Tung tơdroăng Hôp tơno tơdroăng kal rêm hơnăm mâu ngế ki djâ troăng ahdrối roh má 16 dêi Hôp tơpui Cheăng kâ lâp plâi tơnêi (WEF) tơkŭm po a Thiên Tân ƀă pêi cheăng a Sinuâ, kơxê lơ 24/6 a Thiên Tân, Sinuâ, pôa Phạm Minh Chính, Ngế pro xiâm hnê ngăn Chin phuh hiăng tơpui ƀă pôa Lý Cường, Ngế pro xiâm hnê ngăn kong têa Sinuâ.

A roh hôp tơpui tơno, Ngế pro xiâm hnê ngăn Chin phuh mơnhên, Việt Nam đi đo ngăn mơnhông tơrŭm ƀă Sinuâ cho pơkâ ki ôh tá tơdjâk pakong, cho tơdroăng rah xo ki ai xêh, troăng pêi cheăng ton xŏn ƀă cho kơjo má môi tung troăng hơlâ tơpui kâ ƀă kong têa ê; loi tơngah Sinuâ kô pơtối mơnhông, mơdêk hnoăng ki kal tung mâu tơdroăng mơnhông, gâk kring ƀă rơkê lâp plâi tơnêi. Péa Ngế pro xiâm hnê ngăn tơnêi têa prôk trâu hơngế tơpui tá hiâm mơno, tơdrăng ‘na tơdroăng têa kơxĭ, môi tuăn rơtế dêi pó pơkuâ ƀă tơleăng tơtro tơdroăng ki ôh tá môi tuăn, rak hơniêp lĕm, tơniăn.

Pôa Phạm Minh Chính, Ngế pro xiâm hnê ngăn tơnêi têa pơkâ thế péa pâ pêi pro kơtăng hlê plĕng tơdjuôm khu râ kăn xiâm, ‘’Môi tuăn ‘na mâu pơkâ ki xiâm hnê mơhno tơleăng tơdroăng a têa kơxĭ Việt Nam – Sinuâ’’; rơtế ASEAN mơ-eăm rĕng châ COC xêt khât, păng ‘nâng, tơtro ƀă luât lâp plâi tơnêi ƀă UNCLOS 1982 tiô môi tuăn dêi rêm pâ.