Lơ̆m hnam ‘nao man ƀrao ‘lơ̆ng, ƀok Y Tơn, bơngai M’Nông, tơ̆ plei Đắk Sắk, xăh Đắk Sắk, tôch hơiă yoa tơdrong arih kơ unh hnam đei tơplih ‘lơ̆ng. Ƀok Y Tơn ăn tơbăt, ‘nâu jĭ tơdrong iŏk đei đơ̆ng khei ‘năr adrin jang tŏk klăih đơ̆ng tơnuh hin hăm tơdrong vang tơgŭm tôch pơneh đơ̆ng khul kơdră tơring, mă loi jĭ tơdrong tơgŭm tôch ai đơ̆ng đe đảng viên lơ̆m chi ƀô̆ tơ̆ pơlei. Dôm sơnăm adrol ki, hlŏh 2ha mir lăp pơtăm pôm ƀum đĕch, ưh kĕ rong ‘me măh mai unh hnam đei lơ bơngai. Mă lei hrei ‘nâu, oei pơgar teh 2 hecta ‘nŏh 'năi, đei tơplih jing pơtăm cheh phe, sầu riêng, mít, kơna unh hnam  đei iŏk yoa sơđơ̆ng: “Đei teh đak tơrek, đei chi ƀô̆ pơlei pơtho tơƀôh păng đei tŏk iŏk jên đơ̆ng anih mong jên tơgŭm tơpôl kơna unh hnam gơ̆h đei tơdrong ‘lơ̆ng vă tưk tơiung tơdrong choh jang xa. Dang ei hlôi pơtăm đei cheh phe păng lơ kơloăi ‘long xa plei bơih, 1,2 kơloăi ‘long đei plei bơih, tơdrong arih xa roi tŏk ƀiơ̆, đei lơ tơdrong ‘lơ̆ng vă jang xa jing đei ƀôh.” Ƀok Y Tơn tơroi thoi noh.

Kŭm hăm dôm tơdrong jang sut pơđĭ pơngot, tơjur tơnuh hin, dôm kơsô̆ jên tơgŭm, tơdrong dôm anih chĕp kơ̆l đảng păng rim anih jang chinh trĭ vang bơ̆ jang tơgŭm ăn dôm unh hnam tơnuh hăm lơ trong jang xa tôch đei yoa hlôi tơgŭm ăn tơdrong jang tơjur tơnuh hin iŏk đei jơnei ‘lơ̆ng. Jĭ đảng viên, linh so đei bưng ai, hơnơ̆ng rim năr kră pơlei Y Bleng, bơngai M’Nông, tơ̆ bon 9, xăh Krông Nô, kŭm hăm Khul vei lăng năm ngôi tơ̆ dôm unh hnam tơnuh lơ̆m pơlei, pơma nuh găh tơdrong arih xa păng jang xa.

Kră pơlei Y Bleng ăn tơbăt, mưh 5 ‘nu đảng viên, 5 unh hnam đei ƀôh ƀiơ̆ ‘nŏh vang tơgŭm ăn 1 unh hnam tơnuh. Dôm unh hnam tơnuh đei pơtho tơƀôh trong jang xa, tơgŭm bơ̆n tơmam hai, pơlung đe sư adrin jang tŏk hai: “’Nhŏng oh athei pơlung băl, krao hơvơn mih ma duch nă mât 1 ƀơ̆r đon, jang tŏk mŭk drăm. Ưh kơsĭ linh so jang 1 ‘nu ôh, linh so athei krao hơvơn kon pơlei, athei jur dăr lăng unh hnam tơnuh hin, hơnơ̆ng thoi noh. Hnam bu pơmat tat ‘nŏh bơ̆n chă krao ‘nhŏng oh vang tơgŭm băl, bơngai pơdrŏng ƀiơ̆ chă tơgŭm ăn unh hnam pơmat ƀiơ̆."

Trong jang đe đảng viên tơgŭm ăn unh hnam tơnuh jang tŏk hlôi đei pơih xă tơ̆ lơ pơlei pơla, kueng ƀôt kơ dêh char Đắk Nông so, dêh char Lâm Đồng ‘nao. Kơhrĕng unh hnam tơnuh tŏk bŏk đei lơ anih jang đảng tơ̆ tơring, lơ chi ƀô̆, đe đảng viên tơ̆ pơlei pơla tơgŭm vă jăh klăih đơ̆ng tơnuh hin. Yă Vương Thị Hiền, sơ̆ pơm Phŏ Kơdră Anih MTTQ xăh Đắk Ndrung, apŭng Đắk Song so ăn tơbăt, hăm tơdrong vang jang đơ̆ng lơ đảng viên tơ̆ lơ anih jang đảng, đơ̆ng pơlei truh tơ̆ xăh, apŭng, kŭm hăm tơdrong vang jang đơ̆ng dôm anih tĕch mơdro, bơngai đei đon ‘lơ̆ng, kơna jên, tơmam pơyoa ăn rim unh hnam tơnuh roi lơ. 

“Tơpă ‘nei, tơdrong arih xa kơ kon pơlei oei tôch pơmat tat, đe sư oei kơƀăh kơƀôch lơ tơdrong kơ na tơdrong kăl ‘nŏh athei jang dar dĕh đei yoa, lê̆ druh kiơ̆ lơ tơdrong. Yoa 1 unh hnam tơnuh bơ̆n athei tơgŭm lơ tơdrong, ưh kơsĭ lăp tơgŭm hơdrô̆ jên đei asong tŏk iŏk ‘nŏh đe gơ̆h klăih đơ̆ng tơnuh hloi ôh. Vă veh ver tơdrong tơnuh hơlơ̆k dơ̆ng, tơring athei đei trong tơgŭm truh um, tơgŭm lơ tơdrong vă đe sư gơ̆h klăih đơ̆ng tơnuh hin tơpă.”

Bơ̆ jang tơdrong jang tơm kơ teh đak găh tơjur tơnuh hin, khei 12/2021, Anih chĕp kơ̆l Đảng dêh char Đắk Nông so tơlĕch tơdrong tơchơ̆t kơsô̆ 13 găh tơdrong jang tơjur tơnuh hin đơ̆ng 2021-2025, trong jang truh sơnăm 2030. Tơdrong tơchơ̆t tơlĕch đon pơhnŏng tơjur tŏ sĕt hlŏh ‘nŏh 3% unh hnam tơnuh 1 sơnăm, hăm tơring kon kông ‘nŏh 5% 1 sơnăm, lơ ƀiơ̆ 2 ‘măng kơsô̆ hơgăt đơ̆ng Tơdrong jang tơm kơ teh đak tơlĕch. Hơtŏk hơnăp jang đơ̆ng rim Anih chĕp kơ̆l Đảng, dôm khul jang Đảng tơ̆ tơring, dôm chi ƀô̆, đe đảng viên đei dêh char tơrek truh. Gơnơm thoi noh, 5 sơnăm âu ki, dêh char Đắk Nông so hơnơ̆ng jang đei păng lơ hlŏh kơsô̆ hơgăt găh tơjur tơnuh hin, dêh char tơjur tơnuh hin hrĕnh hlŏh kơ tơring Tây Nguyên păng jing 1 lơ̆m dôm tơring tơjur tơnuh hin hrĕnh hlŏh lơ̆m teh đak.

Ƀok Ngô Thanh Danh, sơ̆ pơm Bí thư Đảng dêh char Đắk Nông so, ăn tơbăt: “Tơmât hơdai lơ kơsô̆ jên, tơmam, bơ̆ jang ‘lơ̆ng dôm tơdrong tơgŭm ăn hơdrĕch kon kông, tơdrong tơgŭm tơjur tơnuh hin kơjăp ‘lơ̆ng, pơjing pơlei pơla kiơ̆ trong jang tŏk kơjăp. Bơ̆ jang’lơ̆ng dôm tơdrong jang tơm kơ teh đak găh atŏk tơiung mŭk drăm, tơpôl tơ̆ tơring kon kông păng groi kông, akŏm jên tơmam pơ ‘nhŏ ăn tơdrong tơmât jang tŏk păng man pơkĕh anih jang, trong nơnăm, hnam oei, chĕng hơmet teh oei, teh choh jang xa.”

Tơdrong tơchơ̆t 05 sơnăm 2021 đơ̆ng Ban Bí thư chih hơdăh, tơdrong jang tơjur tơnuh hin kơjăp ‘lơ̆ng jĭ trong jang tih, gĭt kăl, athei bơ̆ jang hơnơ̆ng lơ̆m khei ‘năr jang kiơ̆ trong tơplih ‘nao tơdrong arih xa, pơjing păng atŏk tơiung teh đak. Lơ̆m khei ‘năr tơlĕch jang tơ̆ Đắk Nông ‘nao âu ăn ƀôh, tơdrong pran kơtang đơ̆ng Tơdrong tơchơ̆t đơ̆ng Anih chĕp kơ̆l Đảng dêh char truh dôm tơdrong jang tơ̆ yăn âu kơ tơring tơrang, pơlei pơla hlôi tơgŭm ăn tơdrong jang tơjur tơnuh hin iŏk đei jơnei ‘lơ̆ng. Tơdrong tơplih ‘nao đơ̆ng hơnăp chĕp kơ̆l pơgơ̆r kơ dôm anih jang Đảng hlôi păr ang truh tơ̆ rim đảng viên păng hơnhăk ba tơdrong đei yoa ‘lơ̆ng lơ̆m tơdrong jang tơjur tơnuh hin.