Tâm rnglăp: nau mĭn bah ăp rơh, nau kan mro bah Đảng

“Tâm rnglăp, tâm rnglăp, tâm rnglăp têh-Geh nau dơi, geh nau dơi, geh nau dơi têh”-Nau ngơi bah Kruanh Hồ Chí Minh ntơm bah rach năm XX tât rnôk aơ hôm nau tam ơm. Rnôk lam dak hŏ ndrel dôl ƀư nau ntrŭnh dăp rgum, rtŭt gleh trong kan chính trị, tâm rnglăp rmôt kan hành chính “dăp rgum tay neh ntu”, ƀư ntŭk kan ân hun hao ân neh dak, nuih n’hâm tâm rnglăp geh ƀư rjăp lơn.

Tâm nau ndâk ndrel mât neh dak bah rnoi mpôl Việt Nam, nuih n’hâm tâm rnglăp lơn ma ntoh kloh ndrel jêng nau ueh khlay. Rnơm tâm rnglăp, nơm njêng nau khuch jêng nau ueh, njêng nau ƀư “tâm nkhah, lơh djơh” jêng nau ueh.

Ntơm bah ntơ luh, Đảng Cộng sản Việt Nam hŏ nsôih tĭng trong tâm rnglăp ăp rnoi, uănh nê lah nkô̆, lah nau tơm n’hâm dăng ƀư nau dơi bah nau kan cách mạng. Ntơm năm 1943, Đảng nơm ntoh luh bôk nau kan Văn hoá Việt Nam đah nau kan ngăch. Tâm nê “rgum âk nŭih” ăp nau kan ân yor nau geh dơi bah ƀon lan, rgum âk mpưm ƀon lan râng.

 Đảng nơm hŏ ntrŭnh âk nau kan mpeh hun hao n’hâm dăng tâm rnglăp. Nau ntrŭnh mrô 23 năm 2003 rơh bôk năp ƀư nau kan “ƀư ueh n’hâm dăng tâm rnglăp ăp rnoi yor ƀon lan sâm geh, dak dăng, nau rêh tâm ban, ƀon lan bư tơm, nâp mhe’. Jêh 20 năm, tât năm 2023, Đảng lŏ ntrŭnh nau 43 mpeh n’hao nau ơm ndrel n’hâm dăng tâm rnglăp tâm rnôk mhe.

            Nau ŭch ngăn bah nau rgâl mhe

Neh dak nơm dôl ntơm ƀư rjăp nau ntrŭnh rgâl mhe, rgâl dăng ntŭk kan bah trong kan chính trị, dăp rgum tay rmôt kan hành chính ăp gưl ndrel hun hao nau dŏng nau kan n’gâng kan 2 gưl. Nkô̆ nau tơm lah n’huch ntrong kan, n’hao nau tam, nau dăng bah nau mât, mât ngih dak, nkre ƀư pă gưl, pă nau dăng rjăp lơn ân nkuăl.

 Nau kan aơ mô knŭng koh gưl lơi ntŭk kan tâm nklang, ma nau khlay lah ƀư nâp tay ân trong hun hao, gay n’gâng kan tâm dăch ma ƀon lan, yor ƀon kan, kơl an ƀon lan geh ueh lơn; Trung ương kŏ pă kloh nau dơi ndrel pă nau dăng nchrăp lơn ân n’gâng kan gay ăp nkuăl blau êng, njêng mhe, hun hao tâm di ma nau ngăn.

Yơn lah, nau rtŭt gleh ntŭk kan bah ntrong kan chính trị, dăp rgum tay rmôt kan hành chính kŏ geh nau khuch đŏng tât du đê̆ nŭih cán bộ, đảng viên, công chức...Nau nê ŭch geh nau kloh, tâm ban ndrel nsôih ngăn bah chính trị prêh ndrel ngăn lah nau roh hoach bah êng săk nŭih. Ndri ma, nau tâm rnglăp lam ntrong kan chính trị lah mpông geh nau dơi bah nau kan aơ.

Rnôk rnglăp n’gor, ăp nau rvê mpeh moh săk mhe, ntŭk kan, mô lah pă nŭih kan ƀư khuch đŏng tât nau mĭn dăng, dơi lơn. Ntop ma nê, nau êng mpah nau ơm, nau vay ndrel nau blau hun hao bah ăp mrôt kan hành chính kŏ ndŏ luh nau ntul rlong têh. Nau dăp rgum n’gor mpeh yôk ndrel ăp n’gor lâng mô lah n’gor “ndrŏng” ndrel n’gor “ach o” ŭch rmôt rđau kan ân geh tâm ban ndrel nau nau uănh, gay đăp mpăn tâm ban nau dơi ndrel tâm ban nau geh hun hao.

 Lah mô tŏng tâm rnglăp, nau tâm ban ƀư tih trong mô lah ƀư nkân nau tam dŏng bah ntrong kan. Ndri ma, mât nau tâm rnglăp lah nau tơm khlay bôk năp, lah nau dơi ngăn gay ăp nau kan êng geh nơih ƀư. Gay mât ndrel ƀư nâp nau tâm rnglăp tâm rnôk hun hao mhe, ân geh ƀư tâm ban du đê̆ nau kan ba kơi:

Ngoai lah: N’hao nau rđau kan ndrel rđau tâm ban. Ăp nau ntrŭnh, ntrong kan rnôk geh ndâk ndrel ƀư kŏ ân leo nau dơi bah ƀon lan ƀư tơm, geh nsum ma nau tâm boh đah Đảng ndrel ƀon lan, mhâm ƀư gay ƀon lan gĭt, rnơm, tâm di nuih n’hâm ndrel tâm kơl ngăn.

Bar lah: Ntô̆ n’hao nau kan leo trong lor bah cán bộ, đảng viên, ngăn lah cán bộ rđau kan. Ăp cán bộ, đảng viên ân ngăn ngên lah nŭih leo trong tât nau mât kan nsum, leo nau geh dơi nsum hao rlau ma nau geh săk nơm.

Pe lah: Lŏ ƀư jêh nau ntrŭnh, pháp luật gay đăp mpăn nau geh dơi ndrel nau tâm ban tâm nau rêh. Ân lŏ ndâk, ƀư ăp nau ntrŭnh kơl an tâm du, ngăn đah ăp nkuăl ndrel cán bộ ƀư nau kan; ntơm bah nau kơl an tât nau rêh jêng ƀon lan, ntuh kơl ntŭk ntu ân ƀon lan mhe geh rnglăp.

Puăn lah: Ntrŭt dăng nau mĭn, nkoch trêng jru tâm lam cán bộ, đảng viên ndrel ăp kơn nŭih ƀon lan mpeh nau khlay, nau geh dơi bah nau kan dăp rgum, nau rtŭt gleh ntrong kan, kơl an ăp nŭih gĭt aơ lah nau ntrŭnh tâm di, khlay ndrel geh dơi hun hao jŏ jong bah neh dak, tă bah nê tâm ban nuih n’hâm, tâm di ƀư êng.

Prăm lah: Ƀư ueh nau dăng “nuih n’hâm Đảng” ndrel nau nâp chính trị tâm ăp ntŭk kan Đảng ndrel ăp Đảng viên. Knŭng tâm ban mpeh nau mĭn ndrel nau kan tă bah lơ tât tâm dâng, tă trôm trôm luh bah dih, tâm rnglăp lam Đảng ndrel lam ƀon lan ƀư nâp ngăn, njêng n’hâm dăng gay bư jêh nau kan dăp rgum ntrong kan, leo neh dak lăp tâm rnôk hun hao mhe.

Đah nau rđau kan bah Đảng, ndrel nau nâp chính trị ndrel nuih n’hâm grum ndrel nau tâm ban tâm rnglăp lam rnoi mpôl ân nâp, nau rtŭt gleh bah trong kan chính trị, dăp grum tay ntŭk kan hành chinhd ndrel ƀư nau kan nkuăl 2 gưl ngăn lah mra geh nau dơi ueh, pơk trong ân nau leo neh dak lăp tâm rnôk hun hao mhe kơt nau ntrŭnh Đại hội XIII ndrel Đảng nchrăp luh. N’hâm dăng bah nau tâm rnglăp du tŏ tay đŏng kơl nơm rlet nau jêr, njêng nau jêr jêng nau dơi, leo nau neh nơm nâp nâl lăp tâm rach năm mhe, rach năm nâp nâl, ueh lăng, tâm rnglăp ndrel hun hao nâp nâl yor nau rêh hơm răm, ueh lăng bah ƀon lan./.