Mŏ Pi Năng Thị R En, oei tơ̆ tơring Khánh Trung, apŭng Khánh Vĩnh ‘noh ƀôh hơdăh hloh lơ̆m tơdrong yak hloh dơnuh hin lơ̆m tơring kon kông tơ̆ dêh char Khánh Hòa. Ŭnh hnam mŏ hlôi đei oei lơ̆m hnam hnăt hnot, rim ‘măng ‘mi tih măh kơdou kơ ‘nơp tơ̆ nai. Gơnơm trong jang tơgum djru tơ iung pơjing hnam kơjăp ‘lơ̆ng, mŏ R En dang ei hlôi đei hơnih oei sơđơ̆ng. “Đei Teh đak tơgŭm ăn hnam oei kơjăp ‘lơ̆ng, pă đei tơdrong hnăt hnot păng ‘mi săi bơih. Ŭnh hnam pă đei kơdou oei tơ̆ hnam đe mĕ bơih. Ŭnh hnam ba jei chă tŏk iŏk kon jên vă pơm hnam chă pơyơ̆ng. Đei iŏk yoa sa hơpăh Tơdrong jang Teh đak pôk ăn trong jang sa, nhôn hơdrin chă jang sa, rong kon tơrong, đơ̆ng rŏng ou kơnh tơdrong hơrih sa sơđơ̆ng ƀiơ̆. Ba hlôi rong đei đơ̆ng 2 tŏ rơmo dang ei đei truh 10 tŏ bơih.”

Dêh char Khánh Hòa đei hloh 82.000 ‘nu kon pơlei kon kông, găh lơ ‘noh bơngai Raglai, akŏm oei lơ̆m 2 apŭng Khánh Sơn hăm Khánh Vĩnh. 4 sơnăm ou ki, Jơnŭm vei lăng kon pơlei dêh char Khánh Hòa pơjing đei 15 tơdrong Tơchơ̆t; Hơnih vei lăng kon pơlei pơjing 33 tơdrong tơchơ̆t, 10 trong pơprŏ jang păng lơ hla bơar tơchơ̆t pơrô̆ jang, chĕp pơgơ̆r tơlĕch jang kiơ̆ tơdrong jang ‘măn ăn kon pơlei groi kông. Lơ̆m ou dêh char tơlĕch dôm tơdrong tơchơ̆t kăl ăn asong tơring iŏk yua kon jên bơ̆ jang păng kon jên ou to vă tơgŭm djru hloi ăn 2 apŭng Khánh Sơn, Khánh Vĩnh.

Lơ̆m tơlĕch jang kiơ̆ tơdrong jang, dêh char hơnơ̆ng năm dăr lăng tơ̆ rim tơring vă tơgom hơmet pơ ‘lơ̆ng dôm tơdrong tơnap tap, pơtrŭt kơtang iung jang kiơ̆ Tơdrong jang. Jăl jang 2021-2025, akŏp kon jên jang Tơdrong jang u hloh 790 ti hlak jên, lơ̆m ou 85% kon jên Trung ương. Dang ei tơdrong jang sa iŏk đei jô̆ hơtŏ măt bơngai kon pơlei kon kông tŏk hloh ƀar ‘măng pơtêng hăm sơnăm 2020, iŏk đei 30 triu hlak jên lơ̆m 1 ‘nu 1 sơnăm; ŭnh hnam dơnuh tơjur 7,2% lơ̆m sơnăm. Dêh char hlôi xut xa đei hloh 1.130 pơbŭng hnam pơgia, hnam hnăt hnot; tơ iung pơjing ming man, ming hơmet trong hnam kon pơlei.

Truh dang ei, 100% tơring đei trong gre yak truh hơnih bơ̆ jang, đĭ đăng ŭnh hnam hlôi đei ŭnh hơyuh păng sŏ nhă đak rơgoh ‘lơ̆ng. Ƀok Võ Nam Thắng, Kơdră chĕp pơgơ̆r Hơnih vei lăng Kon kông păng Lui khop dêh char Khánh Hòa tơbăt, trong bơ̆ jang tơgŭm djru ming man hnam ‘nao păng atŏk tơ iung trong jang sa tơgŭm ăn kon pơlei sơđơ̆ng hơrih sa, yak hloh dơnuh hin kơjăp ‘lơ̆ng.“Iung pơrô̆ hơvơn dôm bơngai đei kon pơlei lui yom vang năm tơmang lăng rim hnam kmăi lơ̆m dêh char păng dêh char anai vă băt hlôh ƀôh hơdăh trong chă pơrô̆ pơrôp. Adoi iung jang hơdoi hăm Hnam trương Chinh trĭ dêh char pơtho nơ̆r kon kông ăn kang ƀô̆ chĕp pơgơ̆r vă tơgŭm ăn đe sư băt hlôh ƀôh hơdăh păng jang kiơ̆ kơtang tơdrong jang tơm teh đak tơ̆ tơring” .

Ou ki, ƀar apŭng groi kông Khánh Sơn păng Khánh Vĩnh đei Thủ tướng drơ̆ng nơ̆r yak hloh dơnuh hin. Tơdrong tơchơ̆t đơ̆ng Hơnih tơm Chinh trĭ yak mơ̆t lơ̆m tơdrong hơrih sa hlôi tơgop kơtang pơm hơtŏk jơhngơ̆m đon hlôh vao, pơjing đei tơplih kơtang găh jơhngơ̆m đon hlôh vao kơ kon pơlei groi kông. Đơ̆ng mă gô chang gơnang yoa, lơ ŭnh hnam hlôi hơdrin, pơ̆n chă tơplih 'long pơtăm, atŏk tơ iung choh jang sa. Lơ trong jang choh jang sa rơgoh 'lơ̆ng, tơmam drăm OCOP, tơring pơtăm VietGAP, trong jang mir pơgar să, hơp tak xah hle ... tŏk bŏk đei tơ iung pơjing păng pơih să. 

Ƀok Bùi Hoài Nam, Bí thư apŭng Khánh Sơn tơbăt: Truh dang ei, rim tơring kon kông păng groi kông lơ̆m dêh char hlôi pơjing đei rim tơring choh jang sa ngăl: Tơring pơtăm sầu riêng tơ̆ Khánh Sơn 2.900 ha.“Apŭng Khánh Sơn yak hloh dơnuh mă lei rim trong jang tơgŭm ăn choh jang sa, atŏk tơ iung mŭk drăm hơnơ̆ng đei lăng kơjăp kiơ̆ trong choh jang sa kơjăp ‘lơ̆ng. Apŭng Khánh Sơn tŏk bŏk tơplih đơ̆ng ‘long pơtăm đei iŏk yua tŏ sĕt chă pơtăm ‘long pơtăm đei iŏk yua lơ, ‘lơ̆ng. Nhôn tŏk bŏk lăng truh tơdrong hơdăh đei ŭnh hnam kon kông pơdrŏng, đei ƀôh tŏk lơ”.

‘Măn lơ kon jên tơmơ̆t jang atŏk tơ iung mŭk drăm-tơpôl tơring kon kông păng groi kông jăl jang 2021 - 2025, dêh char Khánh Hòa hlôi tơ iung pơjing tơring groi kông atŏk tơ iung ‘lơ̆ng, kơjăp ‘lơ̆ng. Rim trong bơ̆ jang tơgum djru ưh khan lăp tơgŭm ăn ƀar apŭng groi kông yak hloh dơnuh hin mă oei pơjing hơyak atŏk tơ iung đunh đai tai sơnăm, pơjing đei dôm tơring pran kơtang, tơgpop lơ̆m jang kiơ̆ ‘lơ̆ng trong jang atŏk tơ iung tôm tong dêh char Khánh Hòa truh sơnăm 2030, lăng truh sơnăm 2045.

Ƀok Nghiêm Xuân Thành, Bí thư Đảng dêh char Khánh Hòa athei lơ̆m khei ‘năr truh ou kơnh, rim tơring kăl akŏm jang kiơ̆ ‘lơ̆ng tơdrong tơmơ̆t jang khoa hŏk, kmăi kmŏk vă pơjing đei hơyak pran kơtang hloh dơ̆ng:“Kăl iung jang tôm tĕch tơdrong tôm tong hơnăn lơ̆m choh jang sa, jang kiơ̆ kmăi kmŏk kơtơ̆ng ang, tơplih kơsô̆. Tơdrong ‘nou, khul kơdră chĕp pơgơ̆r tơring kăl iung jang hloi. ‘Nou tơmơ̆t jang gơh hơgei, tơdăh lê̆ kơdih kơdih kon pơlei lei tơnap mă jang kĕ tơdrong ou. Trong tơlĕch jang ‘noh pơm hơtŏk iŏk đei kơjăp lơ̆m hơgăt teh jang sa ‘noh. Pơprŏ kăl iung jang kiơ̆ ‘lơ̆ng, lăng hơlen kơjăp. ‘Ngoăih ‘long sâu riêng kăl pơtăm dơ̆ng ‘long pơtăm anai, sơđơ̆ng ăn kon pơlei sơđơ̆ng hơrih sa”.