Ôi 30/6, ta phường Xuân Hương - Đà Lạt (n’gor Lâm Đồng mhe), Ủy viên Bộ Chính trị, Groi Thủ tướng Rnâng kan Nguyễn Hòa Bình râng Lễ mbơh n’glăp nsum nhih pah kan gưl n’gor, gưl xã; dŭt jêh nău kan gưl nkuâl (n’hanh tâm ban); njêng mpôl kan Đảng, nchŏng đă gưl uỷ, HĐND, UBND, Ủy ban MTTQ Việt Nam n’gor, xã, phường, đặc khu. Groi thủ tướng Nguyễn Hòa Bình mbah rhơn ăp mpôl kan Đảng, Ban Thường vụ bar gưl n’hanh ăp nuĭh dơi nchŏng đă, ntop n’hao n’hanh nsing nơm an lah ăp nuĭh mbra ntik n’hao uĕh nău khlay kan, nău dơn kan n’hanh di đah nău kan dơi jao, rhŏ dŏng ƀon lan, rgop rdâk njêng n’gor hun hao ndrel lam dak tâm rơh hun hao lhung jong săk. Groi Thủ tướng Nguyễn Hòa Bình đă rmôt cán bộ, công chức n’gor Lâm Đồng mhe ngăch lăp kan, an ƀư geh nău tam ăp nău dơn kan. Dăn đă ăp nuĭh dơi tâm pă ƀư nău kan, ntăm n’hao ân ntik n’hao nuih  n’hâm dơn kan, lăp ngăn tâm nău kan dĭl.  

Wa Y’Thanh Hà Niê Kđăm, Bí thư n’gor uỷ Lâm Đồng, njoal nau lah ueh tât Bộ chính trị hŏ rnơm đă râng Rnâng kan ndrel jao nau ƀư Bí thư n’gor uỷ. Bí thư mhe bah Lâm Đồng ton lah mra n’hao nuih n’hâm tâm rnglăp, tâm rgop ngăn ma ăp rmôt kan, gay leo n’gor mhe hun hao tâm di ma nau geh dơi ơm bah păng, tŏng dơi nau ŭch bah Đảng, Ngih dak ndrel ƀon lan. Tĭng nê, n’gor mra ndăn ngăn ăp nau geh êng ơm, geh neh ntu, yôk yang, dak lêng ndrel ăp nau khlay ơm bah n’gor gay ndâk nau hun hao văng sa, rêh jêng jŏ jong. Ntoh nau rhơn bah năp nau kan aơ, wa Điểu Minh, tâm xã Đức An, n’gor Lâm Đồng, ngơi:

“Lơ 1/7 jêng du n’gor mhe, mra âk rnoi mpôl rêh nsum, kơt lah: rnoi Bunong, Yoăn, Jrai, K’ho jêh ri Nùng, Tày ndrel âk rnoi êng đŏng. Mpeh nau ơm yau bah ăp rnoi ri geh êng êng đŏng, kơt lah nau mprơ, nau tur chiưng, goh gong, ngêt sa rƀŭn rgum kŏ geh nau ŭch tâm kơt. Tâm n’ur ăp rnoi mpôl tâm Lâm Đồng gay ma ăp nŭih bu dơi gĭt, kơp n’ăp ma n’gor êng kŏ blau gĭt đŏng tât nau kan ơm yau bah nơm”.