Drêng troh tơbâ 10 hơnăm mơjiâng Khu kăn Kuô̆k hô̆i  hơnăm ối nếo Việt Nam (Sap hơnăm2015-2025), kơxê hâi lơ 24/6,  a tíu pêi cheăng Xiâm Đảng, pôa Tô Lâm, Kăn xiâm pơkuâ hnê ngăn Đảng hiăng trâm mâ Khu kăn Kuô̆k hô̆i hơnăm ối nếo hneăng 15. Kăn xiâm pơkuâ hnê ngăn Đảng tối nhên, hneăng hôp Đảng rêm râ troh Hneăng hôp mâu kăn tung lâp tơnêi têa rôh má 14 dêi Đảng, cho hnoăng cheăng ai pơxúa khât, hlối vâ mơgêi mâu tơdroăng cheăng, tơ’nôm tơpui kâ, hlối vâ rah xo mâu kăn ƀô̆ ai hiâm mơno vâ hlối lĕm, rơkê vâ pêi cheăng tung mâu hơnăm la ngiâ.

Mâu kăn Kuô̆k hô̆i hơnăm ối nếo kal pơtối veăng hnê tối a mâu tơdroăng chêh tung hlá mơ-éa, tối tơdroăng ai khât a kong pơlê ƀă pa athế pêi tơƀrê ‘na tơdroăng mơnhông cheăng kâ, rak ngăn tơmeăm khoăng tơnêi têa, mơnhông krá tơniăn, kring gak tơniăn  tiah hmâ ing nah. Vâ pêi hnoăng cheăng ki kân dêi tơná, Kăn xiâm pơkuâ hnê ngăn Đảng tối nhên, rêm ngế kăn Kuô̆k hô̆i hơnăm ối nếo kal thế đi đo hvái ngăn tơná pêi cheăng rêh ối hâi ‘ló tro, ki lâi hâi tro thế rơnêu hriâm pât, hriâm ƀă đi đo pleăng hnoăng tơná.

Mâu kăn Kuô̆k hô̆i hơnăm ối nếo thế rak krá tuăn tơmiât ki lĕm tro dêi kăch măng, môi tuăn ƀă Đảng, ƀă Tơnêi têa ƀă kuăn pơlê; pơtối rak vế pêi pro tro hnoăng cheăng, tơbleăng tuăn mơno ki lĕm pơ’lêh nếo, ôh tá lao tuăn hlo tơdroăng xơpá, ôh tá tơxoăng tuăn xua ing tơdroăng vâ pro pơxúa ăm tơná, ôh tá mơhía dêi tơná angiâ mơngế ki pơlông thế pro vâ châ pơxúa; khên tơmiât, khên pêi, khên pơ’lêh nếo, khên pôu râng dêi hnoăng tơná pro.