Ôi 30/6, ta Quảng trường 10/3, kual ƀon têh Buôn Ma Thuột, n’gor Dak Lak ƀư Lễ mbơh Nghị quyết n’hanh ăp nău n’glêh an khlay bah Trung ương, n’glăp ngăn bar n’gor Dak Lak n’hanh Phú Yên, jêng n’gor Dak Lak mhe, nkre mbơh nău njêng mpôl kan đảng, n’gâng kan ta ntŭk, Mặt trận n’hanh nsum mpôl ăp gưl. Lôch rnôk n’glăp, n’gor Dak Lak geh rnoh hvi rlău 18.000 km2, rnoh âk nuĭh lah 3.346.853 nuĭh.

Wa Nguyễn Đình Trung, Ủy viên Trung ương Đảng dơi nchŏng đă ƀư Bí thư Tỉnh ủy Dak Lak, wa Tạ Anh Tuấn dơi nchŏng đă ƀư Kruanh UBND n’gor Dak Lak. Ntăm an păng n’glêh an njêng n’gor mhe n’hanh lah rđău đă ta rơh lễ, wa Lê Hoài Trung, Bí thư Trung ương Đảng, Chánh Văn phòng Trung ương Đảng lah rjăp: Đah nău way ơm tâm rnglăp, han săk n’hanh nuih n’hâm rgâl mhe, blău ƀư mhe đảng bộ, n’gâng kan n’hanh ƀon lan ăp rnoi nuĭh n’gor Dak Lak ndrel đah nău rđău đă grêt dăch, nău ntop kơl năn ngăch bah Trung ương he mbra ntik n’hao suan dăng, ntik n’hao ăp nău dơi hŏ geh, nâp dăng rlău dơi ăp jêr jŏt, ntul rlong. Mĭn lah ăp săk geh n’hanh dơh uĕh bah n’gor Dak Lak mhe mbra dơi ƀư jêng ngăn ngăn ma ăp njuat hun hao dăng ndơ̆ Dak Lak nsan hao, jêng bôk hun hao ngăch, geh nău khlay têk ndrêng ta nkual Tây Nguyên n’hanh Duyên Hải Nam Trung Bộ.