Nđơr răm nti njroh ndrel ăp băl ta Jay văn hóa thiếu nhi Dak Lak, oh Nguyễn Thục Quyên, 13 năm ta phường Ea Tam, nkual ƀon têh Buôn Ma Thuột an gĭt, lôch năm nti dâl, oh lĕ nchrăp lor gay geh ăp nar rlu nti ŭch n’hanh uĕh. Aƀaơ, Quyên lĕ dăn nchih săk tay 2 jrô năng khiếu tay ta jay văn hóa.

Tâm khay aơ kon mbra hăn pâl cầu lông n’hanh rgum rƀŭn ta aơ, hôm 2 khay bah kơi ri kon mbra nti tay yan rlu nti, nti Toán n’hanh tiếng Anh. Tât khay 8 kon mbra hăn pâl ta Gia Lai. Năm aơ kon dơi mê̆ dăn nchih săk ƀư nău ngăn 5 nar 4 măng ta chùa Liên Trì ta Gia Lai, kơl kon n’hŭch ŏk r’ah jêh du năm nti jong.

Gay oh kon geh du yan rlu nti uĕh, âk me bơ̆ dŭt n’hâm mĭn joi n’hanh kơl dăn nchih săk ăp nău ƀư. Nău ƀư yan rlu nti ta Dak Lak mô knŭng nta an nău răm, tiăr nti nău blău ma hôm rƀŏng tât kơl kon se n’hŭch mâp ăp ndơ điện tử n’hanh dêr ngai nău geh rmanh sôt săk. Yuh H’Duyệt Niê, ta phường Tân Lập, nkual ƀon têh Buôn Ma Thuột, n’gor Dak Lak an gĭt:

Yan rlu nti ŭch nta an mon pâl, răm ngăch, janh lơn, geh âk băl n’hanh nti nsơm geh âk ntil. Mon ngih gâp aƀaơ dôl nti jrô Dance-kids, nti njroh bah năm e tât aƀaơ, mon ŭch njroh jêng gâp hôm e an kon nti njroh.

Ta Jay văn hóa Thanh thiếu nhi Dak Lak, geh rlău 2.000 druh ndăm rchong dôl râng ăp jrô nti năng khiếu kơt njroh, mprơ, vẽ, leo ndrĭng nău ngơi, thể thao, võ thuật... Lơn lah, bôk nău “Nti yan rlu nti tâm tahen” kơl hang rhiăng kon se bah 8 tât 15 năm dơi geh ƀư ngăn ntŭk ntô tahen kỷ luật, mô tivi, mô điện thoại. Yuh Nguyễn Thị Thúy Hiền, Groi giám đốc mât uănh Ngih văn hóa Thanh thiếu nhi Dak Lak nkoch:

Yan rlu nti lah yan ma jay kon se dŭt răm. Rlău 30 ntil jrô nti ƀư bah 5h30 tât 21h, tâm di đah âk nuĭh kon hŏk bah 2 năm let lơ. Năm aơ, rlău ma mât ăp kôp nău nti ƀa ƀơ kơt bah năp đaơ mpeh ntil nău văn hóa, nghệ thuật, thể dục thể thao, nău blău rêh ri mpôl hên hôm uănh khlay tât nău ƀư an dơm, ăp ntŭk pâl mhe, ƀư ngăn nkêng mpeh nău mĭn bôk rngok, uănh khlay njrăng n’gang rmok dak n’hanh rmanh sôt săk an ăp oh.

Ta ăp ƀon lan, kon se Dak Lak dôl ntơm lăp yan mih n’gŭr răm. Oh H Juliê Byă, 9 năm, ta ƀon Ea Tul, nkuăl Cư M’gar nkoch, yan rlu nti di an tĭng ăp nău ŭch. Mô hăn nti ta ngih samƀŭt jêng oh geh âk mông nar gay nti tay ăp nău blău n’hanh răm rlưn dah ŭch.

Tâm khay rlu nti, kon nti tiếng Anh, Toán, nti MC, nti nchih, nti gŏ Piano. Nĕ lah ăp môn kon ŭch. Rlău ma nĕ ăp rnôk ru, kon răk nđơn n’hanh pâl rlưn đah oh kon n’hanh đah ăp băl tâm nkual kon gŭ.

Tâm yan rlu nti lah rnôk geh Khay pah kan yor kon se, yor nê, ăp nău ƀư mât njrăng, mât rong n’hanh ntĭm nti kon se lơ dơi uănh, uănh khlay. Tâm năm aơ đah bôk nău “Kơl lor tơm prăk jêh ăp nău rƀŏng yor kon se”, bah n’gul khay 5, UBND n’gor Dak Lak lĕ an trong nchrăp ƀư Khay pah kan yor kon se. Tâm khay 6, Dak Lak rgŏ jă “Yan rlu nti yor kon se” đah ăp nău ƀư nkoch trêng ntĭm nti n’hanh nkoch mbơh ntĭm re, njrăng n’gang rmok dak an kon hŏk lam n’gor. Ta ăp ntŭk ƀon lan gŭ, mpôl druh ndăm ƀư rgum rƀŭn yan rlu nti an kon se ta ntŭk gŭ âm đah âk nău ƀư âk ntil, uĕh răm. Yuh Phan Thị Trinh, Groi bí thư N’gor đoàn Dak Lak, an gĭt.

N’hao tâm rgop đah ăp nău kan gay mbơh ƀư gĭt nu nău n’hanh mkra ăp nău geh tât đah kon se. N’hao trong kan njrăng n’gang ta bah dâng gay an ăp oh geh âk nău pâl rlưn tâm rơh rlu nti m’hâm ƀư an tŏng ăp n’hanh đăp mpăn. Mbơh ƀư tay nău rgŏ jă Yor mpôl oh he rŏng, rgum tâm ăp nkô̆ nău mpeh an prăk kơl hăn nti mô lah ndâk ƀư n’hanh nkra ăp ndơ dŏng pâl rlưn an ăp oh kon se, lơn lah ta ăp nkual jru ngai n’hanh ăp ntŭk jêr jŏt.

Đah nău ndrel ty bah ăp gưl, ăp nău kan, n’hanh yor bah nău nchrăp bâh ăp gưl me bơ̆, kon se Dak Lak dôl dơi geh du yan rlu nti ngăn ngên răm m’ak, đăp mpăn n’hanh geh nkô̆. Ăp nău ƀư, ăp ntŭk pâl mô knŭng lah nău răm, ma hôm lah trong hăn an ăp oh ntop tay nsing nơm, têh jêng lơn jêh ăp nar rlu nti./.