Peăng kơxo, Kuô̆k hô̆i têk kŏng tiâ vâ tơbleăng 8 luât, mê cho: Luât Séa ngăn (‘mâi hơ’lêh); Luât ‘mâi hơ’lêh, tơ’nôm mâu tơdroăng dêi Luât kuăn pơlê kơnôm tơleăng mâu tơdroăng tơbriât dêi rơpó, Kơnôm tơnêi têa tơleăng ‘na liăn ngân, Luât mơngế hâi phô̆m xông rơtăm, Luât ‘nhiê tơmeăm ƀă Luât Tơleăng pro pơlĕm, tơpui tơno a Hngêi tơleăng; Luât ‘mâi hơ’lêh, tơ’nôm mâu luât pơxâu phâk mơngế ai xôi, Luât ‘mâi hơ’lêh, tơ’nôm mâu tơdroăng dêi Luât pơkâ ƀă hlá mơ-éa pro chiâng luât.

‘Na tơdroăng mơngế pêi cheăng, Vi ƀan pơkuâ Kuô̆k hô̆i tơbleăng ăm Kuô̆k hô̆i ‘na tơdroăng tối mơnhên, tơmâng xo mâu tơdroăng veăng hnê tối dêi mâu kăn Kuô̆k hô̆i tơpui tơno a tâi tâng khu, angiâ drêng Kuô̆k hô̆i pơkâ tơdroăng cheăng ‘na mơngế cho dêi mâu kăn ƀă tơdroăng tâ phĭu pơkí. Klêi hôp tơpui tơno a tâi tâng khu, Kuô̆k hô̆i têk kŏng tơbleăng inâi ƀă tâ phĭu rah xo kăn hnê ngăn Hô̆i đong tâ phĭu rah xo dêi tơnêi têa ƀă tơdroăng cheăng mơngế ki ê cho dêi hnoăng pơkuâ ƀă tơdroăng tâ phĭu pơkí.

Klêi tâ phĭu, Kăn xiâm hnê ngăn Hô̆i đong tâ Phĭu tơnêi têa kô pơtroh pâ thế Kuô̆k hô̆i kĭ inâi Phŏ kăn hnê ngăn ƀă Mâu ngế cheăng tung Hô̆i đong tâ phĭu tơnêi têa.