Jô̆ truh blŭng sơnăm 2025, teh pơtăm prit tơ̆ dêh char Gia Lai đei truh 7.300 ha,  đei yua pơhlom 237.000 tâ̆n. Kŏng ti kô phân Choh jang xa kiơ̆ trong jang 'nao Hưng Sơn  tŏk bŏk oei pơm jang hloh 550 ha prit tơ̆ dôm apŭng Đăk Đoa păng Chư Prông, dêh char Gia Lai. Rim sơnăm, kŏng ti tĕch ăn teh đak đe pơhlom 20.000 tâ̆n prit ăn dôm teh đak pran nhen Nhật Bản păng Hàn Quốc.

Kơchĕng, sơnăm ou păng sơnăm kơnh gô đei yua tŏk truh 35.000 tâ̆n. Ƀok Nguyễn Quang Anh, Kơdră Jơnŭm jang gah jên hu kŏng ti ăn tơbăt, gơnơm đơ̆ng iŏk yua kơmăi tơruih kơtoh đak đơ̆ng Israel, yua kơmăi drone hơlen lăng hơdrông pơrang păng hnam hơngeo 'măn vei lăng tơmam pơm đơ̆ng prit kơ kŏng ti hlôi đei tơlĕch tĕch truh dôm teh đak kơhret kơjăp: “Tơring teh gôh bazan trŏ hăm tơm prit, prit đei yua lơ, mưh pơyua lơ noh athei đei dôm trong jang, dôm tơchơ̆t jang hơdah, mă kơjăp, athei hơlen tơnăp pơrang, tơdrong vơ̆ pran kơ tơm prit. Dang ei nhôn tŏk bŏk chă tĕch ăn teh đak Hàn Quốc, Nhật Bản, Trung Quốc păng Trung Đông. Gah 4 teh đak ou adoi ưh kơ mah tơmam vă tĕch tơlĕch”.

Jơ̆p dêh char Gia Lai dang ei hlôi hơvơn đei 50 tơdrong jang pơtăm prit hăm hloh 8.500 ha, kơsô̆ jên asong jang hloh 10.000 ti hlj. Lơ̆m noh, Anih jang Hoàng Anh Gia Lai hlôi hăt hot hơtŏk kơjă plei 'long xa.

Dang ei anih jang ou tŏk bŏk pơih să tơring pơtăm prit pơhlom 7.000ha tơ̆ Gia Lai, Lào păng Campuchia. Ƀok Nguyễn Ngọc Mai, Kơdră Kŏng ti Kô phân Rong kon tơrong Gia Lai (lơ̆m Anih jang Hoàng Anh Gia Lai) ăn tơbăt, hăm teh trŏ ƀlep pơtăm noh prit kơ kŏng ti 'lơ̆ng hloh: “Tơring pơtăm prit Nam Mi kơ kŏng ti lơ̆m tơring teh gôh bazan đei anih kơjung hloh pơtêng hăm anih tơmăn đak dơsĭ noh 800m thoi noh pơm trong hiôk ăn prit Nam Mi giơ̆ng 'lơ̆ng. Kơyuơ teh 'lơ̆ng, hơnih kơjung păng đunh sơnăm noh prit pơtêng hăm tơring nai 'lơ̆ng hloh păng tơm kơjung hloh”.

Dang ei, tơmam xa pơm đơ̆ng prit tơ̆ Gia Lai hlôi đei tĕch tơlĕch truh dôm teh đak pran nhen Nhật Bản, Hàn Quốc, Trung Đông... ăn ƀôh tơdrong tơgar păng 'lơ̆ng trŏ nhen tơchơ̆t apŭng plenh teh. Yă Đào Thị Thu Nguyệt, Phŏ Kơdră Anih jang Kŏng thương dêh char Gia Lai sơkơ̆t hơdah: “Hăm tơmam xa pơm đơ̆ng prit dang ei tŏk bŏk đei sơkơ̆t hơdah tơdrong 'lơ̆ng păng hơnăn prit kơ Tây Nguyên pơma hơtŭm păng Gia Lai pơma hơdrô̆. Dang ei, tơdrong tĕch răt tơ̆ Gia Lai adoi pơtơm hơtŏk gah prit, chă dôm teh đak 'meh răt prit vă pơih să tơring tĕch răt lơ hloh”.

Hăm tơdrong hiôk gah tơring teh păng sơkơ̆t hơtŏk choh jang xa kiơ̆ trong jang 'nao, tơm prit tŏk bŏk oei sơkơ̆t hơdah hơnih dơ̆ng hăm tơmam drăm prit kăp gĭt kơ Gia Lai tĕch ăn teh đak đe. Tơdrong asong ming man hnam vei lăng, pơih să tơdrong jang hơdoi păng hơtŏk tơdrong tơgar jang păng tĕch ăn dôm teh đak pran gô jing tơdrong kăp gĭt tơgŭm ăn tơdrong jang prit hơtŏk tơ-iung kơjăp sơđơ̆ng, tơgop kăp gĭt lơ̆m tơdrong hơtŏk mŭk drăm choh jang xa, hơtŏk tơ-iung tơring tơrang kơjăp sơđơ̆ng.