Dôm năr ou ki, ŭnh hnam ƀok K’Thiệu, oei lơ̆m thôn 1, tơring Bảo Lâm 4, dêh char Lâm Đồng, tôch chơt hơ iă ‘nă hal kơ yuơ đei pơbŭng hnam ‘lơ̆ng liĕm. Ƀok tơbăt, pơbŭng hnam ou kơjă kơ jên ming man hloh 220 triu hlak jên, lơ̆m ou Teh đak tơgŭm ăn 50 triu hlak jên, pă dôm yơ ‘noh đơ̆ng unh hnam chă pơkom atŭm hăm kơtum kơtŏng ‘nhŏng oh vang tơgŭm ăn.“ Ba tôch chhôk hơ iă ‘nă hal mưh đei Đảng păng Teh đak lăng tông nông gia kơjăp truh tơdrong hơrih sa kơ kon kông dơnuh oei tơ̆ tơring hơtăih yăih nhen nhôn ou. Đei pơbŭng hnam kơjăp ‘lơ̆ng lơ lou ba pă tơtăm yă kiơ bơih, lăp hơdrin pơnam chă jang sa, pă đei tơtăm ‘mi kial hnăt hnot nhen sơ̆ bơih”

Jô̆ truh năr 30/6, dêh char Lâm Đồng (so) hlôi jang keh đang ming hơmet păng pơm ‘nao 2.044 pơbŭng hnam ăn ŭnh hnam dơnuh, vă jê̆ dơnuh kiơ̆ Tơdrong jang xut xa hnam pơgia, hnam hnăt hnot. Ưh khan iung jang keh đang hrôih hloh 2 khei pơtêng hăm trong tơlĕch jang, dêh char ou oei ming man lơ hloh trong tơlĕch ăn truh 236 pơbŭng hnam dơ̆ng.

Jei jang keh đang hrôih hloh 2 khei trong tơlĕch jang xut xa hnam pơgia, hnam hnăt hnot, dêh char Gia Lai hlôi chă hơvơn rim khul vă iung jang jơnei tơdrong jang ou. Atŭm hăm kon jên jang đơ̆ng teh đak, lơ hơnih bơ̆ jang hlôi vang yak hơdoi kiơ̆ trong “Bu đei tơmam drăm tơgŭm tơmam drăm, bu đei jơ ‘năr tơgŭm năr jang”. Lơ̆m ou, khul kŏng ang ‘noh jing hơnih tơm hloh lơ̆m chă pơtruh ăn, tơgŭm djru ming man tơ̆ lơ tơring. Rim Khul ƀô̆ đô̆i nhen Quân đoàn 34, Binh đoàn 15 hlôi vang tơgop đei vă jê̆ 40.000 năr jang, tơgop pơjing đei dôm pơbŭng hnam kơjăp ‘lơ̆ng, tơnŏ ‘lơ̆ng jơhngơ̆m đon tơgoăt tơgoăl ƀô̆ đô̆i-kon pơlei. Đại tá Khuất Bá Cao – Bí thư Đảng uỷ, Kơ iĕng Kơdră chĕp pơgơ̆r Binh đoàn 15 sơkơ̆t hơdăh:“Tơdrong xut xa hnam pơgia, hnam hnăt hnot ‘noh jĭ tôch gĭt kăl kơ yuơ tơgŭm djru ăn kon pơlei, mă kăl hăm kon kông tơ̆ tơring đei hơnih oei sa sơđơ̆ng, tơgŭm ăn kon pơlei atŏk tơ iung mŭk drăm. Kiơ̆ đơ̆ng noh, Binh đoàn 15 vang iung jang hơdoi hăm tơring tơ iung pơjing tơring tơrang ‘nao păng vei lăng sơđơ̆ng dơ̆ng kơjăp chinh trĭ, sơđơ̆ng ‘lơ̆ng rŏ ăn tơpôl lơ̆m tơring sơlam teh đak.”

Găh dôm bơngai đei iŏk yoa sa hơpăh, dêh char Gia Lai (so) hlôi jang keh đang 100% trong tơlĕch jang tơgŭm ăn hnam oei ăn ŭnh hnam đei iok yua ăn tĕh đak, ŭnh hnam dơnuh, vă jê̆ dơnuh. Rim tơring jei oei tơlĕch rim trong jang tơgŭm djru lơ̆m hơrih sa, tơgŭm ăn kon pơlei kĕ yak hloh dơnuh hin tơpă. Yă Ksor H’Phương - Ƀĭ thư so tơring Ia Rtô (so), dang ei ‘noh tơring Ia Sao - tơbăt:“Lăp đơ̆ng rŏng jang keh đang tơdrong jang xut xa hnam pơgia, hnam hnăt hnot lơ̆m tơring, nhôn hơnơ̆ng iung jang dăr lăng vă tơgŭm djru rim ŭnh hnam atŏk tơ iung mŭk drăm, nhen pôk ăn rơmo yŏng, kon tơrong păng dơ̆ng pang tang măt hăm hơnih mong jên tơgum djru tơpôl ăn kon pơlei chă tŏk iŏk tơmơ̆t jang sa.”

Dôm năr blŭng khei 7 ou, dêh char Gia Lai jang keh đang hloh 8.100 pơbŭng hnam tơgŭm ăn rim ŭnh hnam tơnap tap, hrôih hloh 2 khei pơtêng hăm trong tơlĕch jang. ‘Nou ưh khan hơnih kơ ‘nơp sơđơ̆ng tŏ ‘mi, mă oei pơjing đei jơhngơ̆m đon hơmŏ gô đei mĭnh tơdrong hơrih sa sơđơ̆ng dơ̆ng kơjăp hloh, tơgŭm ăn rơbou ŭnh hnam kon pơlei đei rơvơn atŏk tơ iung, pơchoh trong choong glung jơhngơm đon hơmŏ găh tơdrong hơrih sa hiôk jơnap ƀiơ̆. Ƀok Rah Lan Chung - Kơ iĕng Ƀĭ thư Đảng dêh char, Kơdră chĕp pơgơ̆r Hơnih vei lăng kon pơlei dêh char Gia Lai tơbăt:“ ‘Nou jing tơdrong jang hơnhăk ba đei jơhngơ̆m đon ‘mêm kơ eng dih băl tôch kơtang. ‘Noh jĭ akŏm kơrŭn jơhngơ̆m lăng tông nông gia ăn rim bơngai dơnuh, dôm bơngai đei iŏk yoa ăn teh đak păng dôm bơngai ƀônh đei chhŭr nuih lơ̆m dêh char. Tơdrong jang hlôi hơvơn vang iung jang kơtang đơ̆ng pơđĭ khul chinh trĭ, rim hơnih, tơring tơrang, rim khul ƀô̆ đô̆i, kŏng ang păng kon pơlei. Kơ yuơ lơ loh, dêh char Gia Lai hlôi hơmet ming păng sơkơ̆t tŏ sĕt ƀiơ̆ khei ‘năr tơlĕch jang vă sơkơ̆t hơdăh iung jang keh đang tơdrong jang xut xa hnam pơgia, hnam hnăt hnot lơ̆m dêh char.”