Câu lạc bộ cheh tanh ƀon Phung ndâk njêng tĭng nuih n’hâm ŭch êng bah ăp nuĭh tâm rmôt, nău ma bu ur rnoi mpôl Jarai ta ntŭk. Câu lạc bộ geh ntŭk kan n’hanh jrô mpla nsơ ndơ ta jay bah ngih nhân Rơ Lan Pel, Chủ nhiệm Câu lạc bộ. Ăp nuĭh tâm Câu lạc bộ cheh tanh ƀon Phung dơi tanh brai ta câu lạc bộ mô lah ta jay nơm. Nô Đưk, kruanh ƀon Phung, an gĭt:

Nău kan cheh tanh lah nău kan way ơm bah u che. Nău kan geh bah jŏ, dơi trêng ntĭm bah rơh u che tât kon sau. Oh yuh bu ur ndâk njêng Câu lạc bộ cheh tanh ƀon Phung gay mpla nsơ nău kan way ơm bah ƀon. Câu lạc bộ geh 23 nuĭh. Oh yuh ntĭm nău kan an rơh druh ndăm, geh 10 mon dôl nti nău kan. Oh yuh tanh kho, ao, bok... Tanh đah ty, jêr ngăn, rup ndrang uĕh. Ăp pơh, oh yuh tâm rgâl nău blău ơm ta jay Chủ nhiệm Câu lạc bộ. Ndơ cheh ndrang way khlay 500.000 prăk (bơi 20 đôlar), cheh ndrang uĕh 2.000.000 prăk (bơi 800 đôlar).

Tĭng tâm ntil ndơ tanh ma nar khay jêh ndơ êng êng đŏng. Dơi lah 1 pơh, 2 pơh... geh rnôk du khay mhe ƀư jêh du ndơ. Ndơ tanh âk ntil têh jêt, rup gui uĕh, âk ntil. Yuh Ngân, nuĭh tâm câu lạc bộ cheh tanh ƀon Phung, an gĭt:

Câu lạc bộ cheh tanh ƀon Phung way tanh ăp ndơ lah kho, ao, troi, dŭng, bok... Rup ndrang ăp rnoi nuĭh êng êng. Ăp rnoi nuĭh Êđê, Bahnar, Jarai geh cheh ndrang tâm ban. Nuĭh Jarai ri êng rnoi nuĭh Bahnar du đet, nuĭh Jarai geh âk rup ndrang. Yor mô hŏ mpla nsơ âk jêng ntŭk tăch ndơ bah Câu lạc bộ tăch âk tâm ƀon, tâm n’gor Gia Lai. Năch pâl nđaih dak bah dih, Mỹ, Canada. Ấn Độ geh tât ƀon rwăt ndơ. Năch ta nkual ƀon têh Hồ Chí Minh hăn ta aơ nchăm ndơ đŏng.

Tâm rnôk tanh, gưl tanh cheh ndrang dŭt jêr n’hanh roh âk mông nar. Cheh ndrang ta nah tanh ta aơ dŭt âk ntil, dŭt âk lah ăp cheh ndrang rup, kơt: rup rwang, jôch, rup mlâm... Ăp cheh ndrang geh nkô̆ nău êng, lah nău gŭ âm, nău rêh ƀon lan ăp rnoi nuĭh. Du hê Câu lạc bộ tanh ƀon Phung, an gĭt:

Cheh ndrang dŭt jêr. Ƀư kho ao bu ur jêr lơn kho ao bu klô.

Mô knŭng nkra njêng, mât rƀay nău kan, Câu lạc bộ cheh tanh ƀon Phung hôm tâm rgop ndrel đah hun hao pâl nđaih ta ntŭk. Tâm jrô mpla nsơ ndơ bah Câu lạc bộ cheh tanh ƀon Phung mpla nsơ ăp rpăi tanh way ơm. Rnôk tât uănh nsong, năch dơi ăp nghệ nhân nkoch nău way ơm, nău uĕh uĕh bah nuĭh Jarai, nkoch nău kan way ơm bah ƀon n’hanh dơi ntĭm, ƀư ngăn n’hêl na nê̆ tanh bok.

Yuh Rơ Lan Han, kon bu ur bah nghệ nhân Rơ Lan Pel, Chủ nhiệm Câu lạc bộ cheh tanh ƀon Phung, lah nuĭh nkoch đah nău ngơi Yuăn, nău ngơi Anh n’hanh nău ngơi Jarai ăp rnôk geh mpôl năch pâl nđaih tât uănh nsong ƀon Phung. Yơn cheh tanh lah nău kan ntop êng yơn rgop rgâl nău rêh an ăp nuĭh bah câu lạc bộ cheh tanh ƀon Phung. Yuh Rơ Lan Han an gĭt:

Bu ur Jarai an gĭt cheh tanh yor nĕ lah nău way ơm. Nău kan khlay bah oh yuh hôm e nău kan lŏ mir, hôm nău kan cheh tanh lah ntop dơm. Nung nar, oh yuh hăn mir, hăn lŏ hôm măng an mông nar cheh tanh, ƀư ntop an geh prăk an rnăk wâl. Aƀaơ, Nău kan cheh tanh nta an oh yuh geh joi nău rêh, mât rêh rnăk wâl. Câu lạc bộ tăch ăp ndơ tă bah mạng xã hội, facebook, tiktok... Nuĭh rwăt ŭch ndơ ri nchăm ndơ. Ring 1 blah ndơ ƀư tâm 1 pơh hôm đah ăp ndơ rup cheh ndrang jêr ri ƀư tâm 2 pơh mô lah du khay.

Ăp nuĭh tâm Câu lạc bộ cheh tanh ƀon Phung dŭt n’hâm mĭn joi, nti, rgâl mhe rup gui. Knơm nĕ, ndơ ƀư geh dŭt uĕh, âk ntil, nar lơ tâm di đah nuĭh ŭch bah năch. Câu lạc bộ jêng ntŭk ang tâm hun hao wăng sa-rêh jêng nkual thôn ƀon ta nkual ƀon têh Pleiku, n’gor Gia Lai.