Đơ̆ng blŭng sơnăm truh dang ei, Đắk Lắk chih iŏk 9 ‘nu bơngai jĭ COVID-19, tơ̆ 5 apŭng păng pơlei tơm Buôn Ma Thuột. Đĭ đăng dôm bơngai jĭ âu tă kơ jĭ lăp ai ngăl. Mă lei hăm lơ tơdrong roi tơbăt găh tơdrong đei ƀôh hơ lơ̆k dơ̆ng đơ̆ng jĭ COVID-19 tơ̆ 1,2 tơring, anih pơgang Đắk Lắk hlôi kơchăng athei dôm anih jang hơtŏk loi dơ̆ng dăr hơlen kơjăp tơdrong jĭ hơbuh.

Ƀok Lê Phúc, Phŏ Kơdră Anih vei lăng tơdrong jĭ jăn (CDC) Đắk Lắk roi tơbăt, anih jang hlôi jang hơdai hăm Anih jang Vệ sinh Dịch tễ Tây Nguyên vă tơblang hơdăh tơdrong hơmơt, hơlen lăng păng tơlĕch jang dôm trong jang tang găn jĭ mă lăp. Hơdai hăm ‘noh, Anih jang kŭm pơgơ̆r pơhrăm hơtŏk ‘lơ̆ng tơdrong kĕ jang ăn khŭl jang pơgang găh tơdrong jang dăr hơlen, chă ƀôh hrôih bơngai jĭ COVID-19, dăr hơlen păng hơmet ‘lơ̆ng hơnih đei jĭ kiơ̆ ƀlep trong jang.

“Nhôn đei jang tơgŭm hla ar pơtho găh tơdrong joăt jang kŭm nhen tơgŭm ăn Anih jang vă athei dôm anih jang tang găn jĭ, hnam pơgang, mă loi ‘noh jĭ găh hnam pơgang ‘noh hơtŏk loi dơ̆ng trong tơlĕch jang sơng iŏk păng hơmet ăn tôm ăn tơdrong pơm lăp hăm tơdrong jĭ COVID-19 tơdăh đei tŏk lơ. 1,2 anih hơmet jĭ kŭm hlôi tơlĕch ăn 1,2 hơnih ăn oei hơdrô̆, hơtŏk loi dơ̆ng vei lăng tơ jră tơpoh lơ̆m hnam pơgang. Dôm anih jang tang găn ‘noh hơtŏk loi dơ̆ng dăr hơlen bơngai jĭ, hơmet pơ ‘lơ̆ng dôm hơnih đei jĭ tơdăh đei”.

Kơchăng tơ jră hăm tơdrong jĭ COVID-19, Anih vei lăng jang pơgang dêh char Kon Tum jang hơdai hăm dôm anih jang ƀơm truh hơtŏk loi dơ̆ng dôm tơdrong jang roi tơbăt, krao hơvơn kon pơlei bơ̆jang kiơ̆ ‘lơ̆ng dôm trong jang kơdih tang găn jĭ COVID-19. Dăr hơlen, vei sơđơ̆ng jang tơgŭm, tơmam, pơgang, kơmăy kơmŏk, bơngai jang pơm lăp hăm ‘meh vă tang găn jĭ. Hơdai hăm ‘noh, anih jang pơgang dêh char Kon Tum kŭm kơchăng dăr hơlen kơjăp tơdrong jĭ hơbuh, hơtŏk loi dơ̆ng tơlĕch jang dôm trong jang tang găn jĭ tơ̆ anih jang pơgang, tơpôl păng ‘măng jang sơlam apŭng plĕnh teh Bờ Y. Jang hơdai kơjăp hăm Anih jang Vệ sinh Dịch tễ Tây Nguyên tơblang hơdăh tơdrong păng hơlen lăng tơdrong krê hơmơt vă tơlĕch dôm trong jang tang găn trŏ lăp.

Ƀak si Đỗ Ngọc Hòa, Phŏ Kơdră Anih vei lăng jang pơgang dêh char Kon Tum, roi tơbăt: “Nhôn kŭm athei rim anih jang kơ dêh char, Anih vei lăng kon pơlei dôm apŭng, pơlei tơm hơtŏk loi dơ̆ng tơdrong jang tang găn jĭ COVID-19 tơ̆ dôm hơnih tơmang lăng, ngôi pơchơt. Hơdai hăm ‘noh hơtŏk loi dơ̆ng tơdrong jang pơtho tơtă kơ kon pơlei pơm kiơ̆ dôm trong jang tang găn jĭ ăn kơdih. Mưh kơ dih kâu đei ƀôh yuh, hiĕn, dui jơhngơ̆m pơmat kăl kơ năm hloi tơ̆ hnam pơgang jê̆ hloh vă đei hơlen lăng păng hơmet tơtom”.

Hăm tơdrong ƀet vaccine COVID-19, kiơ̆ kơ Phŏ Kơdră Anih vei lăng jang pơgang dêh char Kon Tum, dang ei kơsô̆ ƀet tôm kơliêu vaccine lơ̆m akŏm đĭ đăng kơsô̆ kon pơlei kơ dêh char đei dang 83%. Ƀak si Đỗ Ngọc Hòa pơtho tơtă, tơdăh kon pơlei ‘meh ƀet vaccine COVID-19, gơh năm truh tơ̆ anih jang pơgang jê̆ hloh vă chih măt. Kiơ̆ đơ̆ng noh, anih jang pơgang gô akŏm, apĭnh Anih jang Vệ sinh Dịch tễ Tây Nguyên asong vaccine vă ƀet ăn kon pơlei. Đơ̆ng blŭng sơnăm 2025 truh dang ei, lơ̆m dêh char Kon Tum tam mă chih iŏk bơngai jĭ COVID-19.

Anih vei lăng jang pơgang Lâm Đồng hlôi athei dôm anih khăm, hơmet jĭ lơ̆m tơring hơtŏk loi dơ̆ng tơdrong jang khăm, chă ƀôh, hơmet bơngai jĭ Covid-19. Dăr hơlen păng chih tơroi trong tơlĕch jang sơng iŏk, hơmet bơngai jĭ Covid-19 tơ̆ anih jang kiơ̆ tơ dra hơdrol tơdrong jĭ hơbuh, ưh kơ lê̆ tơdrong tơ jră jĭ đei ƀôh ưh kơ ê. Hơmet ăn tôm anih jang, tơmam, hơnih ăn oei hơdrô̆, tơmam pơgang vă pơgơ̆r sơng iŏk, ăn oei hơdrô̆, hơlen lăng jĭ, hơmet jĭ ăn bơngai jĭ, vei sơđơ̆ng ăn bơngai jĭ găh grŭp krê hơmơt lơ ( nhen drŏ kăn oei hơnăp, bơngai đei tơdrong jĭ đơ̆ng hơdrol, jĭ ăl, bơngai kră...), hơnih hơmet jĭ ăl, jĭ plei nuih, plei lĕn, răih.... Pơm kiơ̆ tơpăt dôm trong jang tang găn tơpoh jĭ kiơ̆ trong dui jơhngơ̆m, găn tôch ai tơpoh jĭ lơ̆m hơnih khăm jĭ, hơmet jĭ. Hơtŏk loi dơ̆ng tơdrong jang pơm rơgoh tơ̆ ‘ngoăih, tơ̆ lăm hơnih hơmet jĭ, hơmet ăn hơnih hơmet hiôk, lăp hăm tơdrong jĭ păng vei sơđơ̆ng cham char rơgoh, ‘yâu, ‘lơ̆ng.

Anih vei lăng găh jang pơgang Lâm Đồng athei Anih vei lăng Tơdrong jĭ jăn dêh char pơm tơm hơtŏk loi dơ̆ng hơlen lăng, dăr lăng tơdrong pơm kiơ̆ dôm trong jang tang găn jĭ tơ̆ dôm anih jang pơgang lơ̆m dêh char. Dăr hơlen, chih tơroi trong tơlĕch jang, hơmet ăn tôm bơngai jang, vei sơđơ̆ng kơmăy kơmŏk pơgang pơyua ăn tơdrong jang tang găn jĭ, vă kơchăng pơm lăp hăm dôm tơdrong đei ƀôh đơ̆ng jĭ hơbuh, ưh kơ gơh pơm pơhơi lơ̆m hlôh vao păng bơ̆jang, tơlĕch jang ‘lơ̆ng tơdrong jang, hơnăp jang joăt jang hai.