N’gor Gia Lai dôl nsrôih tăm rơ̆ jêng prit tĭng trong rƀŏng dŏng công nghệ mhe, gay n’hao rnoh khlay ndơ tăch n’hanh rdâk njêng tơm prit jêng ndơ tăch n’gluh khlay. Aơ lah njuat hăn khlay tâm dăp rgum n’gâng kan tuch tăm, rgop rdâk njêng ƀon lan mhe tĭng trong têh uĕh.

Kơp tât bôk năm 2025, rnoh hvi neh tăm prit ta Gia Lai âk 7.300 ha, rnoh âk geh play nklăp 237.000 tấn. Công ty cổ phần Nông nghiệp công nghệ cao Hưng Sơn dôl mât chăm rlău 550 ha prit ta ăp nkuâl Đăk Đoa n’hanh Chư Prông, n’gor Gia Lai. Ăp năm, công ty tăch n’gluh nklăp 20.000 tấn prit tât ăp ntŭk tăch têh kơt Nhật Bản n’hanh Hàn Quốc. Nchrăp, rnoh âk play năm aơ n’hanh năm tât mbra hao 35.000 tấn. wa Nguyễn Quang Anh, Kruanh Hội đồng quản trị công ty, an gĭt nơm geh dŏng trong tŏ ntruh công nghệ Israel, dŏng drone mât njrăng bu tuh n’hanh kho kât nđik tâl prăp, prit bah công ty hŏ leng dơi ăp ntŭk tăch rgâl khăch khoch.

“Nkual neh guh bazan dŭt tâm di đah tơm prit, tơm prit nsĭt tay nău geh wăng sa âk, lah nsĭt tay nău dơi âk ri ân geh ăp trong nkra, ăp rêng ƀư na nê̆, ân êt lhăt, ân mât kân dơi bu tuh, nău hao jêng bah tơm. Aƀaơ mpôl hên tăch n’gluh tât Hàn Quốc, Nhật Bản, Trung Quốc n’hanh Trung Đông. Êng 4 ntŭk tăch dja nha mô tŏng ndơ gay tăch n’gluh đŏng”.

Lam n’gor Gia Lai aƀaơ hŏ wăch rgum geh 50 ntŭk tăm prit đah rnoh hvi rlău 8.500 ha, lĕ rngôch tơm prăk ntuh kơl 10.000 rmen prăk. Tâm nê, Tập đoàn Hoàng Anh Gia Lai hŏ nsrôih râng hun hao rêng rnoh khlay tơm sa play. Aƀaơ tập đoàn dôl hun hao nkual tăm prit nklăp 7.000ha ta Gia Lai, Lào n’hanh Campuchia. Wa Nguyễn Ngọc Mai, Giám đốc Công ty Cổ phần Mât rong Gia Lai (mpeh Tập đoàn Hoàng Anh Gia Lai), an gĭt, đah neh ntu tâm di, prit bah công ty săk kah uĕh.

“Nkual tăm prit chà Nam Mỹ bah công ty mpeh nkual neh guh bazan geh rnoh âk rđĭl đah rnoh dak lêng lah 800m ndrĭ nta trong dơh bên di an tơm prit chà Nam Mỹ. Tă bah săk geh, rnoh prêh n’hanh tơm rêh jong năm jêng săk kah prit  rđĭl đah ăp nkual êng ƀa ƀă lah âk rlău lơn”.

Aƀaơ, play prit bah n’gor Gia Lai aƀaơ hŏ geh tăch ta âk ntŭk khăch khoch kơt Nhật Bản, Hàn Quốc, Trung Đông... an saơ nău dơi tâm rlong n’hanh săk kah tŏng di rnoh dak bah dih. Wa Đào Thị Thu Nguyệt, Groi Giám đốc Sở Công Thương n’gor Gia Lai, lah rjăp:

“Đah prit tăch aƀaơ dôl tĭng kơn năl dơi săk kah n’hanh săk ntơ lư prit bah Tây Nguyên lah nsum n’hanh Gia Lai lah êng. Aƀaơ, ntŭk tăch bah Gia Lai ntơm hun hao n’gâng kan prit đŏng, joi geh tay ăp dak rvăt n’glăp prit gay pơk hvi, joi ntŭk tăch rgâl”.

Đah nău dơh uĕh neh ntu bri dak n’hanh trong rƀŏng hun hao tuch tăm công nghệ mhe, tơm prit dôl tĭng kơn năl dơi săk khlay lah ndơ geh ƀư tuch tăm tăch n’gluh tơm bah Gia Lai. Nău ntuh kơl ntŭk mât prăp, pơk hvi rêng tâm rgop kan n’hanh n’hao nău dơi lăp tâm ntŭk tăch rgâl khăch khoch mbra lah tơm ndơ khlay gay kơl n’gâng kan tơm prit hun hao, rgop uĕh tâm nău hun hao wăng sa tuch tăm, hun hao thôn ƀon ta n’gor./