Ntrong leo, hăn lor tâm hun hao wăng sa, đảng viên Tòng Văn Lải, chi bộ ƀon Co Phung, xă Hua La, nkual ƀon têh Sơn La, n’gor Sơn La lĕ săch ntrong kan tăm cà phê, mât rong ndrôk rpu, sŭr djăr gay nkre ƀư ntrong kan rlong lor an kônh wa ƀon lan tât nti, nkre hun hao wăng sa rnăk wâl.

Knơm kơt dŏng khoa học kỹ thuật kơt poh phân, koh n’ging di rnôk đah tơm tăm; chuh vaccine n’hanh n’hao tŏng ăp ndơ kah an mpôl mpa rong, tât aƀaơ, ntrong kan wăng sa hvi 1,5 ha bah rnăk wâl ăp năm tăch rlău 40 kon sŭr; 15 tấn play cà phê rih, nkŭp lĕ prăk dŏng, an geh 300 rkeh prăk.

Đảng viên Tòng Văn Lải nkoch, bah săk rnglăy wăng sa na nê̆ bah ntrong kan, săk nô nơm ƀa ƀơ kơl, ntop an ăp rnăk tâm ƀon, tâm xă mpeh kỹ thuật mât tăm, tơm, kon ntil gay n’hao nău nkra njêng, rgâl tơm tăm, n’hao nău geh:

Gâp ntrŭt đă oh nô ƀư tĭng gâp, gâp ƀư geh moh ndơ ri đă khân pơng ƀư tĭng. Oh nô mô geh prăk ri gâp an manh đŏng, kơt ŭch rwăt sŭr ntil, mô lah ndrôk sĭt mât ri gâp rgop prăk an oh nô.

Ƀư tĭng Bôk nău kan ndâk njêng thôn ƀon mhe, chi bộ ƀon Co Phung, xă Hua La, nkual ƀon têh Sơn La, n’gor Sơn La lĕ rgŏ jă ăp rnăk ndrel tâm nchră, tâm ban ŭch ƀư tĭng săk rnglăy ăp rnoh ndơ ƀư, ngăn lah nău ƀư trong hăn tâm ƀon, mât uĕh rmôt liên gia mât uănh êng mât rnă njrăng đăp mpăn, ndâk njêng nău uĕh lăng mhe...

Bah năm 2021 tât aƀaơ, chi bộ ƀon lĕ rgŏ jă kônh wa rgop 650 rkeh prăk, an rlău 500 mét vuông neh, bơi 2.000 nar luh; âk rnăk nchrăp rơih jăng, nkra, trơn jay gŭ gay ndâk ƀư 1,6 km trong bê tông; 4 km măt neh ƀư trong tâm ƀon, rhŏ an nău ŭch hăn nsong, tăch tơr ndoh ndơ. Wa Lèo Thị Tiển, rmôt liên gia mât uănh êng mrô 5, ƀon Co Phung an gĭt:

Nar bah năp trong hăn jêt hăt, aƀaơ dơi Ngih dak ƀư trong mhe an kônh wa hăn dơh, rnăk wâl tâm ban ŭch đŏng rnôk an koh lơi jrong jay bah gâp.

Tĭng wa Lò Văn Hội, Bí thư chi bộ, Kruanh ƀon Co Phung, bơi 10 năm bah năp, chi bộ mĭn lah ăp nkô̆ nău ƀư mhe, geh: n’hao uĕh rgum rƀŭn chi bộ; rgâl mhe trong ntĭm rđău; ndâk njêng nău rêh văn hóa ta nkual gŭ âm; rgŏ jă nuĭh ƀon lan rgâl ntil tơm tăm, mpa rong tâm di... Tât aƀaơ, ƀon geh 240 rnăk, rlău 1.100 nuĭh, tâm nĕ hôm 5 rnăk êp ach o, mô geh rnăk ach o; nău geh rĭng nuĭh ŭch geh 50 rkeh prăk/du/năm; tâm ƀon lĕ ntoh âk ntrong kan nkra njêng geh prăk hăng rhiăng rkeh prăk/năm:

Tâm năm tât, chi bộ kơt ăp đồng chí đảng viên mbra nti tay tĭng ntoh ang nău mĭn, pah kan Hồ Chí Minh, rgŏ jă kônh wa nuĭh ƀon lan hun hao wăng sa, răk kloh ntŭk ntô gŭ âm, hun hao wăng sa thôn ƀon mhe n’hao prêh. Rgum n’hao hun hao wăng sa rnăk wâl, kơt dŏng khoa học kỹ thuật, mât rong ndrôk rpu, sŭr djăr, ăp ntil tơm sa play êng geh rnoh khlay wăng sa âk.

Wa Lò Văn Chính, Bí thư đảng ủy xă Hua La, nkual ƀon têh Sơn La an gĭt, ƀư tĭng ntĭm đă mrô 5 bah Bộ Chính trị, chi bộ ƀon Co Phung lĕ tâm pă đảng viên tĭng jăp nghị qquyết bah chi bộ, mât uănh nău kan mbơh ƀư ta ăp rmôt, rkum ƀon lan gŭ. 40 đảng viên tâm chi bộ lah nuĭh Thái da dê, ntrong lep lôch uĕh nău kan dơi pă, đăp mpăn nău ƀư ntĭm rđău bah chi bộ, ăp nău kan bah ƀon, ăp rmôt kan nsum mpôl dơi mât n’hanh ƀư tĭng uĕh.

Băng: Lơn lah ăp đảng viên tâm chi bộ lĕ geh lôch đah nău kan ƀư mbơh tât ăp rmôt liên gia kơt rkum ƀon lan gŭ bah nơm mpeh nău ntrŭnh, nău kơl bah Đảng, pháp luật bah Ngih dak, lơn lah nghị quyết bah chi bộ n’gluh an ăp khay tâm hun hao wăng sa rêh jêng, kơt lah nău rêh văn hóa rêh jêng bah ƀon nơm. Bah nĕ kônh wa dơi wât, ndrel tâm rnglăp, ndâk njêng, n’gluh an nău rgop, trong mkra, gay m’hâm ƀư n’hao nău rêh drăp ndơ, nuih n’hâm bah kônh wa nuĭh ƀon lan.

Nti n’hanh ƀư tĭng Wa đah âk nău ƀư na nê̆, ngăn ngên, mât uĕh nuih n’hâm tâm rnglăp, tâm yô̆ tâm kơl, gơih nđơr tâm pah kan, nkra njêng, ƀon Co Phung lĕ n’hanh dôl rgâl tĭng ăp nar, muh măt thôn ƀon nar lơ rgâl uĕh; ăp nău rlŭk mâl ta tâm nsông nsao, khĭt ôm dơi jut jăng; âk nău uĕh văn hóa ăp rnoi nuĭh dơi mât ndrăy n’hanh ƀư uĕh. Na nao âk năm, chi bộ ƀon Co Phung jêng chi bộ ntoh lư bah nkual ƀon têh Sơn La.