Klăng roh veăng Roh hôp tiah hmâ rêm hơnăm mâu ngế ki djâ troăng ahdrối roh má 16 dêi Hôp tơpui tơno cheăng kâ lâp plâi tơnêi a Thiên Tân, Sinuâ, kơxo hâi lơ 25/6 (tiô chô kong têa vâi), pôa Phạm Minh Chính, Ngế pro xiâm hnê ngăn tơnêi têa hiăng trâm Ngế pro xiâm hnê ngăn kong têa Kyrgyzstan pôa Adylbek Kasimalyev.

Pôa Phạm Minh Chính, Ngế pro xiâm hnê ngăn tơnêi mơnhên mâu khu xiâm, kơvâ cheăng Việt Nam dế thăm pêi pro châ tơƀrê mâu tơdroăng môi tuăn hiăng châ Khu râ kăn pơkuâ péa kong têa môi tuăn mơdêk tung tơdroăng roh lăm pôu dêi Ngế pro xiâm Kasimalyev; pơtối mê, Ngế pro xiâm hnê ngăn tơnêi têa pơkâ thế péa pâ mơdêk tơrŭm cheăng kâ, tê mơdró, tơdjêp troăng rơxế lơtreng pơla péa tơnêi têa ƀă ing mê ƀă mâu kong têa kơpong Trung Á.

Péa pâ môi tuăn thăm tơpui tơno, tơpui ‘na kal kí trâu hơngế a mâu râ, ki rơhêng vâ tối cho mâu râ kăn xiâm, ƀă pơla Chin phuh, mâu khu xiâm, kơvâ cheăng, kong pơlê péa tơnêi têa; tơrŭm krá tơniăn vâ pêi pro châ tơƀrê mâu tơdroăng môi tuăn hiăng châ Khu râ kăn pơkuâ râ kăn xiâm péa tơnêi têa môi tuăn mơdêk; pơtối tơrŭm krá tơniăn mơdêk tơrŭm tâi tâng kơvâ cheăng, thăm hlê plĕng dêi pó pơla kuăn pơlê péa tơnêi têa.