Gơmăng hei (19/06), tơ̆ Anih jang kơ Khul kơdră teh đak, Thủ tướng Phạm Minh Chính tơƀâo kơdră chĕp kơ̆l dang ei păng adrol sơ̆ kơ dôm anih chih hla ar tơroi ƀlep ƀât tơbăt 100 sơnăm Năr Hla ar tơri Kăch mang Việt Nam (21/06). Tơ̆ jơ tơƀâp, Thủ tướng hơpơi ‘mĕh dôm bơngai chih hla ar tơroi tưk tơiung tơdrong juăt đơ̆ng 100 sơnăm kơ Hla ar tơroi kăch mang Việt Nam, hăm "Jơhngâm đon tơpăt ‘lơ̆ng, chih gơ̆h hơgei" hơnơ̆ng  tơgop ăn tơdrong jang tŏk kơ teh đak, kơ hơdrĕch hơdrung păng kon pơlei.

Găh tơdrong athei hơtŏk tơdrong chih ƀai kiơ̆ nơ̆r athei, Thủ tướng athei Anih tơm vei lăng jŏh ayŏ kơ dŏ xoang, tơplŏng kơdâu păng chă tơmang lăng lơ̆m 1 khei chih pơjing tơdrong tơchơ̆t mă hơdăh găh tơdrong chih ƀai kiơ̆ nơ̆r athei, chih tơdrong kiơ, kla jên thoi yơ... ăn ƀai chih tơroi. Ƀơm truh anih jang kơmăy kơmŏk tơroi tơbăt, Thủ tướng pơjao ăn Anih tơm jang Khoa hŏk păng kơmăy kơmŏk chih pơjing luơ̆t, đei trong jang mă lăp kiơ̆ đơ̆ng vei lăng ‘lơ̆ng tơdrong đei yoa ăn 3 pang ‘nŏh: Teh đak, Anih jang mang, Bơngai chih hla ar tơroi. Pơm ‘lơ̆ng vă 3 pang đei yoa ngăl. Thủ tướng athei jăh tơlĕch tơdrong Hơgăt găh kuang kăo lơ̆m ƀăo, tivi... hơnơ̆ng sek tơlang dôm tơdrong tam mă lăp đei ƀôh lơ̆m khei ‘năr âu ki. Ƀlep ƀât ‘măng mă  âu, Thủ tướng oei athei Anih tơm vei lăng jên hu tơchĕng hơlen hơtŏk jên ăn tơdrong hla ar tơroi.