Đang viên H’Đàn Niê (45 sơnăm, hơdrung Êđê) oei lơ̆m ƀuôn Sŭt Hluôt, tơring Cư Suê, apŭng Cư Mgar, ‘nao tŏk pơm Ƀĭ thư Chi ƀô̆ ƀuôn jăl jang 2025 – 2027. Mŏ H’Đàn tơbăt, ‘nou jing tơdrong lăp đon kơtang đơ̆ng đang viên lơ̆m pơlei, mă lei  jei ƀĕnh ƀang tơdrong long, hơnăp jang kơtang lơ̆m chăl tơplih ‘nao hrei ou. ‘Ngoăih vei lăng năng tông 1ha 2 sao chehphe, tiu, dôm năr ou, mŏ atŭm hăm rim kang ƀô̆ tơring, pơlei vang năm truh hăm rim pơlei vă iŏk nơ̆r tơgop găh tơdrong tơplih ‘nao Khôi luơ̆t tơm Teh đak, tơblang hơdăh trong bơ̆ jang đơ̆ng Đảng, Teh đak vă kon pơlei hlôh vao păng lăp đon găh tơdrong hơgrop tơring, hơgrop dêh char, pă đei apŭng bơih. Mŏ H’Đan tơbăt:“Ba hlôi năm truh rim ŭnh hnam chă pơtho tơbăt hơdăh găh tơdrong hơgrop tơring, pơjing tơring păng phương ‘nao. Dang ei hơnơ̆ng chă pơrô̆ pơtho tơbăt ăn kon pơlei dơ̆ng găh tơdrong hơmet ming Khôi luơ̆t tơm teh đak, vă rim răih bơngai băt hlôh ƀôh hơdăh trong bơ̆ jang trŏ lăp, trŏ ƀlep hăm tơdrong atŏk tơ iung kơ Teh đak lơ̆m chăl hrei ou”.

Đang viên sơnăm mơlôh H’Wêm Aliô, oei lơ̆m ƀuôn Sŭt Hluôt, tơring Cư Suê, tơbăt, mŏ H’Đàn Niê jĭ pơngai pơchoh trong choong glung ăn rim boăl mơlôh kiơ̆ yok rok jơ̆ng: “Mŏ H’Đàn tơbăt ăn kơ ba mơ̆t lơ̆m Đảng păng đei pôk tơmơ̆t hloi, dang ei ‘noh đang viên hmŏ ăn. Đĭ đăng jĭ gơnơm tơdrong chă tơgŭm djru, pơtho khan phăl hơlăng đơ̆ng mŏ H’Đàn Niê. Ba gô hơdrin hloh dơ̆ng atŏk tơ iung mŭk drăm vă jang sa iŏk yua đei ƀôh hloh, sơđơ̆ng ăn tơdrong jang lơ̆m tơring, tơ̆ pơlei”.

Tơ̆ ƀuôn Sŭt M’Đưng, tơring Cư Suê, apŭng Cư M’gar, đang viên H’Đao Êban (38 sơnăm, hơdrung Êđê) jei ‘nao đei pôk pơm Ƀĭ thư Chi ƀô̆. Hlôi đei bơ̆ jang pơm Ƀĭ thư Chi đoàn, Kơdră chĕp pơgơ̆r Pơlei, mŏ băt hlôh ƀôh hơdăh dôm tơdrong tơnap tap păng tơchă trong tơgŭm ăn kon pơlei atŏk tơ iung. Sơnăm 2018, mŏ hlôi pơjing Khul dui brai vai tanh khăn ƀuôn Sŭt M’Đưng, hơvơn đei 35 ‘nu pơmai oh vang jang. Gơnơm iung jang hơnơ̆ng chă tanh, kơna rim bơngai lơ̆m khul hlôi jang sa iŏk yua kơjăp đơ̆ng 3–6 triu hlak jên lơ̆m 1 khei. Atŭm hăm ‘noh, mŏ oei iung jang hơdoi hăm kang ƀô̆ vei lăng Joh ayŏ tơring pơjing khul tôn chĭng chêng đei hloh 15 ‘nu bơngai, hơnơ̆ng chă tôm chĭng chêng ăn kon pơlei chă lăng, mơ̆ng. Drŏ kăn Ƀĭ thư Chi ƀô̆ H’Đao tơbăt: “Ba chă pơrô̆ hơvơn pơmai oh, rim bôl boăl păng đe mih ma, duch nă lơ̆m pơlei pơjing khul dui brai vai tanh khăn păng khul tôn ching chêng. Rim bơngai vang jang tôch tơnăp. Ba hơpơi ‘meh vă, kiơ̆ đơ̆ng tơdrong jang ou, tơdrong oei sa joăt joe kơ bơngai Êđê bơ̆n gô hơnơ̆ng đei vei răk tơƀăk mong păng lang să lơ̆m jơhnơr đe hơ ioh dơ̆ng.”

Tơring Cư Suê, apŭng Cư M’gar đei hloh 220 ‘nu đang viên, lơ̆m ou đei 71 ‘nu đang viên bơngai kon kông, hop akom lơ̆m 2 chi ƀô̆ pơlei bơngai Dao păng 4 chi ƀô̆ lơ̆m pơlei bơngai ÊĐê. Lơ̆m ou đei 2 ‘nu drŏ kăn Ƀĭ thư Chi ƀô̆ hơdrung Êđê ‘noh mŏ H’Đàn Niê hăm H’Đao Êban. Ƀok Phan Xuân Lực, Bĭ thư Đảng tơring Cư Suê tơroi găh ƀar ‘nu drŏ kăn Ƀĭ thư ling lang jang ‘lơ̆ng hơnăp jang “Đang viên pơm jŭk yŭk trong hơlou, kon pơlei kơdou kiơ̆ đơ̆ng rŏng” nhen nơ̆r Ƀok Hô chă pơtho ăn. “H’Đàn Niê ‘noh bơngai đei jơhngơ̆m đon lăng jrŭ, hơnơ̆ng chă pơrô̆ pơrôp kon pơlei lơ̆m pơlei jang kiơ̆ khoa hŏk kih thuơ̆t lơ̆m rong kon tơrong, choh jang chehphe, tiu păng rim ‘long sa plei tĕch măt. Găh hăm mŏ H’Đao Êban, ‘nou jĭ bơngai hưch hanh hăm tơdrong vei răk tơƀăk mong tơdrong oei sa joăt joe sơ̆ ki. Sư hlôi chă pơrô̆ hơvơn kon pơlei vei răk tơdrong jang dui brai vai tanh khăn, tơ iung pơjing khul tôn chĭng chêng tŏk bŏk jang ‘lơ̆ng, đơ̆ng noh vei răk tơƀăk mong tơdrong oei sa joăt joe-joh ayŏ kơdŏ soang kơ bơngai Êđê tơ̆ tơring. Đe sư jĭ dôm Ƀĭ thư Chi ƀô̆ hơgei kơ pơlei pơla, păng jĭ dôm bơngai pơm gơng tơroh kloh klĕch ƀar păh Đang hăm kon pơlei.”

Lơ̆m pơlei pơla bơngai Êđê, drŏ kăn ưh khan lăp bơngai gram ŭnh lơ̆m ŭnh hnam mă oei gram ŭnh pơm ăn jơhngơ̆m pran lang să tơ̆ pơlei pơla. Dôm drŏ kăn Ƀĭ thư Chi ƀô̆ nhen H’Đàn Niê, H’Đao Êban jĭ pla ŭnh tơ̆k hơdăh ba trong ăn atŏk tơ iung mŭk drăm-tơpôl, vei răk tơƀăk mong, atŏk tơ iung tơdrong oei sa ‘lơ̆ng rŏ joăt joe sơ̆ ki kơ hơdrĕch hơdrung, ăn pơlei pơla roi năr roi pơdrŏng ‘lơ̆ng liĕm.