Jang tôch tơnăp, hơnơ̆ng năm hơdrol lơ̆m tơdrong jang atŏk tơiung mŭk drăm, đảng viên Tòng Văn Lải, Chi ƀô̆ plei Co Phung, xăh Hua La, plt Sơn La, dêh char Sơn La rơih trong jang pơtăm chĕh phe, rong kon tơrong, nhŭng iĕr vă jang pơlong năng ăn kon pơlei tơ̆ pơlei truh hŏk pơhrăm jang kiơ̆, vă atŏk tơiung mŭk drăm lơ̆m hnam hai.

Gơnơm tơmât yoa khoa hŏk ki thuơ̆t nhen săy phŏng, kăt sơdrai trŏ khei ‘năr ăn ‘long pơtăm, ƀet vắc xin păng hiĕm tôm tơmam ăn kon tơrong, truh dang ei, trong jang mŭk drăm lơ̆m hơgăt teh xă 1,5 héc ta kơ unh hnam sư 1 sơnăm  tĕch hlŏh 40 tŏ nhŭng; 15 tân plei cheh phe hơdrih, trư tôm jên jang, oei rơkăh dang 300 triu hlak jên.

Đảng viên Tòng Văn Lải tơroi, đơ̆ng đei yoa mŭk drăm tôch lơ mưh trong jang kiơ̆ jang âu, kơdih kâu hơnơ̆ng chă tơgŭm ăn dôm unh hnam lơ̆m pơlei, lơ̆m xăh găh ki thuơ̆t pơtăm, vei rong ‘long, tơgŭm bơ̆n kon yŏng vă mih ma duch nă choh jang xa, tơplih ming ‘long pơtăm, pơm hơtŏk iŏk yoa: “Inh chă pơlung đe ‘nhŏng oh jang rok inh, inh jang đei yă kiơ ‘nŏh roi tơƀôh ăn đe sư jang kiơ̆. ‘Nhŏng oh yơ ưh kơmăh jên ‘nŏh inh asong tŏk iŏk, nhen ‘mĕh răt nhŭng yŏng, dăh mă rơmo vă rong ‘noh inh vang tơgop jên ăn ‘nhŏng oh.”

Bơ̆ jang tơdrong jang pơjing tơring tơrang ‘nao, chi ƀô̆ plei Co Phung, xăh Hua La, plt Sơn La, dêh char Sơn La krao hơvơn dôm unh hnam kon pơlei vang pơma nuh, drơ̆ng nơ̆r pơgơ̆r bơ̆jang mă ‘lơ̆ng dôm tơdrong hơgăt, mă loi jĭ pơm trong lơ̆m pơlei, vei kơjăp grŭp vei sơđơ̆ng kơdih, pơjing tơdrong arih xa ‘nao ‘lơ̆ng hơiă...

Đơ̆ng sơnăm 2021 truh dang ei, chi ƀô̆ pơlei krao hơvơn kon pơlei vang tơgop đei 650 triu, chĕng song hlŏh 500 m2 teh, vă jê̆ 2.000 năr jang; lơ unh hnam chu yuih hŭt hnam pơm hơmet ming tơ̆ nai vă pơm 1,6km trong bê tông; 4km lơ̆m pơlei, pơyoa ăn tơdrong yak vih vât, chơ chuĕn tơmam. Yă Lèo Thị Tiển, tơ̆ kueng 5, plei Co Phung tơroi: “Adrol sơ̆, trong iĕ, dang ei đei teh đak pơm ăn trong ‘nao kơna mih ma duch nă yak vih vât tôch hiôk hian, hnam nhôn kŭm chu kăt lê̆ 1 pôm jrăng hnam vă pơm trong.”

Kiơ̆ ƀok Lò Văn Hội, Bí thư chi ƀô̆, Ƀok pơgơ̆r pơlei Co Phung, vă jê̆ 10 sơnăm âu ki, chi ƀô̆ chih hơdăh dôm tơdrong vă jang tŏk, đei: pơm hơtŏk tơdrong ‘lơ̆ng đơ̆ng hŏk hôp chi ƀô̆; tơplih ‘nao trong chĕp kơ̆l; pơjing tơdrong arih xa ‘lơ̆ng hơiă gơ̆h hơgei tơ̆ tơring; krao hơvơn kon pơlei tơplih ming ‘long pơtăm, kon tơrong mă lăp... Truh dang ei, pơlei đei 240 unh hnam, hlŏh 1.100 ‘nu bơngai, lơ̆m noh lăp oei đei pă 5 unh hnam vă jê̆ tơnuh, ưh đei unh hnam tơnuh; iŏk yoa jô̆ păh lăp đei 50 triu 1 ‘nu 1 sơnăm; lơ̆m pơlei đei ƀôh lơ trong jang xa đei yoa truh kơhrĕng triu hlak jên 1 sơnăm: "Tơ̆ hơnăp kơnh, chi ƀô̆ kŭm nhen đe đảng viên vă hơnơ̆ng hŏk pơhrăm, jang kiơ̆ jơhngâm đon ‘lơ̆ng đơ̆ng Ƀok Hô, krao hơvơn mih ma duch nă hơnơ̆ng atŏk tơiung mŭk drăm, vei rơgŏh cham char, atŏk tơiung tơring tơrang ‘nao. Akŏm jơhngâm atŏk tơiung mŭk drăm unh hnam, jang kiơ̆ khoa hŏk ki thuơ̆t, rong lơ kon tơrong, nhŭng iĕr, dôm kơloăi ‘long xa plei nai đei kơjă măk, hơnhăk ăn iŏk yoa lơ.”

Ƀok Lò Văn Chính, Bí thư đảng xăh Hua La, plt Sơn La ăn tơbăt, bơ̆ jang kiơ̆ tơdrong tơchơ̆t kơsô̆ 05 đơ̆ng Anih tơm Chinh trĭ, chi ƀô̆ plei Co Phung pơjao ăn đảng viên ‘moi kiơ̆ tơdrong tơchơ̆t đơ̆ng chi ƀô̆, vei lăng tơdrong tơlĕch jang tơ̆ dôm khul grŭp, kueng ƀôt. 40 ‘nu đảng viên lơ̆m chi ƀô̆ tơtă bơngai Thái ngăl, hơnơ̆ng jang tơnăp, jang keh đang rim tơdrong jang đei pơjao, pơm ‘lơ̆ng ăn hơnăp chĕp kơ̆l pơgơ̆r đơ̆ng chi ƀô̆, dôm tơdrong jang đơ̆ng pơlei, khul grŭp tơpôl hơnơ̆ng đei pơgơ̆r păng bơ̆ jang đang ‘lơ̆ng: "Tơdrong gĭt kăl dơ̆ng ‘nŏh jĭ đe đảng viên lơ̆m chi ƀô̆ đei hơnăp jang athei tơlĕch ăn dôm grŭp, kueng ƀôt kŭm nhen pơlei pơla găh trong jang, tơdrong tơgŭm đơ̆ng Đảng, khôi luơ̆t teh đak, mă loi jĭ tơdrong tơchơ̆t đơ̆ng chi ƀô̆ tơlĕch rim khei lơ̆m tơdỏng jang atŏk tơiung mŭk drăm, tơpôl, kŭm nhen tơdrong arih xa, jŏh ayŏ kơ dŏ xoang tơ̆ pơlei. Đơ̆ng noh kon pơlei băt, vang mât 1 ƀơ̆r đon, pơjing, tơlĕch lơ nơ̆r tơgop, hơmet trong jang vă pơm thoi yơ gơ̆h pơm hơtŏk đei tơdrong arih xa găh tơmam drăm, jơhngâm đon ăn kon pơlei."

Hŏk pơhrăm păng jang kiơ̆ Ƀok Hô hăm lơ tơdrong tôch rơđăh, đei yoa, tưk tơiung tơdrong tơguăt 1 ƀơ̆r đon, tơgŭm băl, adrin choh jang xa, plei Co Phung hlôi păng oei tơplih ‘nao rim năr, um ai tơring tơrang roi đunh roi ‘lơ̆ng rŏ; dôm tơdrong juăt ưh ‘lơ̆ng, ưh lăp găh tơdrong et pơkong, pơdong bơngai lôch kŭm đei sut hŭt lê̆; lơ tơdrong juăt ‘lơ̆ng đơ̆ng jŏh ayŏ kơ dŏ xoang đei chĕp vei păng tưk tơiung. Hơnơ̆ng lơ sơnăm hloi, chi ƀô̆ plei Co Phung jing chi ƀô̆ jang rơgei kơ plt Sơn La.