Truh khei năr ou dêh char Kon Tum hlôi keh đang tơdrong hơmet ăn 'măng pơlong tôt ngĭp THPT đei pơgơ̆r đơ̆ng năr 25-27/6 ou kơnh. 'Măng pơlong tôt ngĭp THPT sơnăm ou dêh char Kon Tum đei hloh 5.300 bơngai pơlong. Jơ̆p dêh char asong 14 hơnih pơlong hăm 244 lăm pơlong păng 28 lăm gô. 'Nguaih kơ noh, anih jang pơtho pơhrăm păng jơnŭm pơgơ̆r tơring adoi asong 9 hơnih pơlong hơmŏ vă pơgơ̆r pơlong mưh đei tơdrong ưh kơ 'lơ̆ng gah tŏ 'mi kial.

Vă vei sơđơ̆ng ăn 'măng pơlong tôt ngĭp THPT gơh sơđơ̆ng 'lơ̆ng, trŏ tơchơ̆t, dêh char Kon Tum hơvơn hloh 1.200 kan ƀô̆, bơngai jang gah pơlong, lơ̆m noh bơngai kơtă lăng hơlen pơlong đei jê̆ 630 'nu. Yă Y Ngọc, Phŏ Kơdră Juăt jang kơ Anih jang vei lăng kon pơlei dêh char, Kơdră Jơnŭm pơgơ̆r 'Măng pơlong tôt ngĭp THPT sơnăm 2025 dêh char Kon Tum ăn tơbăt: Jơnŭm Pơgơ̆r gô tơguăt păng pơkăp pŭ sơnong ăn rim kan ƀô̆ mưh lê̆ đei tơdrong glăi lơ̆m pơm kiơ̆ tơchơ̆t pơgơ̆r pơlong.