Tâm ntŭk kan du mpông ta Phường Ea Kao, rnglăp tă bah xã Ea Kao ndrel Phường Ea Tam, n’gor Dak Lak, tâm ăp nar rlong dŏng, nŭih ƀon lan tât ƀư nau kan geh kơl ƀư ngăch, năn. Wa H’Đinh Bkrông (Aduôn Y Sam) nŭih ƀon lan ƀon Alê B, nkoch nau ueh jêh rnôk ƀư jêh nau kan ân bu manh jrâu gŭ:

            ‘Nau rklaih ăp nau kan hành chính jêh rnôk tâm rnglăp ri gâp saơ ăp cán bộ ta aơ kŏ vơt dơn ueh ngăn, kơl an ƀon lan ngăch ngăn tâm nau đăng ký nau kan. Săm ƀŭt geh rklaih ngăch, gâp saơ geh âk nau rgâl đŏng”.

            Nau ngăn ntrŭnh ƀư nau rlong nau kan tâm ăp n’gor Dak Lak, Lâm Đồng, Gia Lai, ntrong kan hành chính hŏ kơl an ƀon lan du trong ueh. Tât ƀư nau kan mêt uănh nau nu nau, wa Nguyễn Đình Trung, Bí thư n’gor uỷ Dak Lak, rđau:

            ‘Phung he nkoch lah rlong ƀư yơn nkô̆ nau gay ma ntrŭnh ƀư rĭ ngăn. Aơ lah nhoat gay lơ 1/7 nơm ân geh ƀư nau kan ngăn ngên ân mô hôm geh nau vĭ vĕ. Ndri ma, ăp đồng chí tâm moh nau kan ăp đồng chí ân geh nchrăp ƀư ueh nau kan bah nơm, gay rnôk rƀŭn nchră ri rhuăt luh nau tă geh dơi, geh nau rgum gay ma tâm nchră nsum”.

            Tâm Gia Lai, nau kan dăp rgum, ƀư rtŭt gleh trong kan, ƀư nau kan n’gâng kan tâm nkuăl 2 gưl, hŏ ƀư ân rjăp. Wa Hồ Văn Niên, Bí thư n’gor uỷ Gia Lai, mbơh kloh:

            ‘Lĕ ntrong kan chính trị bah n’gor dôl rgum ntrŭnh ƀư nau kan n’gâng kan tâm nkuăl 2 gưl tâm ban ntơm lơ 1/7. Êp nê, n’gor dôl ntrŭt dăng âk nau ntrŭnh têh kơt lah n’hao nau ntrŭt dăng ntrơn rgâl mrô, dŏng nau kan khoa học công nghệ, doh rklaih nau nkol gay ma ntrơn ntŭk ƀư kan, ntrŭt dăng nau pa ưtơm prăk ntuh kơl nsum ndrel ntrŭnh ƀư ăp nau kan tơm gay ma đăp mpăn nau ngăch hun hao tâm năm 2025 ndrel njêng trong nâp nâl ân năm kan mhe”.

            Tâm Dak Nông, rnôk nau rlong ƀư bah n’gâng kan gưl xã mhe geh ƀư ân dơi, nŭih ƀon lan ngăn ngên rnơm tâm nau dăp rgum, rnglăp bah rmôt kan hành chính. Wa H’Thương, tâm xã Nâm Nung, ntoh nau:

            ‘Rnglăp ma n’gor Bình Thuận, Dak Nông ndrel Lâm Đồng tĭng gâp ndơn uănh lah ueh ngăn. Nơm geh tŏng nau dơi gay hun hao văng sa ăp ntil, geh bri, geh dak lêng; kơt Dak Nông geh nhôm Bô-xít; Lâm Đồng geh pâl n’aih Đà Lạt ntoh lư gay hun hao. Bình Thuận hun hao mpeh dak lêng, geh nau dăng mpeh tui ka, reng, mực...kơt nê, 3 n’gor tâm rnglăp nsum ri văng sa, rêh jêng nar lơn ma hun hao”.

            Tâm n’gor Lâm Đồng mhe, dĭng lĕ nau rlong leo lăp ƀư nau kan geh dơi mêt uănh rjăp.  Wa Y Thanh Hà Niê Kđăm, Bí thư n’gor uỷ Lâm Đồng, lah rjăp, ăp nau kol, nau vĭ vĕ geh rklaih ndal lor ma 124 xã, phường, ntŭk kan hành chính lăp kan ngăn:

            ‘Ƀư jêh nau kan dăp rgum pă cán bộ, công chức, viên chức, nŭih pah kan mô geh ƀư du ntil nau kan tât ntŭk ƀư nau kan gay ma pah kan, gay dŏng ƀư ntrong kan mhe. Đảng uỷ, UBND n’gor, rđau kan UBND n’gor rđau ƀư ueh nau kan nchrăp mpeh ntŭk ntu ƀư kan, ndơ dŏng kan, máy móc, trong nkoch nau, phần mềm kơl an nau kan, ntŭk kan mhe, đăp mpăn ƀư dơi nau kan tă bah n’gor tât xã, phưngf, đặc khu tâm ban ntơm lơ 1/7/2025”./.