, Bí thư Đảng dêh char Dak Lăk, pơrô̆.“Bơ̆n pơma ‘noh jang pơlong năng, mă lei bơ̆ jang pơm hla bơar ăn kon pơlei tơpă hloi. ‘Nou jĭ hơyak vă năr 1/7 bơ̆n iung jang ‘lơ̆ng, hoei chă sơ̆l vơ̆l. Kơ yuơ lơ loh, mă đơ̆ng hơnăp jang yă kiơ bơ̆n jei kăl iung jang keh đang ‘lơ̆ng tơdrong jang hlôi pơjao ăn kơ bơ̆n, mưh pơgơ̆r hop akŏm lăng hơlen kơjăp tơdrong jang yă kiơ hlôi ‘lơ̆ng păng tơdrong yă kiơ tim mă ‘lơ̆ng vă hơmet ming pơ ‘lơ̆ng hloh dơ̆ng.”

Tơ̆ dêh char Gia Lai, bơ̆ jang pơproh ăn, pơm kơtoei khul bơ̆ jang, tơlĕch jang kiơ̆ trong jang tơring 2 kâp, hlôi tơlĕch jang ‘lơ̆ng. Ƀok Hồ Văn Niên, Bí thư Đảng dêh char Gia Lai pơma hơdăh:  “Pơđĭ lơ̆m khul chinh trĭ kơ dêh char tŏk bŏk akŏm tơlĕch jang trong jang khul kơdră tơring 2 kâp đei iung jang đơ̆ng năr 1/7. ‘Ngoăih kơ ‘noh, dêh char tŏk bŏk atŏk kơtang lơ trong tơlĕch jang pơtrŭt iung jang kiơ̆ tơplih kơsô̆, jang kiơ̆ khoa hŏk kmăi kmŏk, hơmet pơ ‘lơ̆ng tơdrong tơhlăk tơhlĭn lơ̆m iŏk tơvih teh, pơtrŭt kơtang iung jang tơlĕch kon jên teh đak tơmơ̆t jang păng tơlĕch jang rim tơdrong jang tơm vă sơđơ̆ng ăn tŏk mŭk drăm lơ̆m sơnăm 2025 păng pơjing hơyak pran kơjăp iăp kơtang lơ̆m jăl jang ‘nao”.

Tơ̆ dêh char Dak Nông, mưh bơ̆ jang pơlong năng khul kơdră chĕp pơgơ̆r tơring hle jơnei, kon pơlei lui kơjăp lơ̆m tơdrong proh hơmet, hơgrop hơnih bơ̆ jang. Yă H’Thương, oei tơ̆ tơring Nâm Nung, tơbăt:“Hơgrop dêh char Bình Thuận, Dak Nông hăm Lâm Đồng kiơ̆ kơ ĭnh ‘noh jĭ tôch kơ trŏ lăp. Bơ̆n đei tôm rơvơn vă atŏk tơ iung mŭk drăm tôm toong, đei bri, đei đak dơsĭ; nhen Dak Nông đei nhôm Bô-xit; Lâm Đồng đei hơnih tơmang pơhiơ̆ Đà Lạt đe ư hơnhang ang hơnhăk vă atŏk tơ iung. Bình Thuận atŏk tơ iung găh đak dơsĭ, đei lơ găh ka hơdang nhen, hơdang, hơreng, ka, ka mơ̆k ... Lơ loh, 3 dêh char hơgrop jing minh ‘noh mŭk drăm-tơpôl roi năr roi atŏk tơ iung kơtang”.  

Tơ̆ dêh char Lâm Đồng hle, đĭ đăng iung jang pơlong năng jei đei dăr lăng kơjăp. Ƀok Y Thanh Hà Niê Kđăm, Bí thư Đảng dêh char Lâm Đồng sơkơ̆t hơdăh, dôm tơdrong tơhlăk tơhlĭn, sơ̆l vơ̆l đei hơmet pơ ‘lơ̆ng hơdrol kơ đĭ đăng 124 tơring, phương, tơring kăl iung bơ̆ jang.“Jang keh đang găh proh hơmet khul kang ƀô̆, bơngai jang năm bơ̆ jang tơ̆ hơnih jang vă mơ̆t bơ̆ jang kơ khul bơ̆ jang hle. Đảng ủy Hơnih vei lăng kon pơlei dêh char, Kơdră chĕp pơgơ̆r Hơnih vei lăng kon pơlei dêh char pơrô̆ iung jang keh đang tơdrong bơ̆ jang hơmet ăn hơnih jang, kmăi kmŏk ou to tơgŭm ăn bơ̆ jang, hnam bơ̆ jang, sơđơ̆ng jang keh đang tơdrong jang đei pơjao đơ̆ng dêh char truh tơ̆ tơring, phương, tơring kăl hrơ̆p mĭnh ‘măng iung jang đơ̆ng năr 1/7/2025’’.