Kâu lak ƀô̆ tanh brai pơlei Phung đei pơjing kiơ̆ kơ tơdrong akŏm đơ̆ng dôm bơngai lơ̆m jơnŭm, mă lơ noh đe drăkăn Jarai tơ̆ tơring. Kâu lak ƀô̆ đei hơnih jang păng lăm pơdah tơmam drăm tơ̆ hnam kơ ngê̆ nhơ̆n Rơ Lan Pel, Kơdră Kâu lak ƀô̆. Rim bơngai vang jang lơ̆m Kâu lak ƀô̆ tanh brai pơlei Phung gơh chă tanh brai tơ̆ kâu lak ƀô̆ dah mă tơ̆ hnam kơdih. 'Nhŏng Đưk, kơdră pơlei Phung ăn tơbăt:  "Tơdrong jang tanh brai jing tơdrong jang juăt jue yă ƀok pơsư̆ ăn. Tơdrong jang đei đơ̆ng sơ̆ ki, đei pơtoi đơ̆ng chăl yă ƀok truh tơ̆ kon sou. Đe pơmai oh drăkăn pơjing Kâu lak ƀô̆ tanh brai pơlei Phung vă tơbang tơdrong jang juăt jue kơ pơlei. Kâu lak ƀô̆ đei 23 bơngai vang jang. Đe pơmai oh chă pơtho tơdrong jang ăn đe sơnăm mơlôh, đei 10 'nu mon tŏk bŏk oei pơhrăm tanh. Đe pơmai oh chă tanh ao, hơbăn, tanh che... Tanh hăm ti, hrat tơpă, dok um 'lơ̆ng kăp gĭt. Rim giĕng, pơmai oh tơroi dih băl gah tơdrong pơm jang tơ̆ hnam Kơdră Kâu lak ƀô̆. Tơmam tanh đei dok hmă noh tĕch hăm kơjă 500.000 hlj (jê̆ 20 đôlar), dok guăng 'lơ̆ng noh tĕch 2.000.000 hlj (jê̆ 80 đôlar)."

Kiơ̆ kơ rim tơmam tanh mă jơ năr tanh keh đang adoi phara băl. Minh giĕng, dah mă 2 giĕng... phơ phŏ đunh truh 1 khei pơtơm tanh đang. Tơmam tanh tih iĕ phara băl, đei lơ um rŭp 'lơ̆ng. Pơmai Ngân, jang lơ̆m Kâu lak ƀô̆ tanh brai pơlei Phung ăn tơbăt: "Kâu lak ƀô̆ tanh brai pơlei Phung juăt chă tanh hơbăn, ao tơpen, khăn, kơdŭng... Dok kiơ̆ che tanh kơ dôm hơdrung kon kông phara băl. Rim hơdrung bơngai Ê Đê, Bahnar, Jarai adoi đei kơdih dok brai tanh hăm lơ um guăng 'lơ̆ng. Kơlih tam mă tơbang đei lơ noh tơmam kơ Kâu lak ƀô̆ chă tĕch lơ̆m pơlei, lơ̆m dêh char Gia Lai. Tơmoi đơ̆ng teh đak đe, Mi, Canada, Ấn Độ năm truh tơ̆ pơlei chă răt tơmam tanh đei. Tơmoi đơ̆ng pơlei tơm Hồ Chí Minh adoi truh chih măt răt tơmam drăm"

Lơ̆m tơdrong tanh, gah dok brai tanh noh hrat păng hiong lơ năr. Dok brai tanh tơ̆ ou mă tơm noh kiơ̆ um vuông, um chư nhâ̆t, um dơmŏng... Rim um dok đei kơdih tơdrong kăp gĭt, tơbang gah tơdrong hơrih kơ kon pơlei kon kông. Bơngai jang lơ̆m Kâu lak ƀô̆ tanh brai pơlei Phung ăn tơbăt: "Dok brai tanh noh tơnap dêh. Dok brai tanh hơbăn ao drăkăn 'noh tơnap hloh kơ hơbăn ao đe drănglo"

Ưh hơdrô̆ pơm tơlĕch, vei răk tơdrong jang, Kâu lak ƀô̆ tanh brai pơlei Phung oei tơguăt hăm hơtŏk jang tơmang pơhiơ̆ tơ̆ tơring. Lơ̆m lăm pơdah tơmam tanh đei kơ Kâu lak ƀô̆ tanh brai pơlei Phung adoi oei đei không tanh kră sơ̆. Ƀơ̆t truh tơmang tơ̆ ou, tơmoi đei tơmơ̆ng đe ngê̆ nhơ̆n tơroi gah khôi juăt, tơdrong joh ayŏ kăp gĭt kơ kon pơlei Jarai, tơroi gah tơdrong tanh brai kră sơ̆ kơ pơlei păng đei pơtho hơlen pơlong năng tanh brai tơpă.  

Pơmai Rơ Lan Han, kon drăkăn ngê̆ nhơ̆n Rơ Lan Pel, Kơdră Kâu lak ƀô̆ tanh brai pơlei Phung, jĭ bơngai tơroi hăm nơ̆r Việt, nơ̆r Anh păng nơ̆r Jarai ƀơ̆t rim 'măng đei tơmoi truh tơmang pơlei Phung. Mă ou ưh kơsĭ tơdrong jang tơm mă lei adoi tơgop hơtŏk ƀiơ̆ tơdrong hơrih ăn rim bơngai jang lơ̆m Kâu lak ƀô̆ tanh brai pơlei Phung. Pơmai Rơ Lan Han ăn tơbăt: "Drăkăn Jarai athei băt tanh brai, kơlih noh jĭ tơdrong juăt jue. Tơdrong jang tơm kơ pơmei oh noh jang mir, oei tanh brai noh jang ah jơ rơvơn đĕch. Ah kơ-'năr, pơmai oh năm tơ̆ mir, oei ah kơmăng noh akŏm tanh brai, vă hơtŏk iŏk yua ăn unh hnam. Dang ei, tơdrong jang tanh brai pơm trong ăn pơmai oh gơh chă jang xa, rong 'me unh hnam. Kâu lak ƀô̆ tĕch dôm tơmam tanh đei kiơ̆ mạng tơpôl, facebook, tiktok… Bơngai răt lăp tơmam yơ noh chih măt răt tơmam mă noh. Rim tơmam tanh đei lơ̆m 1 giĕng, oei hăm dôm tơmam tanh dok brai tơnap 'lơ̆ng noh tanh lơ̆m 2 giĕng dah mă 1 khei"

Rim bơngai jang lơ̆m Kâu lak ƀô̆ tanh brai pơlei Phung hăt hot chă hŏk hơlen, pơ-'lơ̆ng um ai tơmam drăm. Gơnơm đơ̆ng noh, tơmam tanh đei jing kăp gĭt, roi năr roi trŏ ƀlep hăm tơdrong lăp yua kơ tơmoi. Kâu lak ƀô̆ jing hơnih ang hơdah lơ̆m hơtŏk mŭk drăm – tơpôl tơ̆ tơring pơsĕl tơ̆ pơlei tơm Pleiku, dêh char Gia Lai.