Kiơ̆ đơ̆ng rim kơdră tang măt, tơdrong tơ iung pơjing păng tơlĕch jang kiơ̆ Tơdrong tơchơ̆t đơ̆ng Kuô̆k hô̆i găh tơgŭm hŏk đĕch, tơgŭm jên hŏk pơhrăm ăn đe hơ ioh mâm non, hŏk tro phô thông, bơngai hŏk tơdrong hŏk pơhrăm phô thông tơ̆ rim hnam trương pơtho pơhrăm kơ teh đak ‘noh tơƀôh hơdăh ăn tơdrong tơgoăt iŏk, jang kiơ̆ rim Nơ̆r pơma pơtôch đơ̆ng Hơnih tơm Chinh trĭ, Tơdrong tơchơ̆t kơ Khul kơdră chĕp pơgơ̆r Trung ương găh tơdrong pơtho pơhrăm, tơgop pơm sơđơ̆ng tơdrong hơrih sa tơpôl, pơm dă ƀiơ̆ trăp trĭn găh mŭk drăm ăn rim ŭnh hnam đei kon hơ ‘lơ̆p hŏk pơhrăm tơ̆ rim hnam trương đơ̆ng mâm non truh jăl pêng. Mă lei, rim kơdră tang măt jei oei pơngơ̆t găh tơdrong gơh jang kiơ̆ ‘lơ̆ng kơ trong bơ̆ jang, trong tơgŭm djru hơdăh lơ̆m trong vă pơjing Tơdrong Tơchơ̆t, lơ̆m ou đei tơdrong kon jên hu jang kiơ̆. Bơngai tang măt Nguyễn Thị Lan, khul pơlei tơm Hà Nội tơgop nơ̆r:“Ĭnh jei lăp đon hăm tơdrong tơlĕch ăn kon jên jang Teh đak. Mă lei kăl lăng hơlen mă brĕ tơdrong kĕ tơlĕch ăn kon jên jang kơ tơring, mă kăl hăm rim dêh char tim mă tơchă đei kon jên ăn tơdrong jang ou ‘noh Khul kơdră teh đak jei kăl hơlen ƀơk kon jên ăn tơring ou vă veh ver đei tơdrong trong jang ‘noh trŏ lăp mă lei kơ yuơ ưh kơ đei kon jên kơna tơdrong jang kiơ̆ iung jang hiơ hiơ̆ dăh mă ưh kơ lei lăi dih băl”.

 Bơngai tang măt Siu Hương, khul Gia Lai tơgop nơ̆r:“Mĭnh tơring đei ƀôh phara dih băl. Oei đei dôm tơring oei mơmat tat, pơtih gia nhen Gia Lai dang ei hloh 60 % ‘noh kon jên Trung ương asong, kơna apĭnh kăl đei tơdrong tơchơ̆t mă hơdăh hloh dơ̆ng găh trong jang klăh asong kon jên đơ̆ng kon jên jang Trung ương vă trong bơ̆ jang ‘lơ̆ng hơ iă hloh đơ̆ng Đảng, Teh đak bơ̆n đei tơlĕch jang kiơ̆ ‘lơ̆ng hơ iă hloh”.

Đơ̆ng tơdrong ƀôh hơdăh kơ tơring hlôi jang kiơ̆ ‘lơ̆ng trong bơ̆ jang tơgŭm djru kon jên hŏk pơhrăm ăn hơ ioh, hŏk tro đơ̆ng mâm non truh lăm 12, bơngai tang măt Trần Chí Cường, khul Đà Nẵng akhan, trong jang tơgŭm djru kăl hơtŏ hơnơ̆ng, hơlen hơdăh:“Tơdrong ăn hŏk đĕch ‘noh hnam trương teh đak hlôi pơkăp hơdăh ‘noh ƀônh bơih, mă lei dang ei tơdrong tơchơ̆t tơgŭm djru ăn hŏk tro hŏk hnam trương găh ‘ngoăih ‘noh kon jên tơgum djru dôm yơ ‘noh kơ yuơ Jơnŭm vei lăng kon pơlei tơchơ̆t, tôch mơmat tat ăn tơdrong tơgŭm djru, kon jên tơgŭm djru dôm yơ ‘noh jei mĭnh tơdrong tôch tơnap tap. Nhen Đà Nẵng tơlĕch ăn kon jên đơ̆ng kon jên jang tơring tơgŭm ăn rim hŏk tro hŏk lơ̆m hnam trương găh ‘ngoăih ‘noh hơtŏ hăm kon jên tơgŭm ăn hŏk tro hŏk hnam trương Teh đak. Lơ loh, hăp đei pơkăp dôm ăi dih băl ăn tơdrong tơgŭm djru ou”.

Găh trong bơ̆ jang tơgŭm ăn, bơngai tang măt Nguyễn Đại Thắng, khul Hưng Yên athei:“Lơ̆m Tơdrong tơchơ̆t ăn hloi dôm bơngai đei iŏk yoa sa hơpăh. Kiơ̆ kơ ĭnh kăl hơlen kla ăn hloi kơ rim hnam trương pơtho pơhrăm ‘noh trŏ lăp hloh, bơ̆n đei trong bơ̆ jang dăr lăng hơlen kơjăp, vă tơbăt ăn kơdră kơpal. Adoi kăl đei trong tơchơ̆t bơ̆ jang dăr lăng hơlen tơ̆ rim hnam trương pơtho pơhrăm đei bơngai gơh iŏk yoa sa hơpăh ‘noh. Mĭnh mă ‘moi kiơ̆ hnam trương pơtho pơhrăm vă kla ăn kơtă ăn kơ rim đe kôn mon kon sou. Mă ƀar ‘noh soch iŏk hloi kon jên hŏk, hmă hmă 10 hlak jên mă lei kon jên ăn hŏk đĕch ‘noh 3 hlak kơna lăp ăn 7 hlak jên”.

Tơgop lơ̆m Tơdrong tơchơ̆t pơtho pơhrăm mâm non ăn hơ ioh mou yăo đơ̆ng 3 truh 5 sơnăm, mĭnh ƀar ‘nu kơdră tang măt akhan, lơ̆m sơnăm dôm ou, rim đe oh tim mă đei năm tơ̆ hnam trương hŏk pơhrăm găh lơ đe hơ ioh tơ̆ tơring hơtăih yăih, tơring tơnap tap. Tơdăh Tơdrong tơchơ̆t đei tơlĕch jang kiơ̆ gô tơgop pơm sơđơ̆ng hơtŏ hơnơ̆ng dih băl lơ̆m năm hŏk pơhrăm kơ đe hơ ioh oei tơ̆ rim tơring tơrang. Mă đơ̆ng kăl tơmơ̆t jên jang lơ hloh dơ̆ng găh hơnih, tơmam drăm pơtho hŏk pơhrăm, găh ƀok thây kô pơtho ... mă lei kăl lăng 'nou jing tơdrong tơmơ̆t jên jang kăl hloh kơ tơdrong atŏk tơ iung, jing tơdrong đei năm hŏk đơ̆ng hrôih, tơdrong tơmơ̆t jên jang vei lăng năng tông tih vơ̆ djơ̆ ‘lơ̆ng vă sơkơ̆t hơdăh tơdrong hơrih sa ‘lơ̆ng rŏ hơbŏ nhen đơ̆ng rŏng ou kơnh. Bơngai tang măt Phan Văn Mãi, khul pơlei tơm Hồ Chí Minh, atŭm hăm kon jên jang teh đak, kăl đei trong bơ̆ jang pơtrŭt tơpôl vang iung jang găh tơdrong ‘nou:“Găh tơdrong tơpôl kon pơlei pơla vang jang kiơ̆ vă atŏk tơ iung pơtho pơhrăm mâm non ‘noh jing tơdrong gĭt kăl hloh, tơdăh ưh lei tôch mơmat tat ăn kon jên hu teh đak. Bơ̆n kăl chă tơchĕng hơlen mă brĕ păng đei dôm trong jang trŏ lăp hloh dơ̆ng vă pơtrŭt tơpôl vang tơmơ̆t jên jang. Pơtih gia nhen bơ̆n hlôi pơma truh tơdrong pơjao teh ưh kơ iŏk jên dăh mă iŏk 0 hlak jên vă pơm hơnih pơtho pơhrăm mâm non dăh mă ưh”.